#GoHomeIndianMedia

Internet khawvela Twitter i khawih ṭhin chuan, tun hnaiah #GoHomeIndianMedia tih i hmu ang. Nepal-a Indian media-te chet dan an duh lohzia an lantirna a ni a, hei hi Mizoram media-te pawhin inzirna atan hmang ila, a bikin TV reporter lamin harh chhuah phahna atan i hmang teh ang.

Nepal-ah lir a nghing a, mi tam takin nunna hlu tak an chân a, khawvel hmun hrang hrang aṭangin ṭanpuina sum leh ei tur leh thawmhnawte a lut ruih ruih a, media lam pawhin Nepal hi panin thil awm dante an report. Report-tu tam tak awm zingah Indian media lam an lo kal fawr deuh a, news neih ngaihnawm/ hmuhnawm an tum luatah midang tana harsa khawpin an awm a, chu chu internet khawvelah an sawisel ta a, ka hmuh rualin Mizoram TV reporter-te ka hre chhuak nghal.

Laipuitlanga chhiatna a thlen khan TV ka en a, ka lo ip chawih chawih ṭhin a, thil zawng zawng kha mipui hmuhtir vek kan tum a, chhan­­chhuahna hnathawhna hmunahte khan camera nen kan luhchilh a, Discovery channel vela an edit tawh hnua an chhuah leh ang ni si loin news channel-a mipui hmuhtir tumin a ril thei ang ber kha kan lut a, ngaihtuah chian pawhin a zialo lam chu a ni.

Nepal-ah hian Indian media-te hi a chhungrilah an lut a, vanduaina tuarte an kawm a, an thil tawn ṭhenkhatte an sawitir a, tunlai ṭawngin an an 'over' khawp mai a ni awm e. TV-ah report ṭha bik leh ngaihnawm leh hmuhnawm neih an tum a, India ramah TV news channel hrang hrang a tam si a, Nepal-ah an kal nasa si a, an nin em avangin #GoHomeIndianMedia tih chu Twitter lamah a lo lang ta a ni.

Mizo zinga media vawn­fung chelhtute hi mi taima leh fel tak tak ni bawk mah se, a ṭhente hi chu zirna mumal nei lo an ni a, lehkha thiamna lamah pawh sang tawk lo leh inchhiar zau peih lote an ni nawk hlawm niin a lang. Hei vang hi a nih ka ring mipui hnenah thil mak leh ngaihnawm leh hmuhnawm lantir tumin kan intlansiak nasa ta lutuk a, chu chu media kalphung emaw tiin mipuiah thil ṭha lo a intuh mek.

Accident a awmin, "Chutah chuan lirthei a chesual a, chuti zat chu an boral," tih mai kan duhtawk tawh lo a, a hmuna kala rin dan nena sawi pawlha TV-a hmuhnawm chhuaha chhuah zel kan tum a, inthahna a thlenin police niawm takin kan zir ve vak vak a, eirukna liantham awm hai chhuak thei mang si lo hian mipui hmuh duh tur zawngin kan vak ve ruai mai hi a angin ka hre tlat pek a, #GoHomeIndianMedia tia Vai media-te an mualphona hi darthlalangah chuan hmang thiam ila a ṭhat dawn nen, a ziaktu lam hi min bei lêt chut lo ang tih pawh ka sawi thei lo!