Thirsakawr khalha India ram fang chhuak thei - LZa Varte

Pu Vanlallawmzual Varte (LZa) hian kumin Jannuary ni 25 khan Aizawl a chhuahsan a, thirsakawr hmanga India ram a fan chhuah hnuin, November ni 2, Inrinni zan dar 10:05 khan km 17,000 chuanga thui a inrah kal hnuah Selesih a lo thleng leh thei ta. He hlawhtlinna sual chhuak tur hian ni 283 (thla 9 leh ni 9) a thang a ni.

LZa hi Mission Venga Pu VL Chuanawma leh Pi Rebecca Lalrimawii te fapa a ni a, nikum November ni 14 khan Steffi Lalnunhlimi nen an innei. Amah hi adventure lam tui leh mi hrisel ṭha tak a ni a, kawngkama plastic bottle ruak chhar khawmte pawhin Mizoram kawngpui dung zawhin hun a lo hmang lauh lauh tawh a, adventure lamah hnuhma a nei nual tawh a ni.

Mi fel leh zaidam tak, tumruh leh huaisen tak, ṭawng tam viau lo, nêlawm tak si a ni. Mission Veng Youth Adventure Club-ah Leader a ni a, Mizoram Cycling Association (MiCA)-ah hruaitu a ni bawk. YMA Mission Veng Branch-ah Executive Committee member niin, YMA Section III-ah Leader a ni a; Mission Veng Presbyterian Kohhranah Junior department zirtirtu niin, kohhran leh KṬP lamah pawh nihna eng eng emaw a chelh ve nual bawk.

Thirsakawr hmanga India ram fan chhuah ngawr ngawr hi a zin chhan a ni lo a, boruak thianghlim pawimawhzia leh chumi nei reng thei tura ṭan kan lak a ngaihzia a tlangaupui a ni. A zin theihna tura sponsor-tu Mizoram State Pollution Control Board lamin ruahmanna fel tak siamin, a zinna state hrang hranga Pollution Control Board lamte pawhin ṭha takin an lo dawngsawng hlawm a. Hmun ṭhenkhatah chuan zirna sikulahte thu an lo sawitir a, state ṭhenkhatah chuan LZa hian thingte pawh a phun nghe nghe.

Mission LiFE (Lifestyle for Environment) hi environment humhim tura inzirtirna pakhat a ni a, kum 2022 October ni 20 khan India Prime Minister Pu Narendra Modi chuan Kevadia, Gujarat-ah khawvel pum hriatah leh hman zui nghal atan a tlangzarh a ni. He programme-in a tum ber chu–mimal leh huho/khawthlang anga kan ni tin nuna kan thil tih reng reng hi kan chhehvel (environment) tichhe lo zawnga her rem tur leh kan nunphung environment nena inhne rem taka kalpui tura inzirtir a ni. Pu Narendra Modi-a tawngkam takin, 'Chhehvel ngaihtuah chunga nun’ nei tura mi tin hnena zirtirna pek chu he programme-in a tum ber a ni a; chutiang taka nunphung daih rei leh tlo, kan chhehvel tan pawha him zawk nei tura hma latute chu Mission LiFE hnuaiah chuan ‘Pro Planet People’ tih an ni.

Mithiamte sawi dan chuan, India rama boruak bawlhhlawh thlentu nasa berte zinga mi chu motor aṭanga bawlhhlawh khu chhuak (vehicular pollution) a ni a. He harsatna sukiang tur chuan motor kan hawl chhuah tlem a, kan chhehvel boruak tibawlhhlawh lo tur thil dang veivah nan thirsakawr hmante hi kan intihhmuh a ngai a ni. Veivahna atana thirsakawr hman uar hi kan chhehvel boruak a lo thianghlim zawk nan a pawimawhzia India mipuite hnenah a taka puangzar turin kan Mizo pa ngei, Pu Vanlallawmzuala Varte chuan zin kawng hautak tak zawh huamin a pên chhuak a, a tihlawhtling ta bawk.

