KAWNG LIAN SIAL TUR TIH ṬHUANAWPA AWM RENG MAI HI

Motor pali ngawt thâwl taka tlan theihna tur, Vairengte aṭanga Sairang thleng nuamsa taka kan tlan zar zar theihna tur, Central pawisa veka siam tur, mi ramin hun rei tak an neih tawh, kan awh ve ngawih ngawih chu kum thum zet tih khawtlaiin a awm ta.

A em em deuh tawh lo maw?

He kawng ropui tak lo awm tur hi a lawmawm tehreng nen, sorkar hian phur taka lo nawr vat vat a, a chak thei ang bera hna lo thawhpui a ngai tawh lutuk asin. Hetiang development ropui lutuk kan neih ve tur hi a chak thei ang bera hmalak kan mamawh laiin, hmalakna awm thei lovin, kawng lai tur contractor-te’n hmanraw ropui leh man to tak tak an rawn chhawp rup tawh a, chung hmanraw thar ṭha pui pui chu an dah khawmte pawh hnim ṭovin a zâm hnan lûk tawh mai. Chung contractor lungawi lo chuan Mizoram sorkarah an pawisa hloh tam lutuk tawh avangin pawisa chawitir an tum tawh hial a ni.

Tu nge a kaikuang?

Technical thil kan hre thuk ve lo, kan hriat thiam ve tawk chu–compensation lak inchuhna a ni ber mai. Kawng siamin a paltlang tur ram neitu nih inchuhnaah hian tu nge thiam zawk tih lam ai mahin, insawiremna lama hma kan lak vat loh chuan hna a thawh theih dawn loh a ni mai. Mimal ram nei leh in/in hmun neite’n hun rei tak ata an ram anga an lo neih tawh chu Forest Department-in forest reserve area a ni e an ti mauh mai si a. Hna thawktu company lamin compensation double pek an duh si lo va, hna thawk thei lovin kum thum zet kan ram development ropui tak kan neih ve tur chu tihṭhuanawpin a awm ta.

Zah nachang hriat a hun

Kan mutân chu compen-sation lak inchuh vang a ni ber a, compensation lak duhna hi ram hmasawnna tiṭhuan-awptu lian tak a ni reng mai.

Ka sawi chhuak leh dawn, hmânah PWD hotu lian pakhat thusawi sawi kha sawi nawn leh ka duh. Thingtlang khaw pakhatah kawng an laih dawnin pawisa nuai 500 chauh an nei. Compensation an pek chuan an pawisain a daih dawn si lo. Khawtlang pa ho an ko khawm a, compensation an ngiat loh theih chuan an khuaah motor kawng a lut vat dawn a, an ngiat erawh chuan an pawisain a daih dawn lo a, an khuaah motor a lut har dawn a; compensation ngiat lo mai turin an ngen. An ngen ang chuan an inrem a, an sum neih pawh an hmang chuang hial. An hman chuang zawng chu ram neitute tlem tlem an sem thei. Tunah chuan an khuaah motor a lut thei tawh.

A sawi zel dan chuan, compensation lak theihna turah hian ukil ho hian hma an lo la zung zung a, pawisa an dawn vena tur a nih avangin mipuiah hma an lo la vat vat ṭhin a, kan kal khalh hman hlauh a, hna kan thawk thei chauh a ni, a ti.

Ka ṭhianpa ukil pakhat hnenah ngam deuhin, "Compensation-a sum lak ve in tum vang hian hmasawnna in tiṭhuanawp ve tho asin," ka ti a. Ani chuan, "Mipuiin an chanvo chu an hmu tur alawm, hma an la thiam lo va, kan pui mai a ni," a ti. Thu dik ni ve tho si-ah hian hmasawnna tiṭhuanawp khawp chu a awm ve tho hmel.

Kan duhamzia chu maw…

Kan ṭhianpa surveyor-in a thil tawn ngei min hrilh; hmun danga highway laih mekah compensation buaipuitu pakhat a ni. Ram neitu pakhat chuan a ram survey an neih hma lawkin thlai a lo phun chawp vel a, a thlai phun chu a hnah vuai lo mah se, ka ṭhianpa chuan a helper a tir ru a, a tawlhthluktir a, an thlai phun chawp chu a tawk hlek a, a inphawi nghal ta mai, an man chhuak ṭeuh niin a sawi.

A sawi zel dan chuan, “Compensation lak tur a awm tih an hriat hian mi hausa tam tak chuan ram neitute hnen aṭangin ram an lo leisak a. An ram chhunga kawng laih zawha ram la bâng chu a ram neitu hnena pek let leh an intiam a, chutiang chuan ram zau tak tak an lei pawp pawp mai a ni,” a ti. Sumdawn nan an lo hmang tihna a nih chu; hahthlak tak a ni.

Engtin nge ni ta ang?

Ram hmasawnna lian tak kan neih tur hi engtikah nge hmalak theih a nih ang? Kan sorkar pawh hian a chunga officer thusawi ang khian, inremna siampui dan a zawng tawh em tih ka hre lo. Tihtakzeta hma a lak loh chuan kum tam tak kan nghah a ngai dawn. He thil hi kei chuan ka nghakhlel tawh lutuk a, ṭawngṭai subject-ahte ka thawh tawp tawh. Kohhrante pawh hian ṭawngṭai honaahte hian i dil ṭhin ang u. Ram hmasawnna tur lian tak tihṭhuanawpa awm hi kan vei tlan a ngai a ni.

- Lalrinliana Colney