Chawl hman kan ni lo, muang thei kan ni lo

Ruihhlo ngawl veite leh ruihhlo dan loa zuar sim duh lote hian kan Zoram mipuite hi min run chhe mek a. Engtin nge kan tih ang, NGO hrang hrang leh Kohhran hrang hrang leh sorkar leh chhungkaw tin te, a dona kawnga sum leh tha sengte chunga lawmthu sawi tur pawh a tam hle ang.

Tun ka ṭawng lo haw lo turah ngai ila, zing leh tlai, zanah te veng laili bazarah te hmun hrang hranga hmuh zahthlak tak tak a tam hle ṭhin. Mipui hmuh laiin a zuartute leh damdawi leh zu ti ṭhinte an inpel suau suau a, anmahni lah chu an zak der si lo a. Zah a hnehkin mipui kawng kalte tana kal harsa khawpa an awm chang pawh a awm fo.

Zodin Cinema Hall ni ṭhin kawta flyover bridge leh a chhehvelah te pawh sen va kal ve mak teh u, in rin aiin ruihhlo leh a kaihhnawiha in hnamhnawihte saw an ngampa ang a, an hnawksakzia i hmu bawk ang.

Minute 10 vel chauh ka awm hman tih khan a zuarho an rawn inlar nghal a, ka duh leh duh loh te min rawn zawt a, minute 30 ka awm hnu phei chuan football team khat daih zet an lo kal hman tawh a ni.

Naupang phei chu leng chhuak lo mai se tih hial khawpa ngampa an ni a, rui thar leh zuar thar lah an pung tual tual bawk. Sorkar hian hma lak dan thar a ngaihtuah dawn nge, NGO lam hian a then­fai hna an thawk leh zawk dawn, engtin nge kan tih dawn le?

Ka duhthusam kan sawi ve tawp ang e. Sawi sual palh a awm chuan min lo ngaidam ula. Sawrkar hian ram zau tak in pawh sak sa sethlam in pawh ni se a pawi lo, mihring mize hrang hrang dahkhawm a, enkawl theihna tur hmun ṭha tak a hung a, venhim ṭhat tlat siam se. Jail ni chiah lo camping centre ang deuha rei deuh awm theihna tur hmun ni se, Pathian thu nena in enkawlin kut hna thawh tur chi hrang hrang siam bawk se.

Chu hmun enkawl tur chuan Central YMA hi an ṭha ber ang a, project hrang hrang siam se, hnathawh tur, sum siam nana ṭha deuh awm se. Ran vulha tui mite tan ran vulh te, thlai siamna hmun te, kut themthiam zirna turte siamin nakin zela an eizawn nana tlak tur thil chi hrang hrang zir theihna tur ruahman se, a ṭha awm mang e.

Mi tam tak hi chu misual pawh an ni lem lo, hruai ṭhat theih an tam a, hnathawh tur leh tih tur hriat loh vanga sual ta mai mai an ni hlawm.

Chuvangin, he hmun siam tura a ngaihna hriate rawn chungin hetiang hian mihring siamṭhatna hmun leh eizawnna tlak hmun hi siam ila kan ram hian kan ṭhatpui ngei ang.