Sun Control, sikul ṭan hma etc
Thutak deuh ngun mai an ziah hi chuan keini ang hi chuan kan chhiar peih lo ṭhin bawka keimah anga thutak sei pui pui chhiar peih lote tan thil panga ka vei deuh deuh ka han au chhuahpui ve teh ang. Keini ang thu ziak thiam lo tan chuan vei zawng sawi chhuah pawh hi thiam a harsa hle a ni.
1. Sikul ṭan hma hi a ṭha ka ti. Kan nau pakhat chu zingah dar 8 vela tho ṭhin a ni a, college kal tawh a ni a, a naute sikul an ṭan hma chiah chu a thawh hmain an insiam ta suau suau mai sia a thawh hma phah ve ta hial a. Hei hi chu example pakhat mai a ni a, chhungkuaa tho hma thar ta sawi tur pawh an awm a, chhungkuaa zana mu hma tate an awm a, sorkarin kal hma tur a tih takah chuan kan huphurh em em kha a takin kan lo ti thei reng a ni tih kan hmu zel a ni.
2. Kan tualchhung vawksa zawrh dan hi ka vei zingah chuan a tel leh a. Kawngpui kama kan sat mai hi chu kawngpui khu a kai bakah motor aṭanga khu chhuak hrisel lo tak hi a kai tel ka ring a, hengte hi Local Council leh Village Council lam khawp tur nge AMC zawk nge ni kan tihtawp loh chuan hriselna atan a ṭha dawn lo a ni.
3. Sun Control bel hi dan kalh a nih pawhin dan kalh ngeiin kan VIP motor-ah an bel tawh tho a, chuvangin private vehicle hi chuan bel zel mai se, tumahin Supreme Court-ah min zuk hek thawt thawt lo bawk se. Vaiho hmuh lohah hian vuah dum vu vu ila a ni mai. Sun control bel pawhthlak leh dawn chuan VIP ho hian an tih hmasak ka phût e.
4. Ka ṭhianpa pa chu MCS pension a ni a, a nu pawh zirtirtu pension a ni. Ka ṭhianpa min hrilh chu, "Sorkar hnathawk eiru si lo hausa hi a awm theih loh a, chuvangin an hausak chuan an eiruk vangah ngai mai rawh. Ka nunah a takin ka tawng tawh," a ti a, sorkar hnathawk in lian pui pui sa thei leh lirthei changkang tak tak nei theite hi an eiru lo a nih chuan an sum hmuhna hriat a chakawm khawp mai.
5. Ka ṭhianpa pakhat sawi vethung chu, "CYMA leh MZP hruaitu ni tur chuan hman a ngai lutuk. MZP chu hna dang thawk lo law law an ni a, CYMA hruaitu sorkar hnathawkte hi chuan an hna an thawk hman lova, mi hnaah hlir an hun an hmang e," a tia lawm.