A zin chhung zawng hian Aizawl aṭangin ni tin zan tin a thlen chin vil reng a ni a, a kawng zawh tur leh a riahna tur zawng zawng pawh ruahmansak vek a ni. Tum ang leh ruahman ang diak diakin a kal thei bik lo a, September thla tir vela Aizawl lo let leh hman tura beisei kha ni nâ a, November a kai ta hial a ni. India ram sik leh sa, boruak lumlet chi hrang hrang a tuar kim hle a; ei leh in danglam zawng zawng pawh a paltlang chi kim hle.

LZa hi a vannei a, a zin chhung hian buaina lian tham a tawk lem lo a, a hriselnaah harsatna a nei meuh lo. Mahse, a hriselnate endik a ni fo thung. A zin kawng chanchin, ni tin hian a kawng thui zawng, a chhuk chhoh dan leh a tlan chak zawngte chhinchhiahsak vek a ni. A zin chhuah rei zawng mai ni loin, thirsakawr a khalh chhung leh a chawlh chhung zawng zawng pawh chhinchhiah vek a ni bawk.

State leh union territory a tlawhahte hian State Pollution Control Board lamin an lo dawngsawng deuh zel a, hmun ṭhenkhatah chuan minister leh sawrkar mi pawimawh tak takte pawh hmuin, inkawmna hun ṭha tak an hmang thei ṭhin bawk. Duhsakna chi hrang hrang pawh a dawng nual a ni. A zin chanchin hi state hrang hrangah chanchinbu leh social media lamah pawh an chhuah nasa hle.

LZa zin kawnga mi pawimawh leh hlu em emte chu kan Mizo puite bawk an ni. India ram state leh UT hrang hrangahte hian Mizo kan lo awm kim ve khawp mai. State hrang hranga Mizo welfare-te’n an lo dawngsawng ṭha a, an lo chawimawi thei hle. Duhsakna hrang hrang an hlan a ni. A ṭhenin a thirsakawr an siamṭhatsak a, a ṭhenin a pheikhawk an ṭhuisak a, a ṭhenin a kawr ṭet an lo thui bawk a. A kalsan tur state-a Mizo awmte’n an ngaihven zui a, a thlenna tur state-a Mizo awmte’n a thlen chin leh a riahna hmunte an ngaihven reng bawk. A zin chhung hian khawhar lutuk loin ni tin zan tin ngaihsaktu a nei thei zel a, a vanneihthlak tak zet.

A zin chhuah aṭangin LZa ngaihventu WhatsApp group ‘All India Tour Ride to Clean Air’ lamin kawng tluanin an vil a. Anni hian fiamthu leh thutak inpawlhin thla kaw chhung, chawlh awm miah loin kawng chhuk chhoah, vûr leh ni sa karah, a chet chhiat leh chet ṭhat karah, ni tin zan tin an zinpui char char a ni ber. He group-ah hian India rama state leh UT hrang hranga Mizo awmte an kim hle a; Mizoram a lo luh hnu thleng pawhin anni hi a zin kawng chanchin leh a awm dan eng kim hre bertu an ni ta zel a ni.

LZa hi November 5, Thawhlehni hian Mizoram State Pollution Control Board leh Mizoram Cycling Association-te’n a zinkawng a zawh tawpna leh lo dawnsawnna hun Durtlangah an hmang ang a, chumi hnu tlai lamah Durtlang aṭangin Aizawl khawpui chhung tak takah kawng an zawhpui dawn a, Raj Bhavan-ah lut phawtin, Governor-in a lo dawngsawng ang a, lawmpuina hun tawi hman a ni ang. Chumi hnuah an veng, Mission Veng panpui a ni dawn a, Mission Veng YMA-te’n ropui taka lo dawngsawngin, amah lo lawmna hun an hmang leh ang.

Hetiang taka mi inpe, Mizoram leh India mai pawh ni lo, khawvelin harsatna nasa tak a tawh mek kan chhehvel boruak lo bawlhhlawh ta lutuk sutkian a nih theih nana hma latu, India ram mipui hei zozai zinga Mizo tlangval kan nei hi a chhuanawmin a ngaihsanawm tak zet a. Mizote hi hnam tlemtê ni mah ila kan duai bik lo a ni tih tilangtu a ni. Mizote chanchinah hmun pawimawh tak a luah reng tawh ngei ang le.

- Madawnga Khiangte, Rûlchâwm