SRS fimkhur takin aw

Central YMA chuan Aizawl khawpui chhunga ruihhlo hluar lutuk ngaimawhin supply reduction service (SRS) a din leh ta. Tun hma deuh khan SRS hi din a lo ni tawh a, an hmalakna avanga ruihhlo a van zia leh a ti ṭhinte pawh an inkil­tawihzia kan hre vek ang.

SRS a din hmasak khan hna an thawhṭhat rualin, sawiselna tur pawh engemawzat a awm ngei ang. Human rights changchawia sawiseltu pawh an tam a nih kha. SRS te thil tih dan tam tak kha ka fak bik hauh lo mah se, ruihhlo avangin kan ṭhalai tam takin nunna an chan a, chung kan ṭhalaite nunna suattu ruihhlo zuartute pawng ṭan lutuk erawh kha chu fuh ka ti lo.

Tun hmain SRS din hmasak a nih ṭuma tih dik tawk loh leh tihfuh tawk lohte kha Central YMA hruaitute hian an chhinchhiahin ka ring. Insiamṭhat ngaihnaa insiamṭhain SRS hian Mizoram tan, Mizo ṭhalaite tan huaisen takin ke pen zel teh se. Mah se, din hmasak a niha sawiselnate kha enliam mai a nih chuanin hna ṭha tak ram tana thawk si hian, mi tam tak rilru tinatu an ni thei dawn a ni.

Kut inthlak hi mi­hring siamṭhatna atana thil ṭangkai ber nise chuan misual an vang viau awm e. Kan SRS te pawh hi an kut ram lutuk lo se ka duh hle. A hmaa sawisel an hlawhna ber pawh kha kutthlak chungchang kha a ni awm e. Kut inthlak lo deuh a, insiamṭhat dan a awm ngei ang. Mah se, kutthlak loh theih loh mihring chu an awm ngeiin ka ring a, chung hunah pawh chuan rilru fim tak put a ṭha awm e.

Kan SRS hruaitute hnena ka chah duh ve che u chu, eng ang pawhin kal ula sawisel phet tumtu che u an lo chhuak leh dawn tih hre reng ang che u. Fimkhur taka in kal chung pawhin, in ṭhat lohna lai leh kal dik tawk lohna lai hmuh tum ran an awm dawn. Chutih hunah chuan rilru huaisen tak puin he ram tan hian tha thlah loin kal zel ang che u.

Sawiselna zawng zawng hi zawm tur a ni loa, zawm tlak pawh a ni vek kher lo. Chutihrualin, sawiselna zawng zawng hi zawm loh tur pawh a ni hek lo. Sawiselnate dawngsawng thiam ula, zawm tlak a awm chuan zawmin, zawm tlak loh chu ngawi renga zawm loh mai a ṭhat a rinawm.

Tin, dan keng­kawhtu in ni lo tih hi theihnghilh ngai suh ang che u. Dan lekkawhtu, danin a tihbuai phak lohah in inngai palh hlauh a nge. Chutianga in inngaih hun hun chu in kalsual hun tur a ni ang. A zawng zawngah chuan dan lekkawhtute nen thawhdun a har maithei, mahse a tam thei ang ber dan lekkawhtute nen thawkho hram hram ang che u.

Ṭhalai duhawm tak takte ruihhlo avangin an tha a ṭhum a, ruihhlo avangin nunna chan kher lo mah se, chhawr tlak lohin an awm mek a ni. Chuvangin, kan ram hmelma, kan ram suattu ruihhlo hi theihtawpa kan do a ṭul tak zet zet. Kan do rem kher lo ang, mahse tih takzeta do a nih chuan ṭhalai tam tak nunna chhanchhuahin a awm ngei ang.