MPSC hian puih a mamawh

Mizoram Public Service Commission-in exam a buatsaih a, candidate an tam deuh hlek hi chuan exam result hi a chhuak har thei em em mai a; an history aṭang ringawt pawh hian a hriat. Tun hnaia an dinhmun lo thlir ta ila, exam hming leh written exam aṭanga final result puan ni inkar rei dan hetiang a ni.

MJS Grade-III (4 months)

Forest Ranger (3.63 months)

MES AE/SDO (5 months)

Grade-V MFCS/CAS (5.51 months)

Group B gazetted. Combined (3 months, result an la puang lo)

MES Combined (4 months, result an la puang lo)

Group B technical paper awm lo chin hi chu gazetted/non-gazetted pawh ni se, subject bik awm ang chi a nih loh hi chuan syllabus pakhat hi ring ila; English, Reasoning, Maths and GK hi ni tawp mai se. (Ads an chhuah apiang hian syllabus hi ti tel nghal se a awlsam mai bawk maw le; URL dah vel duah khan zawhna in dawng tam mai mai MPSC-te u.)

Kar hmasaa mi, examination duties chungchanga MPSC-in memo an rawn chhuah kha. Exam hi paper a tam thei em em a, ni 2/3-te a ngai a, darkar 3 a la ni pawp pawp zel bawk si. Hun a heh a, a efficient lo em em bawk. A chunga no. 1 ang hi chuan ni khatah paper a zawh vek theih dawn. Cost, time a cut dawn. Invigilator-te pawn an hna an kalsan rei lo deuh ang.

Descriptive ang chi hi awm lo thei se a ṭha ber, cost & time cut tur chuan (non-tech aw). MCQ vek hi ni thei se. Risk dik maw? Negative marking introduce mai tur a ni; tawngpawng risk kha a theih tawh dawn loh. Long answer, essay tih vel check-tute hi MPSC hian time constraint hi a siamsak vak lo emaw ni?

Hman nia AAO/AAAO exam an conduct dan mawlh mai kha a ni aspirant tana luhaithlak chu. Detailed syllabus kan dil sup sup pawn RR vel chhuanlamin min han pe duh miah lova maw le! MPSC hi apex recruitment body a ni a, MSSSB thil tih kha a relevant tawh lo. Anni Ads lo tihchhuah kha an improve tur zawk a ni dawn lo em ni? MSSSB-in AAO exam (2022) an conduct leh MPSC-in AAO (2024) hman nia an conduct question inan lohziate kha! Detailed syllabus an siam loh avanga confusion tamzia kha! An GK question scandal kha chu sawi thui lo ila, mahse, Mizo section a awm lo te, Computer Knowledge a awm lo te, Reasoning kawng bo te; a mak thlawt a ni, apex body tih atan chuan.

JE exam tura Mechanical Engineering syllabus an lo tih tel hmaih te, informal taka candidate-te hnena vernal-a (phone call) diploma holder chauhin an exam theih thu hrilh te, chumi hnua application letter ruala diploma certificate thil tel tur tih te, chu pawh hard copy lehnghal. Khaw nge e-governance?

Kum danga JE recruitment-a BE/BTech-te’n an exam theih laia tun ṭuma application leh fee an accept pek vek tawh hnuah, graduate engineer-te’n JE post an exam leh thei si lote hi eng nge a awmzia? JE post BE/BTech-in an exam theih lohna state awmchhun kan nih mai hmel hle mai. Diploma aia BE/BTech, JE post atana an duh zawk chhan hi induhsakna vang a ni zawk lo maw? Association hma la chak deuh an awm a mi?

Mizoram state zau lo tak, kum 2024 kum laihawl vel aṭang chauha district tina exam centre an function chho ṭan dawn vel chiahte hian kan la backward zia a tilang. Chhim lam unaute sawn vawi khat exam-ah cheng sang chuang an rawn inseng ṭhin a nia aw. Security concern chhuanlam dawn se, Commission awm chhan alawm khami check a, exam ti-secure tur khan! A va hahthlak ṭhin em!

Constitutional body an nihna laia immunity an neih vang nge, hetiang em ema incompetence, recklessness a awm chho zut zut mai hi. Rin ai hian an nawi ru riau mai nia. Hman aṭangin an lo nawi tawh a, a langsar ta mai chauh nge, an nawi thar ta thut zawk?

- Pahpoong