RAMRI TITI

Inrawlh ve sek ila, tute emaw tan zawng ka ninawmin ka hnawksak fu in ka ring. Kan au laklawha hmuh leh hriat a lo awm ve ṭhin si, a tuipui chauh a kotlangah lo dak mai teh u. 

Home Secretary berin "Assam ramah IR kan dah lo, Mizoram chhungah kan dah" a tih hnu lawkah Saihapui V leh Vairengte Auto Stand aṭangin IR Duty te Vairengte lamah sawn chhoh an ni ta mai hi MZP chuan an hrethiam lo hle a, 'Mizoram chhung' an tih hi a danglam leh ta em ni an ti hial pawh hi a âwmna chen a awm. 

MLA 12 laiin Inde­pendent MLA pakhat an hek rawn lai khan "CM chuan a hre ve maithei" an ti deuh chauh tawh a, hre chiang lo awmin a awmzui pawh a ni maithei. Tawtawrawt hlir ham a ni zui ta bawk si. A hâmtu awm ngeiin ngai mah ila, tawtawrawt chauh a hmuh theih lawi sia. 

Tunah ramri buaiin kan buai a, thisen a luang a, chutih laia IR te duty na hmun aṭanga withdraw an nih thu MZP ten CM hnenah an thlen chuan "He thil thleng hi ka lo hre hauh lova" a lo ti thei mai hi thil mak tak a ni. 

IR te Vairengte lama an hnungtawlh chungchang hi Home department lam hian lal ber, CM hi hriattir ṭul an ti hauh lo nge, a ni ber thutlukna tel lo leh hriatpui hauh lovin thil an ti zawk? Chutih rualin hmai phih nan a hma ang bawkin a thawhpuite mualpho theihna ngaihtuah lek lovin hre lo nih a chuh zawk? 

Hemi pahnih hi a nih loh chuan ramri hrul buai mek hi a ngaihven lo hle tihna a ni thei ang. 

Mipui kan fing ve hle tawh tih a hriat theih a, a bungraw neitu zawk hian an tuar fe ve tho tih hriain nghei pawh huama anmahni leh anmahni thiam taka chotuah ve thung dan tur 'game' kan khel ṭan a, MZP pawhin mipui mar dekin chumi tum ran chuan hma an la ni-ah ka ngai - ni 3/4 chu liam leh se sumdawng lian leh a vaichhe ho inkar boruak a chhe viauin a rinawm tawh. 

Chumi inkar lek tlak­chham chu ṭum dang ang lo takin Mizo mipuiten kan huamin ka hria. 

Mahse MZP leh Sorkar thlirna a intawk fu lo leh a, mipui mar dek thiam zawk Principle chu rahbeh a ni leh ta. Assam lam hian rawn luh an mamawh hle tawh a, sumdawng lian thiltitheite sorkarah an che hle tih a hriat a. Escort hmangin an rawn lut a, Lailapur vaichhe ho dâp bang mai maite chu an ṭhiat awlsam em! 

Mahse ngaihdan in­persan tak vangin induh leh zahawmna vawng ve tlat thei kan nih lai tak chu a thamral leh ta. 

Minister pakhat chuan  vai Police Arsi bel (SI or Inspector) pakhat chu a zu bekbawr a. Kan Minister hi a vai ṭawng thiam loh emaw, a sap ṭawng nâl lohah emaw hian ngaih hniam tur leh dah hniamna tur ka hre hauh lo.

Kha police kha direct a be dawna a ṭawng kha lehsak a ngaih chuan 'ti rawh' tih zel ngai lo khan lo leh sak zar zar awm tak. Ti rawh a ti zel mai kha a khawngaihthlak lek lek zawk a ni. A zuitute-ah khan a thusawi lo ngaihvena vaipa hnena lo sawi par par thei zel, 'ti rawh' tih chawp ngai lo awm se a ṭha ngawt mai. 

Engpawh nise khalai vai duty hnena, lu la hnam kan nih thu te, hnam huaisen kan nihzia sawi khan a thleng thui viauin a rinawm lo. Minister chuan a chukna tur level deuh a awmin a hriat a, kha vai duty khan an Minister te chu a hmuh hian a hmu khât dawn nasa si! 

Kan rik hulh hulh laiin Home changtu ber hi a hmunah a lo la kal reng reng lo tih hi MZP thuchhuah aṭangin a hriat theih. MLA thawh hlawk vak lo a tei ve sek, hliam tuar zat phuah belh duh rum rum te ai chuan a thlengthla hmasaa ṭan awm tak a ni a, a sipaite pawh fuih phur a, ralkhata rorel mai lova kan hmuh zin ber tura kan ngaih kan duh khawp lo deuh ṭhin pawh hi a âwmna chen a awm. 

'Thuruk ti na na na ka la zawt bik lo' tia House a CM-in ramri chinfelna thuruk a hriat thu a sawi chungchang a tarlan hi zawt ru deuh de de tawh mahse a pawi viau em maw ni le, kan buai sia! 

Raju Truck tal kha chu chhinchhiah a, dan chah dan a awm lo maw, a thlalak vawrh darh vak vak ringawt lo hian. A dawr loh hram dan te pawh ngaihtuah ila...