Mizoram sorkar sum harsatna leh Finance Minister

Hmannia 'Vanglaini' chanchinbu Pu Rualkhuma Hmar ziak, Mizoram Finance Minister thlâk duhna leh Central Sorkar-ah pawh hetiang hi an tih ṭhin thu kha ka lo chhiar ve a. Mithiam, Ukil a ni a, thil a hriat viau laiin hriat kim loh leh hriat dik loh a neia ka hriat avângin tlêm chhân ve ka duh a, amah pawhin lo chhiar ve se ka duh hlé mai.

Pakhatnaah chuan India ram hian Independence kan neih aṭangin USA lam aia Soviet Russia lam kan kawmngeih tâk chinah khan Economic Policy hi a fuh lo hlê a. Hetianga kum 40 chuang kan kal hnu hian 1990 kan thlen meuh phei kha chuan International Monetary Fund (IMF) leh World Bank pawhin India ram pawisa (Currency) chu ring zo ta meuh lo a ni ang chu England lamah kan pawisa aiin kan rangkachak neihte chu a taka thawn thlâk hial a lo ngai ta a. India ram Politician te fel tâwk loh chu ni pakhat mahse, Economic Policy kan neih ṭhinah khan 'License Permit Raj' an tihte khan rei tak ṭhang hlei thei lovin min siam a, 'Trade Liberalization' te chu kha tih lai khan a hla hlê a ni.

India ramin Prime Minister atân PV Narasimha Rao a neih tâkah khan RBI Governor pawh lo ni tawh, Economist ropui, Dr. Manmohan Singh chu Finance Minister atân Pu Rualkhûma Hmar sawi ang hian dah a ni a. Politics-a hmelhriat pawh nei lo, Finance Minister hi Prime Minister hian kawng tinrenga harsatna a tawh chu a ṭanpui nasa hlê a. Amah PM hi mahni in 'promote' vak lo mi a nih avâng hian India ramin kum 40 chuang Economic kawngbona aṭanga chhanchhuah a nih chungchangah hian tuma fak a hlawh lo, 'Unsung Hero' (tuma fak hlawh lo mi ropui) tih hi a thih hnua a chungchang an sawi dân a ni.

Dr. Manmohan Singh hian 'Economic Controls' tam tak a zalên tîr a, a ṭul angin Sorkarin dân tharte siamin dân awmsa tam tak 'amend' a ni a. Vawiina Foreign Colloboration zara motor, TV, Computer, Phones, Washing machines, etc. ṭha ber ber, to lutuk lova mirethei pawhin kan lei thei ve ta hi khatih laia Central Central Sorkar hmâlakna zar vek a ni tih kan hre vek ngei ang. Kum 1991 aṭanga India rama Economic kalphung danglam ta hi India hian a hlâwkpui ta zêl a ni.

Chutiang khawpa Finance Minister hlawhtling ni chung chuan PM a nih khan a ngaih pawimawh la ngai reng mahse Central-ah 'Coalition Government' kan neih avângin Sorkar thawhpui Communist Party leh Party dangin Con­stitutional amendment leh Economic Policy pawh a chhunzawm thei ta lova. Sorkar aṭanga inhnuhdawha an vau zêl avângin Economic hmalâkna tam tak, Foreign Direct Investment (FDI) chungchangah te, Nuclear Deal (Deal 123 an tih) chungchangah te hma la mumal thei lova Sorkar a awm tâk avâng khan amah PM pawh chu PM ropui lo berah hial kan chhuah ta a nih kha! A khawngaihthlâk khawp mai.

Central Sorkar kalphung (Policy) leh Constitution 'amendment' te hi State malin duh mah ila, chuti maia tih theih a ni lova, Trade Liberalization te phei chu Mizoramah chuan a sawi pawh kan sawi ngam lo a nih zâwk hi.

Mimalin Pu Lalsâwta han dem viau hi opposition aṭanga Politics tak chuan a dik thei ang. Mahse, Finance Officer pakhat ve thung chuan, "Pu Sawta ang hi kum 5 kal ta aṭang khan lo nei ila chuan vawiina Sorkar sum harsatna kan tawh tam tak hi a kiang duak tawh ang" a ti ve tlat bawk a ni. Sorkar hmalâkna hi dodâl lovin ṭawiawm thei ila chuan kan ram hian dinhmun ṭha zâwk a luah thei ang.