MAL Book of the year kha

Mafaa Hauhnar leh Lalngaihawma Khiangte te khan Mizo Academy of Letter-in kum tina a thlan ṭhin Book of the Year chung­chang an ngaihdan an rawn sawi a. A dik viau nia lan theihna chen awm mah se thlan tlak a awm loh kum chuan MAL hian thlang lo mai tura an rawn rawtna kha kei chuan ka pawm ve hauh lo.

The Pulitzer Prize te, The Man Booker Prize dawngtute lehkhabu hralh a tlak viau chhan chu award petute miin an rin em vang a ni a ti. Lawmman hi a dawng tlak hnena pek chuan a hlu viau a, mahse vawk pui rangkachak ṭhi awrh tir erawh chu thil ho tak a ni reng a ni. MAL-in kum tina book of the year lawmman a sem ṭhin hi a ṭha tawk lo titu an lo awm a nih pawhin a dikna chen chu a awm ngei ang.

Mahse, MAL book of the year lawmman dawng tlak hi engtia teh tur nge ni dawn? Lehkhabu hlut zawng kan teh­na pawh hi engnge ni chiah le?

Ṭawng khawlo ni lo se Holy Bible hi khawvela leh­khabu hralh tla ber leh mite hlut ber a ni. Mahse Holy Bible hi award kan pe emaw pe lo emaw a hlutna a danglam chuang lo a, hralh tla ber a ni tho. Lehkhabu ṭha kan tehna tur hi eng nge ni ang le?

Hman kumah Mizo sports writer pakhatin Workd Cup lehkhabu a ziak chu an hralh zo chak hle mai a, a copy hralh tam lam zawnga chhut pawhin an hralh hnem viau nghe nghe a ni. Mahse kha World Cup lehkhabu kha MAL-in a thlan ṭhin lehkhabu ṭha atan thlan tlak erawh a ni lem lo maithei; mi tam tak chu a thlawnin pe mah ila an keu peih dawn loh laiin hluttu erawh an tam hle tho a ni.

Chutiang bawkin tuna MAL-in Book of the year a thlan tawh 25 zingah hian chhiar tlak lem loha ngaih engemaw zat ka nei ve tho mai. Ṭha an tih avanga an thlan chhuah takte ai hian an thlan tak loh lehkhabu ṭhenkhatte kha kawng hrang hranga tehin kei chuan ka dah sang zawk. Hetiang hi a nih avangin kum tina thlan loh tih ngawt pawh hi a dik chuangin ka hre lo.

Khawvelin a en rawn USA President chu kum 4 danah thlan ṭhin a ni a, kum li hnuah "mi ṭha awm loh lai a ni tlat mai" tiin President thlan loh an rawt ngai chuang lo. An thlan chhun apiang kha a hunlaia a ṭha ber an ni mai a, chumi chu opposition lam pawhin theih tawpin ram kaihhruainaah an ṭawiawmin an thlawp a, an mi thlan chhuah chu khawvelin a ngaihsan an ni zel tho.

Tunah hian lehkhabu ṭha thlang turin MAL aia rintlak pawl dang kan nei lo. Anni hian tuna an kalphung pangngai hi kalpui zelin, kum tinin lehkhabu ṭha hi thlang zel se ka duh. A chhan chu lehkhabu ṭha thlan tlak a awm lo e an ti a, an thlan loh fo chuan kan writer-te rilru pawh kan tihnual thei a ni.

Mafaa chuan MAL-in vawi 25 zet Book of the Year a thlan tawh zîngah thlan âwm tak a tih 5 pawh tling mang lo ang khan a rawn sawi a. Mafaa tehna aṭanga teh chuan book of the year hi kum 5 danah pakhat kan nei hram ṭhin dawn tihna a ni a, MAL hming leh an pawimawhna hi tun ang hian kan hre lo ang a, MAL pawh hi a ding tawh kher lo maithei.

Miin theih tawp chhuaha lehkhabu ṭha tak nia a hriat a chhuah hi ṭha kan tih loh vangin lo hnawl sak vek ngawt lo ila. MAL ṭhahnem ngaihna leh an pawl inpekna hi hlutsak thiamin a aia ṭhaa kan tih theih hma chuan thlawp thiam ila. Kan ziak mi lar leh thiam tak takten an ziah peih loh leh remchan loh laia taima taka bei ṭauh ṭauhtu kan ziak mite phurna tipung zel turin a taima leh ziak peihte zingah a ṭha ber hi kum tinin thlang zel ang u.