Khawvelin entertainment a buaipui
Tun hnaiah ITI Veng tlangval pakhat chu Asia khawmualpui huap inbân-elhah a champion a, a lawmawm. Intihsiakna Mumbai aṭangin Aizawlah a rawn haw a, Asia khawmualpui huap meuha champion ni si, Mizo mipuiin an lo làwm lo, an ngaihsak lo, tih vel leh thu eng eng emaw a darh a; mi ṭhenkhat chu an vui a ni.
Chutih laiin, tun hnaiah vêk malzaia intihsiakna lian tham tak a zo ve chiah bawk. Chuta thleng sang deuhte chu Mizo mipuiin an buaipui em em thung a; an tan mi tam tak an inphal a, sum an sêng a, thilpek pawh an dawng ṭha viau a ni âwm e.
Mizoram level-a zai intihsiaka che ṭhate mi tam takin an buaipui a, thilpek ṭha tak tak an pek ruih ruih laia Asia khawmualpuia inbân-elh champion meuh lawmpuitu leh; hmuaktu mumal awm loa a rawn haw kha mi tam tak chuan mahni Mizo puite an dem phah a, mi ṭhenkhat chuan sawrkar hotute thleng thlengin an dem tel hial. Mi ṭhenkhat chuan an Mizo puite chu rilru puthmang dik lo leh ngaihsan tur dik ngaihsan nachâng hre loah an puh bawk.
Heng thilah hian Mizo mipui indem chiam chiam tur a ni lo. Khawvela hnam hrang hrangte hian hlimhlawp lam thil, entertainment lam hi a buaipui ve hrim hrim a, chutah chuan Mizote pawh kan bâng bik lo; khawvel nihphung a ni.
Khawvela inbân-elha chak ber hi khawvelin a hre lo, khawvel mipuiin an buaipui luih luih lo; an awmna ram mipui pawhin buaipuiin an bâwr luai luai kher lo mai thei a, Mizo zingah phei chuan hria an awm mang lo ang.
Chutih laiin, khawvel huapa zaithiam leh lemchan thiam (film star)-te chu an rama mite chauh ni loin, an awmna ram aṭanga hla tak, India ram kilkhawr taka mite pawhin kan hria a, tam tak chuan kan âtchilh a nih hi. Band chuai tawh lam, Aizawla an rawn concert pawhin sum tam tak sêngin kan lo lâmpui nghawng nghawng ṭhin a nih hi.
Inbân-elha Asia rama champion nih hi a ropui, a lawmawm; chawimawi pawh an phû. A thei leh ngai pawimawhtute chuan lo lawmin lo chawimawi rawh se. Mahse, Mizoram mipui nâwlpuiin ngaihven viau tura beisei kher tur a ni lo. Zai intihsiaka che ṭha leh lârte emaw, kan zaithiamte leh lemchan thiamte nen khaikhin vak loh tur; huhâng an inneih hleih lutuk. Mi tam takin zaithiam an bawrh luai luai avang leh an tana sum sên an hreh loh viau laia; inbân-elha Asia champion an buaipui viau loh avangin Mizo mipui hi indem vak tur kan ni lo, rilru puthmang emaw, tuipui zawng emaw insawiselsak chiam tur pawh a ni hek lo.
Khawvel hian entertainment a buaipui a, khawvela mi tam takin lemchan thiam te, zaithiamte an buaipui a, tam takin an âtchilh a; an tan sum leh pai sen pawh an inhuam thui hle ṭhin. Chu chu entertainment-a mi lârte'n an lo hausak phah ve bawk ṭhin. Khawvelah hian zirna leh hnathawhna lama hlawhtling takte hi buaipui tawk awm bawk mah se, mipui nawlpuiin an ngaihven lo a, an buaipui luai luai lêm lo. Hei hi khawvel awm dan a ni a, Mizote pawh kan bâng bik lo a ni mai.
Chutih rualin, Mizoram huap a ni emaw, India leh Asia huam emaw, khawvel huap emawa Mizo che ṭha leh chawimawi tlakte lawmpuia kan chawimawi thiam deuh deuh a ṭha a; tunah pawh tun hma deuh ngaihtuah chuan kan inchawimawi thiam em em tawh a ni.
- Kezo