Khawilam kawng nge i zawh dawn?

Tunhma aṭang tawha Mizoram-a result chhuak in ngaihven a hlawh ber ṭhin chu HSLC leh HSSLC a ni. Tunhnaiah pawh MBSE in HSLC leh HSSLC result a tichhuak leh a, HSLC-ah zirlai exam mi 17,157 zinga 11,719 an pass a, Pass percentage chu 68.30% niin HSSLC-ah zirlai exam 10,174 zinga 7,583 an pass a, pass percentage 74.53% niin kum dang zawng ai pawhin result hi a ṭha a, a lawmawm takzet a ni.

Kan fate hlawhtlinna avangin nu leh pa te kan lawm a, khawtlang pawhin a ti ṭha fal te chawimawina hun buatsaihin media lam pawhin kan 'cover' ṭha thawkhat viau. Hei erawh nu leh pa te'n kan fate kan hriatpui a pawimawh - class X leh XII-a result ṭha tak neih ringawt hi kan fate tan hlawhtlinna a la ni lo tih hi.

Thufing chuan, A bul ṭan ṭhat chu a chanve zo ang' tiin min hrilh a, zirna lamah erawh a bul ṭan ṭhat ringawt ai chuan a hnu kharna hi a pawimawh ber zawk chu a ni tih kan hriat a ṭha hle. Result ṭha tak hlawhchhuak chunga HSLC leh HSSLC kan paltlang hi a lawmawm a, mahse school life ang tak taka in khuahkhirh theih lohna College kan dai ṭan anga, chutih hunah chuan 'intlansiak' kawng chu kan zawh tak tak ṭan dawn chauh a ni tih hi zirlai te'n kan hriat a pawimawh hle. HSLC leh HSSLC a pass ṭhat hi a pawimawh tehmeuh a, intlansiakna kawng kan zawh tak tak hunah erawh UG/PG a kan dinhmunin mite bengah thu a la sawi ring zawk dawn tih hi theihnghilh lo ila.

Zirlai pass zo ve rih lo te tan pawh hei hi an inhnemna ni rawh se, HSLC leh HSSLC fail vang maia beidawng thiang an ni lo tih hi. Beidawn phah ṭhak na tur khawp chuan a la 'tenau' lutuk a, chona in la hmachhawn ṭan dawn chauh tihna zawk a ni. HSLC leh HSSLC chung lamah hian hlawhtling tura ke penna tur tam tak a la awm a ni tih hriain 'fiahna' hmasa paltlang zo lo mah ula, theihtawp chhuah ṭauh ṭauh ula, a tirah bul ṭan ṭha lo mah ula zirnaah chuan a tawp khar dan thiam a pawimawh ber tih hria in beidawng suh u.

Nu leh pa te pawn a bik takin HSSLC zawhah kan fate tan an kawng zawh tur kan thlan pui thiam hi a pawimawh takzet a ni. In ṭhenawmpa fapa in engineering line a zawh vang ringawtin i fanu chuan chu kawng chu a zawh ve kher a ngai tihna a ni lo. In fate theihna leh thiamna hrechiang ula, beidawng lova a tawp ṭha taka an khar theihna tur kawng thlanpui rawh u.

Zirlai te pawn kan zir zawh huna 'sorkar hnathawh' rilru ringawt pu in lehkha zir lo ang u, zofa te zingah line danglam tak tak tun hma chuan eizawnna atan an hmang ṭhin ang tih pawh kan ngaihtuah thiam phak loh game designing leh aviation lam thleng pawhin eizawn nana hmang sawi tur kei ngei pawhin ka hre ve ta nuk mai. Mi hnuaia eizawng tlak khawpa mithiam nih ai chuan midang ruai thei khawpa ngaihtuahna seng thiam nih pawh a pawimawh viau. Nu leh pa te'n kan fate theihna thlir chungin lehkha zir zawh hnua beidawng mai lo a an eizawnna kawng an zawh nghal theihna tur zirna lam hawi zawnga kan rilru kan sen pawh a ngai viau a ni.

A tawp berah chuan HSLC leh HSSLC pass zawng zawngte ka lawmpui che u a, bul in ṭan dawn chauh tih erawh theihnghilh lo ula, hlawhtling zo ve ta lote pawn in tan 'fiahna' kawngkhar a inhawng ṭan ve chiah a ni tih hria ula, chona hmachhawn chungin a hma aia tamin ke pen ula, beidawng hauh suh ang che u.