Chelhtute

Zoram thar din tur hian huaisenna hi a lo va pawimawh em aw! Mahni ram chu kan pi leh pute khan lu chhum bân chhum huamin an sât kaw ve zêl ṭhin kha a ni a. Pasalṭha thisen luang zarah Zoram hi a lo ding chhuak ve fo tawh, piallei thuah riat aṭang khan rawn tho leh ni ta se, an ram chhan takah hian an lung a awi kher ang em le?

Thuneihna chelhtute hian kan Zoram rûm ri hi an hre tak tak em le? Ṭhalai rilṭâmna hi a van sosang em! Inthlan kan han thleng a, rilṭâmna hrang hrang kan nei a; sum, mahni ṭanghma haina. Zoram ṭhatna chu lo hmachhuan ve mah se sawi zawh rualin thliin a beng bo zel zawng a ni. Mipuite hi thlalêrah tui hnâwng tulh zeuh zeuh ang vel chauh niin kan lang! Ṭang rualin beih a hun tak zet. Mahni leh mahni inbeih tawn hi a tunlai lo a, pheilai khai rual ruihhlo do a va ṭul nawn leh tak em.

Ṭhangtharteah zu, ruihhlo, sex hman khawloh a hluar hle a, ṭhalai kan thi chur chur a. Ngawlvei lah an tleh sung sung bawk. Zângkhua a bungbu ve thei dawn lo emaw ni tih mai turin kil tinah ruihhlo a hluar a, thuneitu thlengin ven zawh loh a va lar em.

Khawvel changkanna hi a sang hle a, a ruala ke pên thiam pawh a ngai hle. Kan Zoram chhung thlir let leh lawk hi a va ṭha zual dawn ve le. Ṭhalaite kan tuihâl em em a, kan ban phak tâwkah kan che na thei viau. Kan entawn ber hruaitu, thuneitu, nihna chelhtu te, kohhran, ram hruaina kawnga mipat hmeichhiatna lam kawnga hman khawlohah hi chuan tello hrâm thei tawh ila, Zoram damna pakhat a tling dawn tak zet.

Ngawlveina hi a chak em em a, mahse, nangmah kha i chak zawk fê a nia.

- C Malsawmkimi