Tu hnenah nge Lengpui Airport kan hlan ang?

Lengpui Airport hi Mizote tan chhuahka pawimawh tak, a lova kan awm theih lohna hialna a ni ta. He Airport hi India rama commercial airport 127 zinga state enkawl awmchhun a ni a, keini India rama state pachhe ber tan chuan phurrit a tling. Chu bâkah, he Airport enkawl tur hian thiamna pawh kan nei lo va, chuvangin, airport kan neih tirh kum 1998 aṭanga tun thlengin kan sorkar lu tihaitu ber pakhat a ni. Kan sorkar hmasate pawhin Airport Authority of India hnenah hlan an lo tum tawh ṭhin a, tun thlengin eng emaw chhan hrang hrang vangin tihpuitlin a la ni lo va, Mizoram tan phurrit a la ni chho zel a ni.

Lengpui Airport enkawltu Civil Aviation department hian tun kum sarih (2017-2024) chhungin cheng vaibelchhe 140.51 a hloh a. He Airport enkawl nan hian sorkar chuan sum a mamawh tam hle. Mithiamte sawi dan chuan Boeing 737 hian runway chhah lam pavement classification network (PCN) 50 lai a mamawh a, mahse, tuna runway hi PCN 35 chauh a ni si a, chuvangin, Boeing 737-te an la ṭum ngam lo niin an sawi. Runway siamṭhat nan hian cheng vbc. 100 lai a ngai ang an ti. Heng bakah building sak ṭhat nante pawisa tam tak sen a ngai bawk a, keini ang state rethei tan chuan mutmawh hnarmawha neih loh theih a ni lo.

Nikum December 2023-ah ZPM sorkar a lo piang a, Lengpui Airport hi a ngai pawimawh hle. Sorkar thar a lo din veleh hma an la nghal a; a hranga VIP entry chu an tibo nghal a, thlawhnaa zin mite an lawm hle. Chu mai ni lovin, sorkar tharin ni 100 chhunga hmalakna tur zingah Lengpui Airport AAI/private hnena hlan chu a telh a. Hei mai hi a ni lo, tun hma chuan airport-ah local taxi counter chauh a awm avangin state dang aṭanga VIP tourist-te pawh Lengpui Airport aṭanga Aizawl kal nan Maruti 800 hmang lo thei lo dinhmunah an ding a, Mizoram rawn zin leh an châk loh phah sawt a rinawm. Kan sorkar thar hian hei hi ngaimawhin Airport-ah hian rental counter siam a remti a, hei hi tourist hip nana hmalakna pawimawh tak a ni.

ZPM sorkar chuan Lengpui Airport hi private, AAI, IAF hnena hlan dan tur ngaihtuah turin Working Committee a din a, he Committee hian report-te pawh Chief Minister hnenah an thehlut tawh. Committee hian AAI, IAF, Adani te an dawr hnua an hmuh dan nia lang chu, AAI leh private company (Adani) te hian Lengpui Airport lak an châk lo niin a lang. Indian Air Force chu an duhthusam ni lo mah se, an terms ṭha deuh zawkah an ngai niin Vanglaini chanchinbu chuan a ziak. IAF leh Mizoram sorkar hotute nen an la indawr leh tur thu sawi a ni. Hetiang dinhmuna kan lo din takah chuan IAF, AAI leh private company-a hlan chungchang thlir zauna lo nei ila.

Private company-a hlan

A tirah chuan India rama commercial airport-te hi Airport Authority of India ta leh enkawl an ni a, mipui mamawh avangin IAF airport eng emaw zat an hawhsak bawk. Airport enkawl hi a hautak a, airport tlemte bakin hlâwkna an hmu lo. India sorkar chuan company-te pawhin airport an siam a phalsak a; Cochin Airport chu kum 1999-ah, Hyderabad kum 2002-ah, Bangalore kum 2004-ah private company-te’n an siam. Airport ṭha deuh deuh private company-te pawhin an hlâwkpui ve theih tur ang chite chu sorkar chuan private hnenah hlan a phalsak a. Delhi leh Mumbai airport-te pawh kum 2006 khan private hnenah a hlan a. Ahmedabad, Guwahati, Jaipur, Lucknow, Mangaluru leh Thiruvananthapuram airport-te chu PPP mode-in private company (Adani) hnenah hlan leh a ni.

