Hlauhthawn ruk ka nei
Mizoram politics kal dan ka en hian hlauhthawn ruk ka nei a, ka hlauhthawn hi a thleng ngei dawn ti ngam lo mah ila a thleng thut thei a, kan inven lawk theih nan thiam ang angin ka han sawi chhuak ve dawn ang e.
Mizoramah hian political party zingah ram leh hnam hmangaih lo an awm ka hre lova, politician-te aia ram leh hnam tana inpe zawk, tha leh hun seng tak hi an awm lo ang. Kan politician-te ram leh hnam hmangaih lovah kan chhuah ṭhin hi kan tidik lova, ram leh hnam chu an hmangaih a, an kal dan a dik tawh lo tih hi kan sawi dan tur a ni zawk awm e.
Ka thusawi tifiah turin heti zawng hian han sawi leh ta ila. Pathian thua kal sual kan tihte hi Pathian thu duh lo ni lovin Pathian thu duh leh lutuk zawk an ni a, Pathian thu an duh luatah a dik lo thleng thlengin an dai ta a, a tawpah phei chuan kohhran hial an chhuahsan a, a ṭhente chu kohhranin a hnawhchhuah ngaiin an awm hial a. Heng an tih chhan hi a tirah chuan Pathian thu an duh lutuk vang zawk a ni.
Politics-ah mi a luh duh tawh hi chuan lut ve ngam si lova a him chin aṭanga ngaihdan lo sawi ve vak vakte ai hi chuan ka dah sang zawk daih a, ram leh hnam an hmangaih tih hi ka pawmpui thlap mai. Heng ram leh hnam hmangaihtute hian kal dan an thiam tawh lo zawk a, dik nia an hriat hi a dik tawh si lova, kan ram pawh heti hian a awm ta a ni.
Congress leh MNF sorkarna hnuaiah kan awm tawh a, ram leh hnam tana lalṭhutthleng pawh kian ngam Chief Minister kan hrawn tawh a, kan dinhmun chu tuna mi ang vel hi a ni. Ram leh hnam tana mahni future pawh thap ngama ramhnuaia silai nena chhuak tawh pawh kum 10 a CM tawh a, a hunlaia thil awm dan chu kan inphunsiak a ni. Tuna politics huang chhunga lut midangte pawh hi mipui chuan kan ring vak tlat lo, a chhan chu an politics khelh duh danin a zir tlat lo a ni.
Tun ang zela kan kal chuan kan ram politics hmabak hi a thim a, kan politics system hi kan thlak loh chuan kan hmabak hi a thim. Chu inthlakthlengna ṭha thlentir theitu chu NGO leh pressure group ni lovin political party thar din law law emaw, political party nghet sa ten an hotu lu an thlak ngam hi a ni.
Hotu an thlak chuan an mi leh sate hi chu kaihhruai theih tak an nih ka ring a, hetianga kan tih ngam chuan kan hmabak thim awm tura ka hlauhthawn ruk hi leadership change hmanga siam ṭhat theih a la nih ka beisei ve reng tho a ni.