Assam Rifles sawn chhuah politik

Tun hnaia Chief Minister Pu Lalduhoma Delhi zin hawin Aizawl khawpui aṭanga Assam Rifles-te Zokhawsanga an inzawh chhuhna turah Mizoram GAD hotute leh Assam Rifles hotute'n New Delhi-ah agreement an ziah thu a puang a. Mizorama mi tam tak chu an phu suau niin a lang.

Assam Rifles-te insawn chhuahna turin agreement ziah a ni ta hi a lawmawmah han ngai phawt ila. Eng ang taka rintlaka rintlak loh nge tih erawh hriatthiam a la har rih. Insawn tak tak turin Zokhawsang lam hi peih fel thlap a la nih lohte ka ring deuh ngawt a; chuvang chuan insawn hun tura an tih hi an pelh leh tho ka ring deuh a. Chuvang chuan agreement hi eng ang taka rintlak nge tih hriat thiam a har ka ti a ni.

Assam Rifles indawnna tura agreement ziah a nih avang hian mi tam tak chu an lawm viauin a rinawm a. Chutih laiin, opposition party te, a bikin MNF ho chu an lawm lo mai ni lovin, pawi an ti zawk hial mai thei a ni.

A chhan chu, ram leh hnam tana thil ṭha tih te, hmasawnna hna chak taka thawhte hi opposition party-te hi chuan an party an sawrkar laia tih a nih loh chuan an lawm ve hlei thei tlat lo mai a, thil ṭha tak pawh ni se, sawiselna tur hi an zawng reng mai ṭhin. Tunah pawh opposition party ṭhenkhat chuan agreement ringhlel zawngin thu an sawi mek a, social media-ah thu an thehdarh mek bawk a; mipui thinlungah rinhlelhna tuh an tum vang a ni.

Hetiang rilru hi political party mi leh sate khan paih teh u khai. Ram leh hnam hmangaihna thinlung a ni lo; a ṭhing uih tlat. Assam Rifles sawn chhuah politics hrim hrim hi bansan rawh u, inthlannaa chak leh chak loh hriltu a ni lo. Sawn chhuahna turin thui tak a kal tawh a, a kal bek bek ang a, an insawn chhuak ta tak tak a nih pawhin, tute sawrkar lai pawh ni se a ṭha vek mai.

A hrim hrimah, Aizawl khawpui aṭanga Assam Rifles sawn chhuah hi a ṭhatna tam tak a awm ang a, mahse, Mizo mipui rilru sukthlek ngaihtuahin, insawn chhuak vek ta lo pawh ni se a pawi teh chiam lo thei ve tho.

Duhthusamah phei chuan insawn chhuak vek lo se, kawngpui zauhna atan an ram ṭhenkhat hi mipui tan pe se, Lammual pawh hi Mizoram sawrkar kutan hlan se, a tawk viau zawk mai thei. Thil hrang hrang ngaihtuahin khawpui lailia an awm hi a ṭhatna chi hrang hrang a awm ve tho tlat asin.

- Laldinthara