Mizoramin I-League kan khel dawn!
Thil mak a thleng thut a nih loh chuan season tharah Mizoramin I-League kan khel ve dawn. Hmanni lawka Siliguri leh Golaghat-a khelh I-League second Division-ah Aizawl FC chu champion niin, season tharah chuan I-League an khel ve tawh dawn. Aizawl FC hi Aizawl Club ni mahse, Mizo tana khel an ni a, anniin I-League an khelh hian Mizoramin kan khel tihna a ni mai!
I-League chu...
I-League hi India League tihna a ni a, India rama Club Football inelna sang ber a ni. Kum 2007-2008 aṭanga khelh ṭan a ni a, tunah hian Club 11 an awm mek. India hmarchhak club zingah ‘Royal Wahingdoh FC te, Shillong Lajong FC te pawh lo awm tawhin, tunah Aizawl FC chu an tling thar ve leh ta.
I-League-ah hian Mizo tlangval ṭhahnem tak an khel mek. Hman kum lawka ‘Football hi Mizote tan eizawnna tlak a tling lo,’ tia min ṭawng-el khumtute khan Mizoramin I-League club kan nei ve dawn a ni tih hi an lo hre ve em ang chu! Ni e, mi nawlpuiin eizawn nan hman kan tum a nih chuan a tling lo alawm.
MPL to I-League
Mizorama club Football inelna ngelnghet MPL kan neih aṭanga season thumna hnu lawkah India rama club Football inelna sang berah Mizoramin Club kan nei nghal mai tur hi, MPL ngainatute tan chuan avan lawmawm em. Ka sawi zawng ringawt pawhin ka mittui a tla thei mai dawn a lawm le! Hei hian MPL hlawhtlinzia a tarlang chiang hle awm e.
MPL hlawhtlinna kan sawi dawn chuan sawi hmaih thiang lo, sawi lan tam loh tak Zonet Cable TV hi sawi lan ngei ngei an ngai. Anni hi awm lo ta se, tunah hian MPL pawh kan la nei ang em tih ngaihtuah tham tak a ni. MPL hi awm lo ta se, I-League club kan nei kher lo vang! Chuvang chuan Zonet inpekna hi kan kailawn rahbi pawimawh tak a ni.
Zonet hian hlawkna ringawt um lovin, Mizoram hmangaihna aṭangin an rawn pen chhuak a, chawi belh inhuamin hna an thawk. MPL kalpui a nih theih nan nuai 20 an rawn theh chhuak ringawt ngam a nia - chu chu season khat chhung atan a ni! Hetiang zat zat hi TV Broadcast aṭangin an hmuchhuak zo dawn lo a ni tih chu, keini mimawl ber pawhin kan chhut thiam. Chuvang chuan hlawk tumna ai chuan ram hmangaihna a lian zawk tih hai rual a ni lo.
Hei tunah pawh, Basket Ball tui miten League mumal tak a neih theih nan tiin sum leh tha an rawn theh chhuak leh ta! Hetianga ram hmangaihtu tak tak kan nei hi mipuite hian lawm nachang i hria ang u. Cable TV dang leh kan mi neinung tak takte pawh hi, ram hmangaihna rilru puin rawn pen chhuak ve zel se a lawmawm khawp ang.
Zonet sawi takah chuan tlem han belh leh hlek ila. Hman deuh, Zonet rawn lan hma kha chuan, TV connection lak hi a harsa khawp mai a. Keini pawhin connection fee-ah cheng 2000 tehmeuh kan chawi! Thlatin pawh man (monthly fee) pawh cheng 250 lai a ni hman a nih kha. Zonet an rawn lang chiah a, a thlawn vekin connection kan ti a, thla khatah cheng 200 chauh kan chawi ta - tun thlengin.
Fak phu MFA
Ka han pêng ta duah a, mahse a ṭulin ka hre bawk si, chhiartuten min lo hrethiam teh u. Mizoramin MPL kan neih theih chhan leh mumal taka kan kalpui theih chhan te, I-League club hial kan neih theih chhanah hian, Mizoram Football Association (MFA) hruaitute hi a hnar kaitu an ni chiang khawp mai. Anni ang hruaitu ṭha leh thawkrim kan nei hi Mizoram tan vanneihna ropui tak a ni.
