KRISTIANNA LEH CHANGKANNA

Kan khawvel hmasawnnain a ken tel pakhat chu changkanna hi a ni. Hei hian kan khawvel hi a fang mek zel. Mi ṭhenkhatin an sawi fo chu, kan rama Kristianna a lo luh aṭangin changkanna lam kan pan chho ni berin an sawi a, hei hi a dikna chen pawh a awm thei awm e.

Tunlai changkanna hian Kristianna nun mawi leh ṭha a tibo mek zel niin a hriat a. Kan khawvel changkang mek zel hian kan Kristianna tinung thar leh tur hian ṭhalai mai bakah, nu leh pa te, naupang thlengin a ni ang chu, ṭan la zel turin kan insawm thar leh a ni. Keini hovin a hma kan lak loh chuan Pathian thu ṭha kan hriatna leh kan zir mek hi he kan khawvel changkang chho mek hian a hruai bo ve mai ang tih a hlauhawm tak zet a ni.

Mizote’n a kan entawn leh an tih dan kan lak ṭhin, sap hovin an sawi fo ṭhin ni bawk ‘Simple living, high thingking’ an tih hi kan ramah hian kan hmehbel thiam a pawimawh tak zet. Kan ni tin nunah leh kan Kristiannaah pawh hei hi kan inenfiahna atan leh kan inbihchianna atan a ṭul. Kan Kristianna tichhe zawng leh tibo zawnga changkan hi Pathian duh loh zawng a ni tih hi i hai hauh lo vang u.

Tunlai khawvelah hnam ropui leh changkang zawkte’n an hman ṭangkai em em media chungchang hi i han thai lang leh lawk teh ang. Media chu mihring leh mihring kan inpawh tawnna hmanrua ṭangkai tak a ni. Khawvela thil thleng kan hmuh leh kan hriat ṭhinte hi media aṭanga kan hmuh leh hriatte a ni a, media hi a ṭha lama hmang ṭangkai tur hian nu leh pate’n mahni chhungkuaah kan inzirtir thar a ṭul a ni. Media hmanga Pathian rawngbawl hna leh a chanchin ṭha puan darhna thawhna atana ṭangkai tak mai a hman a lo ni zel tate hi a lawmawm tak zet a ni.

Changkannaah hian thil pawimawh tak mai awm chu thianghlimna hi a ni. Thianghlimma hian kan ram, kan hnam leh kan Kristiannate hi tihmasawn zel se la. Kan Kristianna leh kan changkannate tihmasawn zel turin thianghlimna hi i ngai pawimawh deuh deuh zel ang u.

- George L. Ralte, Vaivakawn