Chumi hnuah chuan airport 25–Bhubaneswar, Vanarasi, Amritsar, Trichy, Indore, Raipur, Calicut, Coimbatore, Nagpur, Patna, Madurai, Surat, Ranchi, Jodhpur, Chennai, Vijayawada, Vadodara, Bhopal, Tirupati, Hubli, Imphal, Agartala, Udaipur, Dehradun leh Rajahmundry khawpuia airport-te chu kum 2022–2025 chhunga private company hnenah hlan turin thlan chhuah a ni a. Heng airport-te hi kum khatah passenger mi nuai 10-15 nei chin te, a leitute pawhin an hlawkpui ve theih tura ngaih an ni.

Lengpui Airport hian Manipur buai aṭang kha chuan ni tin passenger mi 1,500 vel nei anga ngaih a ni a, kum khat chhungin passenger 4,50,000 vel a nei ang a nih chu. Kum khat chhunga passenger nuai 15 nei thei tur chuan a tlem berah kum 15 a ngaih a rinawm. He criteria hi hman chhunzawm zel a nih chuan kum 15 hnuah pawh private kutah kan hlan thei ang emaw?

Indian Air Force enkawl airport

India rama commercial airport 127 zinga 23 chu Indian Air Force ta a ni. A tirah chuan IAF airport enkawlte hi ṭha viauin lang mah se, IAF hian tihchangkan aiin venhimna lam an ngai pawimawh zawk a, chuvangin, hun kal zelah duhkhawp lohna a nasain mipuite mamawh an phuhru zo lo ṭhin. Bangalore HAL Airport khu Defence ta a ni ṭhin a, hun a kal zel a, mipui mamawh an phuhrûk zawh loh avangin tuna an airport thar Kempegowda International Airport khu private company-te nena ṭang hova siam a lo ni ta a ni. Bagdogra Airport, Siliguri pawh khu IAF ta a ni a, passenger-te aṭangin sawiselna a nasa hle ṭhin. Jorhat Airport pawh khu British hun laia siam Nagaland leh Arunachal-a supply thiarna atan hman ṭhin a ni a, a ṭhang lo hle.

Kumbhigram Airport hi IAF ta a ni a, Barak Valley-a chengte’n an chhawr ṭangkai hle. Kum 2017-2024 chhungin passenger pawh an tam sâwt viau a, bungraw phurh lamah pawh hma a sawn nasa. Mahse, Airport runway tawi lutuk vang leh building ṭhat tawk loh avangin mipui mamawh a phuhru zo lo va, Airport Authority of India (AAI) chuan Kumbhigram aṭanga km. 25-a hla Dolloo Tea Estate-ah greenfield airport thar siam a tum a, peih a nih veleh Kumbhigram Aiport hi chu civil tan khar a ni ang.

IAF hnena hlan

Vanglaini-a tarlan danin, Working Committee chuan Lengpui chu IAF kuta hlan mai hi ṭha berin a ngai niin a hriat a, IAF hnena hlan a nih chuan runway chauh an enkawl tur a ni ang a, terminal-te chu Mizoram sorkar kut a awm tur niin a lang.

State sorkarin main building a la enkawl chhunzawm zel chuan security atan Mizoram Police hman chhunzawm a ngai dawn a, security atana sorkarin a pawisa hman tur pawh a kiam phah dawn chuang lo tih a ni. AAI enkawl chu ni se, security rawihna man an tum tur a ni dawn a, kan phurrit min chhâwk zângkhai phah ang.

IAF hnena airport kan hlan chuan mipuite leh force-te kan inpawlh dawn tihna a ni. Aizawl khaw chhunga Assam Rifles awm hian harsatna tam tak kan tawh phah a, intihbuai nikhuaah an silai chelek maite an hreh lo va, civilian-te’n an kut kan tuar fo a ni. Lammual pawh duh ang tawka zalenin kan hmang thei lo. Civilian leh force inawm pawlh hi a ṭha lova an ngaih avangin sorkar hmasa leh tuna sorkarna chelh mekte pawhin khawpui laili aṭanga AR sawn chhuah hi an ngai pawimawh hle a ni. Force-te hian kawhmawh bâwl an thiam a, an chungah action kan la thei si lo. Tun hnaiah pawh kan minister pakhat zah lo takin a zinnah AR-te’n an tibuai a, kan buai phah a nih hi. Airport hi IAF hnena hlan a nih chuan civil mite nena intihbuaina a thlenin mipui hi a tuar zawk tur kan ni. Airport kan pek tawh chuan kan hnawtchhuak thei tawh dawn si lo, airport dang kan zawng ruai mai lo vang tih a sawi theih loh.

