Congress President Pu Lal Thanzara Thusawi kha 101%-in ka awih lo
Mizoram Congress President Pu Lal Thanzara'n Sinlung Hills Council inthlan atana Phuaibuang, Khawlian, Zawngin, Suangpuilawn leh Vanbawng khuaahte October ni 24, 2024 (Ningani)-a a campaign naah, Mizoram MLA inthlanpui hnuhnung berah ZPM an sawrkar chiah khan Saiha bialtu MLA Pu Dr K Beichhua chuan Deputy Chief Minister nih a tum a, mahse, mipui leh kohhran mite mitmei an ven avang ZPM-in BJP duh dan an zawm thei ta lo tih thu a sawi a. He thusawi hi ka awih lo rura lutuk a, 100% mai ni lo, 101%-in ka awih lo.
Congress Party-a an Secretary (Media Department) Lalremruata'n 24.10.2024-a press release a tihchhuaha an ziah dan chu, "...ZPM pawh hian BJP an thawhpui a ni tih a lanna chu BJP Candidate pahnih dinna Siaha leh bial dang pakhatah khan candidate an dah ve lo a nih kha, an sawrkar chiah khan Siaha bialtu K Beichhua phei chuan Deputy Chief Minister nih a rawn tum nghal chat a ni. Mahse mipui leh kohhran mite mitmei an ven avangin BJP duh dan an zawm thei ta lo a ni," tih a ni.
Nikuma Mizoram MLA inthlanpui neih hma deuh tawh aṭang khan Congress hruaitute hian Mizo Kristiante hi BJP min hmelmâktir an tum ngar ngar a, an khingpui party-te pawh BJP nen an sawi zawm char char ṭhin. MNF chu NDA leh NEDA-ah BJP nena thawk ho an nih thu an sawi char char a; ZPM pawh finfiahna hmuh tur awm si lovin BJP nena a ruka inzawm angin an sawi char char bawk. Hemi chungchang hi MLA inthlanpui hma aṭangin an sawi a, Lok Sabha MP inthlan dawnah an political ball pui ber a ni leh ngar ngar a; tunah Sinlung Hills Council inthlan neih turah pawh an sawi leh ta zel bawk.
Congress hovin BJP leh ZPM an sawi zawm ṭhin hi finfiahna tak tak a awm ngai lo niin ka hria. Finfiah theih tak tak si loh, chiang faka puh dawt ni bawk si lo, mipui ṭhenkhat rilru tibuai tur leh ngaih tiṭha lo turin an bei ni berin a lang. Hetianga thu belhchian dâwl tawk lo hmanga BJP leh ZPM thawk dun anga sawi ngar ngar hian awmzia a nei lo, a 'work' lo a ni tih chu inthlan result-ah a lang chho zel zawk a. Tunah phei chuan Congress hian MLA pakhat chiah an nei a, MP inthlanah phei chuan chak berna constituency an nei lo. By-election hrang hrangah pawh ZPM leh MNF hnungah fâl takin pathumna an ni ta zar zar zel chu a nih hi.
Pu Beichhua'n Deputy Chief Minister nih a tum anga Congress President Pu Thanzara'n a sawi ka awih loh em emna pakhat chu hemi a sawi ṭum veka a sawi dang, thu dik lo chiang lutuk, a dik lo tih finfiah nghal mai theih a sawi tel hi a ni. Chu chu, "BJP Candidate pahnih dinna Siaha leh bial dang pakhatah khan candidate an dah ve lo a nih kha," a tih hi a ni. Hei hi thu dik lo, dâwt chiang tak a ni. A chhan chu MLA inthlan hnuhnung berah khan ZPM hian bial tinah official candidate an nei tlat; BJP candidate-te tlinna Saiha leh Palak bialah pawh candidate an nei a ni.
Kan politician hausa tak tak, Mizoram kaihhruai tumtute u, politics hi dâwt nen khel lo teh u. Politics hi dâwt sawina hmun tur a ni lo. Dâwt chiang lutuk in sawi hian ram hruaitu atana in tlak lohzia in tilang mai a ni. Mipui thinlungah in hniam sawt sawt zawk a ni tih inhre mawlh teh u.
- VL Hlanpuia