HAN KANG (Noble Prize Winner 2024)

A hmasa ber atan, Asian hmeichhia ngeiin Noble Prize (Literature) 2024 a dawng ta nawlh mai le! A ṭawng dan leh a mizia awm ang ngaihruat hian tunlai ṭawng takin a cool raih mai a, lehkhabu a chhiar tam thawkhat tih a hriat nghal mai awm e. A lehkhabu ziah tawhte chu The Vegetarian, Human Acts, The White Book leh Greek Lessons te a ni. A lehkhabu thar ‘We do not part’ tih chu January 21, 2025-ah tihchhuah a tum bawk a ni awm e.

Tuna Noble Prize a dawnna chhan hi a lehkhabu ‘The Vegetarian’ avang a ni a, South Korea-ah kum 2007 khan a lo tichhuak daih tawh. Sap ṭawnga lehlin a nih miau loh avangin khawvel mipui hriat lem lovin rei tak a lo mu tawh a; a chhuah aṭanga chhutin tlemin tlai deuh tawh mah se la, he lehkhabu hi Deborah Smith chuan ṭha a ti viau mai a, sap ṭawnga letlingin khawvel hriatah pho lan a lo ni ta a. Smith hian rei lo te hnuah Noble Prize dawnna dawhsanna ding turin Han Kang hi a pui ta a ni. He thawnthu hi Young Hye-in sa ei a duh lo va, a bansan tak thu aṭanga bul ṭanin, mihringa nunrâwnna leh khawtlanga kan ze pianpui huaisar tak pho lannate a ni tel bawk.

Han Kang hi Gwangju, South Korea-ah November 27, 1970 khan a piang a; a naupan lai chuan hausa tak an ni bik hauh lo va, furniture-te pawh an tlachham ve viau ṭhin a ni awm e. Amaherawhchu, an in zîmte erawh lehkhabu hlira a khah lûk ṭhin thu a sawi a. Chung bookshelf-a lehkhabute chuan nunna hranpa an nei ni awm hrim hian kar tin, thla tin, kum tin a pung ṭhin niin a sawi. A chhan ber nia lang chu, a pa chu ziak mi, novelist a ni a, lehkhabu nasa taka chhiar ṭhin mi a nih vang a ni ngei ang. Han Kang sawi dan chuan a pa chu zirtirtu a ni a, hun puma ziak lama inhman a duh tak avangin a hna a bansan phah a. Tichuan, kum 1980 January ni 26 thlasik vawh vîn tûk lai tak khan Han Kang-i pa chuan nun bul ṭan ṭha turin Gwangju aṭangin khawpuiah an pêmpui ta rawih a ni. Chutiang chu an dinhmun a nih avangin Kang-i pawh sikul hrang hrangah a lut lawr ve hle ṭhin a ni awm e.

A naupan lai aṭanga lehkhabu hual vela seilian a nih avangte a ni mahna le, philosopher hovin existential questions an tih ang hi a rilruah a intuh ṭan tawh a. Eng nge mihring kan pian chhan, Enge nun awmzia hi, kan la thi vek dawn si a, tih ang rengte hian a rilru a luah ṭan a, chu chuan ziak mi ni tura bul ṭanna nghet tak a pe ta a ni. Hetiang ngaihtuahna aṭang hian ziaktu nihna zin kawng zawh ṭan chhovin, novel, poem, thawnthu tawite chu a buaipui ber a ni chho ta a ni.

Han Kang hian internet lama a lan dan chuan Swedish Knonor 1,10,00,000 a dawng a, India pawisa chuan Rs 7.97 vela puntir a ni mai ang chu. Amaherawhchu, a lawm nan ruai ṭhehte an tum lem lo va, mual inkhawm han buatsaih chuk chuk pawh an tum lem lo a nih hmel. Cool deuh takin, “Ka fapa nen thingpuiin kan lawm ang,” a ti duh lek fang a! Khawvela indona lian tak (Russia-Ukraine, Israel-Hezbollah) a awm mek laia lo lawm bûng bûng chu a duh zawng a ni chiah lo niin a lang.

Mizote hian novel, essay, drama leh poem ṭha tak takte kan nei thluah hlawm a, heng ho hi a zahpuiawm lovin, ngaihnawm tak tak leh ṭha tak takte a ni hlawm. A ṭhente phei hi chuan kan Mizo culture leh history thlengin, thuruk leh thuhruk ṭhen pakhat mah awm hauh lovin an sawi tum an pho lang nghal uar uar thei a. Heng aṭangte hian literature hi kan hnam nihna ril khawihtu a nihnate pawh a hmuh theih nghal hial awm e. Amaherawhchu, heng kan sawi takte hi Mizo ṭawng a ziak a nih miau avang hian hnam dang tan chuan a awmze pawh phak loh, vana rah ang a ni. Chu mai bakah, kan literature ṭha tak takte hi Mizoramah leh Zo fate tlatna mualah bak chhiar a ni ngai dawn lo tihna a lo ni ang.

Kum zabi 21-na kan chuankai hnu phei hi chuan kan duh emaw, duh lo emaw, engkim hi sap ṭawng bâwma khung a ni vek tawh a, ni khatah hian sap ṭawng thumal pakhat tal lam ri lo chuan a awm theih tak tak tawh loh. Kan phone leh technology hrang hrangte kan command-na ṭawngkam reng reng pawh hi sap ṭawng a ni ta vek mai a; install, delete, battery low tih thleng hian themtleng tê zawk anga rawlh loh theih loh dinhmunah kan ding tawh a ni. Hetiang hi kan khawvel hun tawn chhoh mek a nih tlat tawh avang hian kan literature ṭha tak takte hi sap ṭawng ngei maia lehlin a nih miau loh chuan tuipui râl kai miah lovin a mawina, a rilna leh kan hnam/culture hlutna zawng zawngte nen hian khawvel hriat lovin a luang ral mai mai ang tih a hlauhawm hle a ni.

Kan chenna khawvel hi ICT avanga suih zawm a, pumkhata siamtute (global village) kan nih miau tawh avangin, chu khawvel chu kan zawm ve ngei ngei a ngai tawh. Chu khawvel tharah chuan kan awmna kawr (regionalism) aṭanga kan chhuah a, hnam dangte nena inkungkaihna ṭha zawk nei a, culture khata kan luan luh thiam zel hi a la ngai telh telh dawn a ni. Khawvel hmaa kan inpho chhuak ve ngai reng reng lo a nih chuan khawvel hian min hre lo thuai dawn tihna a ni ang.

Keini ai hian North East-a kan unau hnam dangte hi ṭawngah chuan an dang a lo nâl zawk fe mai a, kan ṭawng hi a muan hrim hrim avang hian chu erawh hnualna tur em em a ni lo. Han Kang ngei pawh hi ṭawng lamah chuan dang nâl par par chu a ni bik hauh lo a nia. Ṭawnga kan chak lo a nih pawhin, ziak lamah hian nasa fein ṭan kan la thei tlat a ni.

Hengte a nih avang hian sap ṭawng hmang ngeia kan literature-te kan pho lan thiam a, ṭawng danga lehlin (translation) kawnga ṭan kan lak deuh deuh a ṭul hle. Kan Mizo thuziakte hi a lehlin a fuh a, a nih dan tur ang thlapa a kal thei a nih phawt chuan khawvel mithmuha pho chhuah ngam tam tak hi a la awm dawn chauh ni pawhin a lang. Tuna kan thupui khel mek hi Han Kang aṭang pawh hian a chhânna chu a chiang mai awm e.

- K. Lalrammawia, Zawlnuam