Khelmual ṭha tak tak kan neih thleh thluah chhanah te, club ṭha tak tak a lo din theihna chhante leh player ṭha tak tak an rawn chawr chhuah theih nachhan hi, kan MFA hruaitute an ni ti ila kan sawisual tam vakin a rinawm lo. Anniho zarah hian India rama club hrang hrangah Mizo hmingpu, eizawnna atana football hmang an awm ta nual mai, avan ropui em!
I-League khelhna tlak kan ni em?
I-League khel tlak kan nihzia chu Aizawl FC-in club pariat lai inelna I-League second division (I-League qualifying round) lamah champion hmangin an lantir tawh a. Mizoram club tho Chanmari FC pawh a chungnung pawlah an ṭang; mahse, mi pakhat tan chauh hmun a awm miau si a. Mizoram club-te hian I-League khel tlak an nih zia lantir mahse, Mizoram hi I-League khelhna tlat a ni ve em?
I-League khel tur hian qualifying round paltlang a ngai tih leh, Club inrelbawlna ṭha neih a ngai tih bak chu kei mimawl hian hriat vak ka nei lo. Ṭul an tih leh a hre zawkten rawn sawi belh se. Aizawl FC hian Home Ground (mahni khelmual) atan Mizoram hi hmang dawn ta se, khelmual leh a chhehvel hmangtlak kan nei em?
Aizawla kan khelmual neih ṭhat ber Lammual-a phullem phah lah chu, Chapchar K<t nan leh eng eng emaw avangin kan chil chhe zo chu a ni titih der tawh bawk si. Mualpuia Rajiv Gandhi Stadium lah chu ‘sak mek’ tih a ni reng bawk si! A hmingah stadium tih ni tawh mah se, ‘tur’ tih bak chuan sawi zui vak hleihtheih a la ni lo. Khaw dang stadium han bel dawn ngawt ila entu mipui kan ngaihtuah tel a ngai ve bawk si - Aizawl tluka mihring tamna leh pan awlsamna a la awm lo miau a.
Entu mipui ṭhutna (Gallery) ṭhatna ber nia lang Lammual lah chu thingkung tluin eng eng emaw a lo tihchhiat leh a pitch ṭhat tawk tawh loh chu sawi loh, dressing room (players inthlakna hmun) a ṭha tawk em? Phai club leh player-te khuan competitive match rawn khelh fona tlakah an ngai ang em, tih chu ngaihtuah tham fe a tling. Ngaihtuah tur leh hmalakna tur kan van ngah em ve aw!
Aizawl FC hian Mizoramah ngei Home Ground an nei theih a nih phawt chuan, a ram pum ang zawng pawhin hlawk puina kan neih ngei a rinawm. Football leh a kaihhnawih sawisela engah mah ngai lotute khan, hei hi lo hre rawh u - Tourism Department-in mikhual hip luh tuma Anthurium Festival leh eng K<t phuahchawp emaw a huaihawt vak ai hi chuan, kan Football Club pakhat hian mikhual min hip luh sak tam zawk dawn! Kan Tourist Lodge-te pawh Footballer leh an mahni rawn ṭawiawm tute thlen nan i buatsaih ṭan ang u le!
Heng thil thlentir tur hi chuan kan hmunhma leh kan inrelbawlnain a zir a ngai. Chutiang tihlawhtling tur chuan kan mi hausa rualte rawn pen chhuak se, a van tihchi dawn em! Engpawh nise, kan ram club leh India rama club ropui tak tak (entir nan: East Bengal te, Mohun Bagan te, Bengaluru leh adt.) khelmual khatah inelna (competitive match) an khelho dawn tih hriat hi avan nuam em. He hun hi Kristianna theh darhna remchang tak pawh a ni ngei ang.
Hetiang dinhmun kan thlen theih nana tha thawhtu zawng zawng - players leh coching staff te, Aizawl FC puipate leh Pathian chungah lawmthu ka sawi e. Mumanga vawi tam tak kan lo mangphan tawh, a tak ram a chang mai tur hi awi a har zawk hial e ka ti! Aizawl Football Club kal zel rawh, Zoram mipuiten theihtawpin kan ṭawiawm ang che.