Mizoram buai laia kan khawpuite thlawhna hmanga bomb a nih dan hre phate chuan Lengpui Airport hi IAF hnena hlan a nih chuan Mizote tawrhna hmanrua atan an hmang mai ang tih hlauhthawnna rûk tak a awm thei.

Rei lo teah Mizote hian international airport kan la mamawh dawn a, Dhaka, Mandalay, Bangkok service-te neih kan la duh ang. Chumi atan chuan runway mai bakah building ṭha tawk, parking bay, aero bridges, apron leh adt. kan la mamawh dawn. AAI chuan Imphal Airport chei ṭhat nan cheng vbc. 720 a seng a, building atan ringawt vbc. 600 a seng; Agartala Airport tihchangtlun nan vbc. 400 a seng bawk. Lengpui Airport hi tihchangtlung nan leh international airport-a kan hlan kai dawn chuan building ṭha tâwk leh a ṭul dangte siam nan cheng vbc 500/600 chu kan mamawh ngei ang. Heng pawisate hi IAF-in min tumsak loh chuan khawi aṭangin nge kan hmuh ang.

North east state-a AAI enkawl airport pathum–Guwahati, Imphal leh Agartala-te international airport-a hlankai a ni tawh. Ministry of Civil Aviation chuan Vision 2040 a buatsaih a, kum 2040-ah chuan India ramah international airport tuna kan neih mek 30 aṭangin 70 a tlin tawh an beisei. North east-ah chuan Lengpui Airport hi international airport ni leh thei àwm ber a ni. IAF enkawl a nih chuan international airport neih chu a beisei awm loh. AAI-in Lengpui Airport hi enkawl se lang chuan pawisa lamah harsatna a awm dawn loh avangin kum 2040-ah chuan international airport 70 zingah Lengpui hi a tel phak ngei a rinawm.

AAI hnena hlan

Eng ang chiahin nge an indawr chu hre ve lo mah ila, Working Committee leh AAI inrem thei hlohna chhan ni theite chu:

a) A man chungchang: Lengpui Airport hi keini lamin hlâwkna ûmin hralh turin kan ngai ang a, a man kan chhiar to a ni thei. Airport hi kawngpui anga infrastructure-a ngaih tur a ni a, company-te anga hlawkna neih kan tum a nih chuan a dik chiah lo. National Highway pawh MNF sorkar laiin min laksak a, kawngpui ṭha takin min siamsak a, mipui kan lawm.

b) Venhimna leh hlawkna: Sorkar hmasa hun laia AAI leh Mizoram sorkar inrem theih lohna chu airport security chungchangah a ni an ti. AAI hian airport venghimtu atan CISF an hmang a, airport pakhat enkawl turin battalion khat lai an mamawh avangin a hautak a, chuvangin, security atan Mizoram sorkarin a police pe chhunzawm zel turin an ngiat a, hei hi an inrem theih lohna chhan bulpui ber a ni awm e.

Tun hnai lawkah AAI chuan Sikkim tan Pakyong Airport, Arunachal tan Hollongi Airport a siamsak a; tunah hian Nagaland tan Chiethu Airport an siamsak leh mek. Heng airport-te hian kum tam fe hnuah pawh hlawkna an hmuh a rinawm loh. Hlawkna ringawt chu AAI tum a ni lo tih a lang chiang. Meghalaya-a Umroi Airport pawh ATR bak a service thei lo, a hlawk lo tih a hriat reng; chuti chung chuan AAI hian pawisa tam tak sengin chei ṭhat a tum mek a ni. AAI chuan commercial airport an enkawl zawng zawng security man hi anmahni tum vek a ni a, khawi state mahin security an tumsak lo. Mizoram sorkar hnenah security tumsak tura a ngiat hi state dangte nen ang khat rengin min en lo va, min thlauthla tihna a ni .Hei hi Mizote tan a lungawithlak loh tak zet.

Chuvangin, kan sorkar hian dik lo taka AAI-in min enhranna hi kan lungawi lo tih central sorkarah thlen se, Lengpui Airport hi AAI-in airport dangte a enkawl dan anga enkawl tura min laksak turin central sorkar nawr se. Political party tinte pawhin party politics dahṭhain, Mizo hnam thila ngaiin sorkar hmalakna thlawp ila; NGO leh mipui pawhin hnam thila ngaiin sorkar thlawp bawk ila kan hlawhtling ngei ang. 

- Lalthuamliana