MZP in ti ṭha e

MZP hmalakna zara document lem siamtu Police-in October ni 25-a an man, Lalneihpuia, South Vanlaiphai inti hi (a khua a sawi pawh hi a dik tak tak em, fiah a ṭha khawp mai) hmâna birth certificate siam thei intitu tho kha a ni em? A lo ni a nih chuan sawrkar hian a lo la man lo a ni maw? Nge, an bawhzui lo hrim hrim?

Eng pawh ni se, tuna hetia an man ta hi a lawmawm a, mahse, MZP hmalak hnu chauha Police an che hi chu a lungawithlak zan lo a ni. Hmana birth certificate siam thei inti, social media meuha inzuar pawh CYMA zawkin hma an la hmasa kha a ni a. Heng kan NGO ṭangkai tak takte hian hma la ta lo se, dan lova khawsa leh thil ti ṭhin hi rei tak an zalen mai ang tih a va hlauhawm ṭhin ve.

MZP-te in zahawm hle mai, in hmalakna zara sawrkar chetna in fak leh hlauh thei hi in ropui e.

Pawl leh NGO reng reng hi an pawl hming leh an hruaitu leh an memberte avanga zahawm leh, mipui leh sawrkarin an ngaih pawimawh an ni lo va, an pawl hmalakna leh hnathawh avang leh, a issue azira an thu ramin a zahsak an ni zawk tih hi pawl tin leh kohhran tin hian hre reng ang u.

Hmana pawl zahawm takte kha an hruaitute leh an thiltih avanga zahawm an ni a; kha pawl tho kha an hrauitute leh an hmalakna ṭhin leh an khawsa ziain a zir tawh loh chuan mipui leh sawrkar hian an thu leh hla kan zahsak zel a ṭul kher tawh lo va, an pawl hming pawh a zahawm reng tawh lo thei a ni. An hruaitute pawh kan dah sang vak tawh kher lo thei.

Pawl hming ropuina behchhan ringawta thil ti lo leh, tute fuihpawrh vang mai maia thil nazawnga inrawlh lovin, sawrkar hmalakna lam dodal zawng ni si lovin, kan rama thil dik lo zalen lutuk hi eng pawl pawhin han do chat chat teh u. Sawrkar leh mipui pawh hi kan huai sâwt viau a nia, thil dikah chuan kan thlawp em em zel ang che u. Amaherawhchu, eng hmalaknaah pawh dan ngai pawimawh chungin, mi dang dikna, mihring hlutna leh zahawmna zahsak zel ila.

Tuna YMA leh MZP chet vel dan hian beiseina ṭha a siam thar leh hle mai.

- K Hmingthankaia