Mizo nula hmelṭha tan
Tlemlai deuh khan Vanglaini-ah hian Mizo nulate Facebook vela an thlalak an phochhuah vak vak chu selin 'Mal man nei lo' tiin an chhuah a, an sawiselna ki ka hriatthiampui rualin kawng ṭha zawk an kawhhmuh tel si loa, Mizo nula hmelṭha leh pian nalhte tan hian thil ṭangkai a nih theih takin tiin thiam lo chung chungin ka ngaihdan ka rawn puang chhuak ve dawn ta a ni.
Manipur lamah khian miss chi hrang hrang hi an thlang ve ṭhin a, Zo hnahthlak hnam hrang hrangin an kût leh hunpuiah miss hi an thlang ve fo mai a ni awm e. A hre zawkte min hrilh dan chuan miss an thlan hi an thlang mawl tawp lova, miss an thlan chhuahte kal zelna tur hi a thlangtu lamin an ngaihtuah a, a ṭhente chu air hostess-ah an ṭan phah tawh a, a ṭhen chu an thawh theih âwm hna zahawm ve tak hi phai company lianahte an hmuhsak a, a ṭhen chu hotel liana khualchhawnahte an hmang tawh a ni awm e. Hei hian ngaihtuahna min siam a, Mizorama kan nula hmelṭha leh pian nalhte hian an hmel leh pian nalhte hi eizawnna tlingah han chhuah thei ve se, tih hi ka ngaihtuah ta zel a ni.
Miss Chapchar Kut an thlan dan hi hre ve hauh lo mah ila Lammuala kalkhawm zinga a tu emaw ber kha an thlang a, a thlangtu committee hi tute emaw ruat chawp niin Chapchar Kut Organising Committee buatsaih pawh ni loin an sawi. Mahse thlan an nih hnuah hian Chapchar Kut Miss tihte an hmingah kan vuah leh tho avangin Chapchar Kut Organising Committee hian thlang law law se, tehfungte pawh siamin bei vak law law mai se, a chhan chu tunlai deuh deuhin an zai tho a, Mizo hnam thil a ni tawh bik loa miss thlan mai hi a sialin ka hre lo a, chumi piah lamah chuan an thlang tho tho bawka official-a thlan mai hi kei chuan a ṭha zawkah ka ngai.
Chapchar Kut Organising Committee lamin miss thlang se ka tih chhan chu han sawi belh leh dawn ta ila, anni lamin an thlan chuan sorkar nen pawh a inzawm a, a nih loh pawhin YMA emaw nen an inzawm tihna a ni ang a, a nih chuan miss chu hna zawnpui a nuam deuhin ka ring.
Air hostess-te pawh chu an nih theih chuan a ṭha a, a theih loh pawhin hna ṭha ve, zahawm ve tak zawnpui dan awm se, tuna mi anga miss lo nih ve ringawt ang hi chu a ṭha lo; anmahni lamah incheina ulukte a lo ngaia senso a pun phahin ka ring zawk tlat.
Mizo nula hmelṭhate kal zelna tur hi ngaihtuah ila, Facebook vela inpholang mai mai atan chuan an uiawmin an kalzena tur kawng hi a awm ka ring tlat a, thiam lo chungin ka rawn ziak chhuak ve ta hial a ni.