Leitlangpui Music Festival neih tur hi

'Bâr' thlaa a thla hnihna, Khuangchawi Thla kan lo hmang zo leh ṭêp ta reng mai–hun hi a va kal chak tak em! Kan hma lawkah 'bâr' thla, thla hnih a awm a, a thla hmasa zawk Sahmulphah Thla aṭangin Masi hunpuiin rilru a luah ṭan tawh dawn a, mipui rilru a phâwklêk ṭan viau tawh mai thei a, huau huau pawh a tam sawt mai thei.

Kan hma lawk Sahmulphah Thlaa huau huau awm tur langsar tak pakhat chu 'Leitlangpui Music Festival' a ni. Leitlangpui lanu val rualte pawh an phûr viau tawh mai thei e. Mizoram sawrkar, ZPM kaihhruai chuan kum 2006 vela hman ṭan Anthurium Festival titawpin, a aiah Leitlangpui Music Festival hi kuminah chuan buatsaih a ni dawn nia sawi a ni.

Anthurium Festival kha ka ngaisang lo a, kum 2008 emaw ni khan ni khat ka kal ve a, chawhma chhung chauh. Chumi hnuah ka kal ta miah lo a, kal châkna leh kal tumna ka nei zui lo. Mi tam tak chuan mi hausate intâwllênnaah an ngai deuh niin a lang a; chuvang chu ni maw (?), keimah ang bawka ngaisang lotu, kal ena en lem lo an tamin ka hria!

Tourism Depart-ment-in kût (festival) buatsaihna atan central aṭangin sum a hmu ṭhin si a, chuvang chuan Anthurium Festival tihtawp rualin, kût dang buatsaih tur an dap nghal a, Leitlangpui Music Festival buatsaih an tum ta niin a lang.

Tun hnaiah Champhaiah Hnahsin Kût hman a ni a, Aizawl leh hmun dang dang aṭangin mi tam tak an kal; kal âwm lo tak taka ka ngaihte pawh an kal nual mai. Kal ve lem lo mah ila, a hlawhtlinzia hahîpin an sawi hlawm a, a lawmawm. Hnahsin Kût ngawr ngawr ai mahin tlawh nghal remchang, tlawh châkawm si a awm nual vanga hlawhtling viau a nihte ka lo ring ve ngawt a; dik tak maw?

Thil reng reng Aizawl leh a chhehvela nghat vek loa hmun danga tih ve ṭhin hi a ṭha a, Mizoram chhim lam – Lungleia rimawi kûtpui buatsaih an tum pawh a ṭha tihna ka nei. Mahse, ka beisei sang lo a, Anthurium Festival aiin ka beisei sang lo. A chhan chu – Lungleiah chuan khualzin han hîp tur hmunhma leh thil an neih loh em vang a ni. Lungleiah hian ka kal ve fo tawh a, khualzin tana tlawh châkawm ka hre mang tlat lo.

Leitlangpui Music Festival neih tur hi hlawhtling takin hmang se ka duhsak rualin, hmun dang – Aizawl leh district pawn lam mi tana han kal chhan tlak tur a vâng ka ti a. Anthurium Festival thlakna êm atana hman atan chuan a ho ka ti ru angreng. A hmun hi Reiek pawh kha la ni se a thlanawm zawk ka ti; a chhan chu a hmunhmain mi a hîp zawk tlat. Leitlangpui nula leh tlangvalte an lo intihhlim vena remchang a ni dawn a, a ṭha alawm, tih mai a ngai a ni.

Leitlangpui Music Festival tih hming hi ka helh deuh bawk. Kût hi khaw hming chawi loa phuah a ṭha ka ti. Lunglei lam hian 'regional feeling' an nei lian lutuk em ni chu aw, tih turin thil a awm fo mai a; chu rilru aṭang chuan 'Leitlangpui' tih pawh hi an phuah a nih ka ring. A buatsaihtu tur Tourism Minister lah Lunglei nu a lo ni kher bawk nen. Mi tam takin 'A khaw te rilru' an tihsak ka lo hlauhthawnpui deuh. Mizoram pum huap anga buatsaih tur a nih tho hmel si a, Leitlangpui aiah 'Mizoram' emaw, 'Zoram' emaw, 'Zo' tihte emaw han ni thei se aw...

Ṭhangkhat lian zet festival lo buatsaih tawhna Reiek khua ka khawngaih deuh bawk. Kan tourist spot lar ber pakhat Reiek tlang behchhan hian kût eng emaw chu buatsaih ve a phu ka ti a; Anthurium Festival tihtâwp a nih pawhin, Reiekah tho hian kut/festival dang buatsaih ni thei se duhthusam a ni. Leitlangpui Music Festival hi chu a hranpain kal mai ta se, tiin duhthu ka'n sâm a ni e.

- Zoramchhana