Nungchate nghahhlelh nun thar
Mihring thinlung hual veltu chu ngaihtuahna te, suangtuahna te, ngaihdan te, rilrute a ni. Mihringa nun ze hrang hrang awmte hi thil ṭha ti tura an inthurual loh chuan a changin thil ṭha kan ti a, a changin thil sual kan ti leh ṭhin.
Pawl thil tihnaa kal khawmnaah thu ṭha tam tak zawm turte sawi a ni ṭhin a, chawp leh chilhin rilru chuan kan zawm duak duak a, in kan thleng a, ngaihtuahna danglam tak kan hmang zui a. Dan zawm pawisak lohna a lo chhuak a, mi chan ai lak duhna te, mahni hna chanpual ngaihthahna te, mahni tan chauha ṭha tur thil (mahni hmasialna) te, duhamnate chu ngaihtuahna ṭha lo leh dik lo aṭangin a lo piang chhuak ṭhin. Chutiang thinlung pu mi chuan nungcha dimdawina a nei ngai lo.
Nungcha humhalhna chu a ṭha tiin awlsam takin kan sawi mai a, mahse, chung zingah chuan ramvah (sapêl) addict tlat, ramvah nuam ti, chuti lama lung tileng tlat tam tak Zoramah hian an awm. Chungho thinlungah chuan an chhia leh ṭha hriatna kaltlangin an ngaihtuahnate chu siam thara a awm hunah chauh kan rama nungchate hi an zalen ve dawn a ni.
India ram hmun tam zawkah chuan a rama chengte’n sa an ei loh avangin silaia ramsa pêl te, thang kam te, lui sangha tûra hraite an ching ve lo va, nungchate an zalen a ni. An hnam culture-a awm, an ṭhan hnan tawh, an nuna bet tlat a nih avangin an tan chuan ramsa humhalh hranpa a ṭulna a tam lo viau ang.
Ramsa pêl an nuna bet nghet tlatte chu kum upa zingah an tam a, kum naupang lamah pawh ni tina ramchhuak ṭhinte zingah ramsa pêl ngaina tam tak an la awm a ni. Chungho thinlung chu a lo inthlak hunah, an ngaihtuahnaah ramsa lainatna leh khawngaihnate an lo nei ang a, chungte chuan an nun a rawn thlaktir dawn chauh a ni.
Eng ang pawhin nungcha humhalhna lamah hma lak ṭhin ni mah se, khawmual lui dung, Zoram dung tluanah ramsa pêl mite an vâk chhuak reng a; thupek khauh tak te, lei chawitir ṭhinte chuan chungho nun chu a hneh thei si lo. A pawimawh ber chu sa pêl mite ngaihtuahnaah ramsa khawngaihna leh lainatna a thara a thlen a ni a, chutiang thinlung an nuna a lo lan chhuah hun chu a nghahhlelhawm ber lai a ni.
Hei hi ngaihtuah ila; mihringte chuan nunna nei pakhat pawh kan la siam chhuah theih loh laiin nungchate chuan keimahni ang bawkin thih an hreh a, nung dama awm an duh a; na tawrh an duh lo va, mihringte tihlim tur leh kan ṭhian ṭha ni turin siamtu dinte an ni.
“Ramngaw mawitu selé, zukchal,
An rêm zo silai thang lakah,
Hmuh leh ka nuam an ki hreu mawi,
An va mawi em, hring mit tlaina,
Zoram chhinchhiahna ropui chu.”
- H. Neihchungnunga, Durtlang