Zu zawrh vangin kan buai lo
Mizoramah March 16, 2015 aṭangin Mizoram Liquor Prohibition Control Act, 2015 hmangin zu kan zuar ve ta a. Kohhran leh pawl ṭhenkhatten an helh em em aiin kan lo buai hauh lo tih a takin a lang a, zu zawrh hma ai chuan zu in erawh an tam mai thei a, mahse ram huapin kan buai lem lo e.
Zu zawrh hi a ṭha ber kher lo a, an zawrh loh vang emaw, an zawrh vang emaw-in kei chu ka buai lo a; buaina lian tham a awm bawk lo. Tunah hian kan corporation Millennium Centre-ah hmun li-ah ZIDCO, MIFCO-in pahnih leh mimal pakhatin an zuar a, New Market building-ah MAMCO-in an zuar a ni. Heng zu zawrhna hmun hi a lun hle a, card nei tan pawh intlar fe a ngai a ni.
Sorkar hian khuahkhirhna dan a zam hnuaiah zu hi engvangin nge a zawrh? tiin mi tam tak chuan an hrethiam lo a, an hrethiam thei bawk lo. Keia hmuh ve dan chuan zu chi hrang hrang hi kan rama in an tam em em a, zu ṭha pawh hmuh tur a awm lo a, a in ṭhinte an khawngaihthlak em em a ni.
Phaiah han zin ila, Mizote kan mualphona tam ber chu zu a ni tlat. Kan rama kum 1985-a kan zawrh kha titawp loin chhunzawm ta ila chuan rualawh a awm lo ang a, zu pawh kan ngaihlu em em lo tawp ang. Mahse kan khuahkhirh a, zu ṭha lei tur a awm miau loh vangin Mizote kan mualpho em em a ni. Hei hi kan sawkhaw rawngbawltute hian an hmuh hmaih nge an hmu ṭha duh lo tih erawh zawhna lian tak a ni.
Chuvangin kan sorkar hrawn mekin kohhran leh pawl ṭhenkhat dodalna nasa tak karah huaisen taka zu a zuar hi a fakawm a, hei hian zu avangin kan state sum tak tak, chhiah laklet leh awm si loa a luangral hi a ti ziaawm hle a ni. Tunah chuan dan dik takin zu an lei a, sorkar pawhin chhiah ṭhahnem tak a la tawh a, hei hi sorkar ang pawha sum lakluhna ṭha tak a ni.
Nitin Aizawl khawlaiah, hmun kilkhawr leh ualau laiah kan vak ve ṭhin a, zu zawrh tak avangin harsatna leh buaina a vang khawp mai. Chuvangin zu zawrh avangin kan buaina a tam em em lo a, kohhran ang pawhin buaina lian tham, rawngbawltu an rawngbawlna aṭanga chawlhtir tak pawh sawi tur a la awm loin ka hria.
Tin, veng tam takin an venga an zu zawrh an phal loh laiin Dawrpui Vengah chauh zu zawrh an phal hi a veng ang pawhin an fakawm tak zet a ni.
MNF local council dinnaah phei chuan zu zawrh an do fur mai hi politics ngaihtuahna tenawm tak a ni.