Mizote hi nuam tâwl, hlimhlawp bâwl chi kan ni rêng em?

Fûrpui kan hmang zo a, boruak a nuam ṭan a, Mizo nawmchen hun, kût leh lawm tur chi hrang hrangin min hmuak a, Krismas boruak urlawkin hlimna leh lawmna, nawmsip bâwlna lamte pawh a lo lang ṭan leh ta. Kut fahrah te te, lawm tur leh hlimpui tur a pung leh dawn a nih hmel a. Khawnge, Mizote hlimhlawp bawlna lama kan lo kal tawh dan hi inbihchiang dawn teh ang.

Mizo hun hmasa lama hlimhlawp bawlna lam

Mizote hi kan pi leh pu hun aṭanga hnam hlim thei leh hlimna lam ngaina, nawmchenna lam ngaina ve tak kan ni a lang. Kan kut neih dan leh hman dan te, kan inneih lawm dan leh thangchhuah dan kawngte en hian hlimna lam ngaina ve ṭhin tak kan ni tih a chiang viau. Hna hahthlak tak karah, ral leh thil dang hlauh apui an ngah em em karah khan hlimna, lawm leh chen tur apui kha an nei ve viau a ni. Chawlhnite nei lo mah se ni serh leh awmni khamte pawh nei ve diah a. Kan society hrim hrim kha lungngai viau chi kan ni lo, chhiatni ṭhatnia kan inṭawiawmna kawngte en hian lungngai taka awm nuam ti lo, hlim tum tlat, hlim nuam ni ve tawk tak kan ni tih a chiang reng mai.

Mizote hi mipat hmeichhiatna lam pawh kan lo chen ve viau a ni awm e. A hranpain nawhchizuarte awm lo mah se, hmeichhe buan chak lo leh sihhnip deuhte an awm ve ṭhin a, ‘vantlang sum’ tih ṭawngkam te hial an nei a nih kha. An kut ni vangthlaah pawh mipain hmeichhiate ngaih (mutpui) phet an tum a, mi ṭhenkhat, an pasalte len bo laia mi nupuite lo pawl tum tawkte an awm ṭhin a ni awm e. Lalte khan hmei an nei ngai chiah lo va, mahse, an bawihte lo pawl duh tawkte pawh an awm ṭhin ni awmin an sawi. An nunah zuin hmun lian tak a chan dan en hian nawmchen lam nuam ti ve tak an niin a lang. Ei leh in an siam thiam loh dan en hi chuan hnam vir tak leh intuituah chiam chi erawh an ni lo chuan a lang. A hranpaa neinung deuh leh khawsa thei deuhin hlimhlawp bawlna kawng erawh an nei hran viau lo niin a lang.

Mizo hun laihawla hlimhlawp bawlna lam

Chanchin ṭha lo luh aṭanga kum 2000 hma lam zawng khan Mizote’n kan nawmsip bawl dan a dang chho ta viau a. Khatih lai rau rauah hun hmasa lamah khan Kristiannain min luhchhuah hneh chho ta bawk a, kan Mizo kutte Kristian zirtirna nen inmil chiah loa hriatna a lo awm ve bawk a. Harhna boruak, khawmpui leh lungphunte kha kan Mizo nuna kan hlimpui leh huau huau lian tham deuh kan neih chu a ni ta deuh mai awm e. YMA anga kan social function kha a nawlpuia kan intihlimna leh nuamtawl vena ber a ni bawk awm e. Krismas, khawmpui leh hlim harhna kha kan hlimpui viau mai. A rei hnu chuan kan Mizo kutte pawh mumal zawk leh felfai zawka lawm a lo ni ve leh ta a ni.

Heng hunah hian hian zu hi mi tam takin nawmchenna atan an hmang chho nasa viau. Zu in an pung a, mipat hmeichhiatna lamah pawh kan inthlahdah deuh ta viau a, nawhchizuarte hial pawh an lo awm ve ta zel a ni. Nula lama buan chak lo leh sihhnip deuhte pawh an awm pung viau a; sâwn an pung a, biak in hawng lova innei pawh kan pung viau mai. Aizawl lamah mi ṭhenkhat kohhran program duhkhawp lova Krismas dawn zan urlawkna lamah khawvel thil taka lawm tumin nuam an tawl viau a, chu chuan mi dang pawhin la chhawngin, urlawk zan chu hlimhlawp bawl zanah kan chan titih deuh ta a. Tlema inla hausa leh neinung deuh zingah party leh picnic pawh an ti ve ṭhin.

Hetih hunah hian sum leh pai lamah kan la harsat tlan em avangin kan nawmchenna leh intihlimna lam hi hmuh theih leh khawih theih thil lam a tam ber a. In leh lo ṭha neih lam te, motor neih te, thawmhnaw thar neih tih vel kha kan nuam tih leh mi dang hnena kan intihtheihna a ni ber. Ei leh in lam te, zin vah leh neih chen ral zawnga chetna lam kha kan ti meuh lo va; kan neih ang ang mi dang hmuh tura in ‘show off ’ lam kha kan uar deuh. Restaurant-a chawlh te, picnic vak te, party vak vakte kha a nawlpui chuan kan uar viau lo. Kha tih hun lai khan restaurant changkang deuh leh café leh picnic spot tih vel pawh a tlem reng a ni.

