Inthlahrung ve deuh se
Mizoramah chanchinbu a tam hle a, mihring chet zat ngaihtuahin chanchinbu nei tam ber pawl kan ni hial mai thei. Tun hma deuh, internet ṭhat tak tak hma leh social media kan hman tam hma phei chuan chanchinbu a tam hle a ni.
Tunah erawh chuan internet a ṭha tawh a, mi tin maiin mobile phone social hmangin social media kan khawih ta bawk a. Hengte vang hi a ni ang, mipuiin chanchinbu kan chhiar tam tawh lo a, chanchinbu la pawh kan tlem tial tialin ka ring. Chumi nghawng zel chu ni maw, kan rama chanchinbu tam tak chuan PDF-a siamin social media-ah an thehdarh ṭhin a, a pheka an tihchhuah meuh tawh lo vang a nih ka lo ring ngawt mai a.
Chanchinbu PDF bakah hian internet website lamah chanchin thar dah ṭhin an awm nual tawh niin a lang a. Mipui tan a awlsamna tam tak awm karah an chanchin thar siam, website link leh a thupui chauh social media hrang hranga an thehdarh ṭhin a, whatsapp-ah phei chuan group hrang hrangah kan dawng mawlh mawlh mai a ni.
Hetianga chanchinbu PDF leh internet website-a chanchin thar an dahte a ṭangkaina chen awm bawk mah se, a ninawm chang a tam zawk mahin ka hria. Ram pum huap group hrang hrangah leh veng chhung group hrang hrangah an han thawn kual a, group-ah eng nge an sawi lai mek tih pawh ngaihtuah map lovin an han dah thawr zel mai a, ninawm ve deuh chu a ni.
Veng chhungah chhiat tawk an awm a, whatsapp group-ah zualko thu post a awm a, group-a awmte'n an ui thu leh pawi an tih thute an sawi laih laih laia eng nge an sawi mek, eng boruak nge awm mek tih pawh ngaihtuah lova thu dang daih, chanchin thar (link) an rawn dah leh pawp mai ṭhin hi chu a zialo tak zet.
Hetianga chanchinbu PDF leh website link te group hrang hranga thehdarh vak vak ṭhinte hi insum ve tur leh inthlahrung ve deuh turin ka chah a ni. Thil reng rengah hian a awm tawk leh a mawi tawk a awm ve a, chuvang chuan a mawi hawih an zawng ve tur a ni a, tih awm chin an ngaihtuah ve tur a ni.
Mi duh leh duh loh pawh ngaihtuah lova inbarh luih chiam tur a ni lo. Miin hriat an duh chu an lo ngaihven ve mai ang. Chanchinbu pawh a la duhin an la a, a duh lovin an la lo mai ṭhin. Mi la duh lo na nâ nâ chu pek a awlsam tawh tih vanga va barh luih kher tur a ni lo. Mi ṭhenkhat hi chuan an news website tihlar an tumna leh sum lak luh an duh lutukna lamah hian mawi leh mawi lo an ngaihtuah duh lo lui ṭhin niin a lang.
Whatsapp group hrang hranga chanchinbu PDF leh chanchin thar website link thawn darh vak vak hi mi tam takin an ning ṭhin a ni tih ngaihtuah ve tur a ni a. Group siam chhan te, group-a sawi awm leh sawi awm loh te, tih awm leh tih awm lohte mi pangngai chuan ngaihtuah thlen ve tur a ni.
- Lalduhmawia