YMA fimkhur zel se

Krismas leh kumthar vuakvetah sualna chi hrang hrang a inlar ve ṭhin a, heng hunpuiah hian sualna veng turin sorkar leh YMA-te'n theihtawp an chhuah ṭhin a, a lawmawm khawp mai.

Sorkar hi YMA emaw, VDP emaw tel loin sualna veng tur hian a che hleithei bik lo a, an chet chhuah a ngai fo ṭhin. Veng tin leh khaw tinah YMA an ṭangkai em em a, ṭangkai zel tur pawhin beisei ila. Nunau himna ngaihtuah zel bawk ila a lawmawm ngawt ang.

YMA hi an ṭangkai em em a, chutihlai chuan, kuang lo nawr tia kan sawi ṭhin angte hi a awm ve fo mai. A bikin thingtlangah hetianga thu nei ber ang hi an awm ve fo. Kawngpui tlangdungah YMA flag nen YMA-a inhmang regular lem lote'n hrui pawta lirthei kal an lo check ve fo erawh hi chu a ṭul lem lo.

Silchar kawngah phei chuan mit lo len deuh erawh a ngai a, tunah hian sorkar leh Central YMA ṭangrual chuan Krismas vuakvetah puak thei chi hrang hrang a khap a, hei hi YMA ang pawha vil a ngai viau dawn a ni. Chutih laiin, lo intihthu lutuk erawh a ṭul lem lo mai thei. Sorkar mi rawih Police leh Excise-te dah pawimawh a, case siam tur pawha sorkar rawih an nih vangin an thu leh hla ngaihchan thiam a ngai ang.

Mizoramah zu kan khap a, chutihlai chuan state ṭhenawm te, Bangladesh leh Burma lam aṭangin a rawn lut reng a, state sum lak luh awm bawk si lo, Mizo mipui sum kal ralna lian tak a ni. Chutihlai chuan a lut reng bawk si a, YMA duty-te'n an lo check ve chiam erawh a ṭul lem lo bawk. Excise leh Police kuta dah thiam a pawimawh hle a ni.

YMA kan nih avangin dan kengkawhtu kan ni lo tih hriat fo a ṭul ngawt mai. Veng leh khaw hrang hranga misual emaw, drugs zuar leh addict an mante hi kut lo thlak chiam tur a ni lo. Ruihhlo leh pawi dang khawitu kan hmu a nih pawhin 'man' tih hming pu chiah lovin lo hrêng se, Police emaw, Excise lam emaw kovin a rang thei ang berin an kutah hlan ṭhin se a ṭha berin a rinawm. Hmingchhiatna leh mualphona lamah a theih chen chenah inven a ngai e.

Hetihlai hian, hmingchhiat leh mualpho hlauh lutuk leh venthawn neih len lutuk avanga sual donaa hma lak ṭhat ngam loh erawh YMA hian a duh tur a ni lo. YMA hi ram leh hnam ṭhatna leh himna tura ding a nih angin sual donaah hian an râlbân a rem bik lo. Sual donaah an thawh hlawk a, sorkar tan an hlu em em. An hlutzia hi sorkar leh sorkar department-te pawhin an hriatthiam a ngai a ni.

- Lal Rinmawia