Tun lai huna hlimhlawp bawlna

Khawvel hmasawnna a pung a, inbiakpawhna leh inhriatpawhna awlsam hian thil hrang hrang min rawn hriattir ve zel a. Hlimhlawp bawlna kan zawng a, kan che hlek a, a hlimawm zawnga thil tih phet kan tum ta zel. Kohhrana kan chetna pawh a hlimawm tur hlirin kan ti ta zel a, inkhawmpui leh hunpui a piangin photobooth kan siam ta zel a. Kan chet velna reng reng hi status tuakna a ni ta vek mai e. Kut ni se, kut pakhat kan lawm ṭhin kha tunah chuan a pathuma lawm vek kan tum a. Chu bakah, tourism tih larna changchawiin kut phuahchawp hrang hrang kan siam a, kan rama awm sa thil pawh ni lo, kan thil lak luh ho chawi larna kut fahrah te te kan nei ta fir fer a. Heng karah hian sorkar scheme tihhlawhtlinna turin mela, fair tih vel thuartham nen kan ri bung bung bawk. Hlim hi tunlaiah chuan kan hna ber a ni ta a ni e.

Kan inneihnate lah chu inneih hma aṭangin kan party a, inneih hautak thei ang berin kan ti a, inneih zawh party-in kan khar leh vel a. Naupang birthday ni se, lawm sak vek kan tum emaw tih tur a ni, ui birthday thleng hian ka han lawmsak chu a nia! KṬP programme pawh member hla hnuh hnaihna changchawiin intihlimna lam, a huau huauah ka kal ral mek a. Chaw nghei zawng te, thâ thawh zawnga hnatlan lam erawh kan ti fumfe thei ta meuh lo. Mizo ṭhalaite hian nawm loh hi kan hlauhzia chu, veng tin hian ruih hi hna bera nei, nileng zankhuaa rui thei hi tam tham tak chu kan nei vek awm e. Hei hian Mizote hi nawmchen hrat, nawmsipbawl lama kal nasa tak kan ni tih a tilang. Zirna inah pawh lawm apui leh function apui a tam a, kan ri bung bung reng mai chu a nih hi maw.

A nawlpuiin kan khawsak a lo zia ve ta deuh a, tun hma lama khawih theih, hmuh theih hmang chauha nawmtualna kha kan kalsan ve zel a. Ei leh in zawng, neih chen lam leh inhlim chhuahna lamah kan kal nasa hle a; restaurant leh café changkang deuh pawh a pung nasa. Party leh picnic lam kan uar a, picnic spot leh nawmchenna a pung nasa a, kan neih ang ang tlan zawh mai pawi ti vak lo ṭhalai pawh an pung nasa viau a ni. Tun hma lama kan aur ngam loh chhungkua emaw ṭhian za ho emawa zin pawh kan uar ve ta viau a; World Cup pawh a hmun a en theih pawh kan pung viau mai. Heng zawng zawng en hian nawmsip bawlna lam hi chu kan uar ve zel niin a lang.

Kan tunlai dinhmun en hian kan ramah hian a nuam ringawt zawng, hlimna ringawt zawng kan tam ta hle niin a lang. Hetih karah hian mi ṭhenkhat lah chuan mi tihhlimna tur thusawi ‘motivational speech’ tihte hi kan uar thar a. Khawi laia sap thufing leh ṭha hmangin kan nihna bak bakin thu ṭha min barh a, tlema nikhua leh fel deuh chu ‘motivational speaker’ kan ni ta vek maw tih tur kan ni. Chung ho chuan thu ṭha min fuih vak vak a, mahse, a tak taka kan dinhmun erawh beidawnna lamah kan liam mek si a nih hi. Hlim kan tum a, hlimna lam zawngin kan hmuh hmuh kan ti a, a ṭhen ruih theih thil lamah leh mipat hmeichhiatna lama an tlan a, a ṭhen Pathian thu pawm nuam lamte an hawi bawk nen. A ram pum hian hlimna, lawmna lam zawng hian kan phe suau suau a ni ta ber e.

Hlim hi a ṭha e, lawm pawh a ṭha; mahse, tun dinhmuna Mizo nun en hian hlim kan tum lutuk hi kan buai ta zawk mah em aw tih theih a ni. Thil lawm te, kûtte pawh hman a ṭha e, mahse, tuna kan kalpui dan hi chu a uchuak ta mah mah em? Kan ram hian hengte hi kan mamawh ber em tih hi kan inen lêt a hun ta viau mai. Mizote hi huau huau lawm ve tak hnam kan nih avang hian kûtte pawh kan neih sa bak emaw, siam belh chiam loh hi a ṭul viau mai. Heng hlimna kan tihte hi kan nun kawnga sual min daitirtu, kan hmasawnna lam aia hnungtawlhna lama min hruai theitu, kan rinna kawnga min tihnungtawlhtu a nih theih avang hian hlimhlawp leh huau huau lamte pawh hi kan uar viau lohte pawh a ṭul ta viau awm e. 

- Dr. C. Lalengkima