Pathian nen kan inanna

Lengzem October 2024 Editorial-ah, "Ní anga a lai taka eng ropui bik, chhehvela arsite’n an hêl kual ni tlatin i inhre ngai em? Fimkhur rawh… Engtik lai pawha, eng thilah pawh, pawimawh fal bik riauva inhriatna erawh hi chu rilru lam natna a ni. Inngaihhlut lutukna avanga mahni inbumna a ni thei..." tih vel, mahni kan inhriat lohzia leh mi dangte ngaihven leh ngaihsan leh ngaih pawimawh kan duhzia lam a ziak a. Keima nihna chiah a rawn sawi a ni. Ka feedback-ah pawh, "Ka nihna dik tak, ka sim theih loh a ni. Mahse, mihringte hian mahni kan indah pawimawh hmasa ber ṭheuh ṭhin si a, nangmah tiamin," ka ti nghe nghe.

Chu ka nihna min rawn hrilh chuan ka rilru a timangang ta hle mai a. Engati nge mi aia ka chapo bik a, mahni hma ka sial bik? Engati nge mite aia ropui bik leh chungnung bik ni tlata ka inhriat? Mite hian min ngaihsakin min ngaihven se, min ngaichangin min ngaisang se, min fak se, min be rawn se, fing min ti se, min zah se ka tih bik tlat thin le? Engati nge ka indah pawimawh hmasak ber tlat ṭhin mai le? Rilru piangsual dik tak ka lo nih hi, tih ngaihtuahna chuan min ti buai ta em em mai a, min timuhil thei lo. Chu ka dik lohna chhan hmuh chhuah tum chuan mut hmunah chuan research ka bei ta ngat ngat a, chuta ka hmuhchhuah chu hei hi a ni: 'Pathian anpuia siam kan ni' tih hi.

Kan Pathian hian dah pawimawh hmasak ber a, Amah ngaihchana ngaihven reng te, amah zah leh ngaihsan te, engkima dah pawimawh hmasak ber te, amah râwn reng te, ṭih tak leh zah tak chunga biak rengte leh hriat rengte hi a phût tlat a. Keini pawh a anpuia siam kan nih chuan, chu rilru chu kan lo nei ve a lo ni reng mai. Keimahni aṭanga paih bo ngawt theih a lo ni lo tihte ka hriat hnu chuan ka thawveng ta hawk a.

Nimahsela, khi’ng zawng zawng khi Pathian tel lo leh, Pathian pek ni lova neih leh nih, dawn leh chan kan tum chuan mahni inbum mai kan lo ni a; zahna, mualphona, beidawnna leh hlawhchhamna, lungngaihna leh buaina min thlentu mai an lo ni ṭhin. Amah (Pathian) kan dah hmasak ber a, amah ngaihchan a, a thu thua engkim kan ṭih chuan, dik tak leh fel takin thil ṭha leh ropuina hi kan chang thei ṭhin a lo ni. Pathian nen chuan engkim hi a tih theihin a nih theih a, Pathian nen chuan engkim hi a dikin a ṭha vel vek ṭhin a, engkim hi a tluangin a mawi ṭhin a, a fel vel vek ṭhin a, a lo ropuiin a lo zahawm mai ṭhin a lo ni.

Mi mualphona tur ringawt zawn reng mai te, mi tlin lohna leh chhiatna zawn taimak viau te, mi rèl leh sawichhiat nuam tih viau te, dâwt sawi hrat em em te, mahni level-pui leh tluk lohte îtsîk leh er reng renga khawsak reng te, mahni ta lo ît tlat mai leh neih tum phêt te, duhâm leh hmasial em em rengte leh, rilru chhe lutuk put reng maite hi, ni tina Isua ruala krawsa kan tihhlum zel chuan, nuam tak leh ropui takin Pathian nen a lo lên dun theih zel ṭhin a ni tihte chu ka mut hmun research chuan kan hmu chhuak ta zel a, ka hlimin ka lawm ta em em mai a ni. Pathian ropui hmasa ber zel rawh se.

- K Hmingthankaia