Tunlai Mizoram hun tawn hlimawm

Mi hlim laia hlim ve thei lo, sawisel tur ngawt zawng reng mai i nih ngawt loh chuan, tun hnaia Mizoram hun tawn hlimawm tak takte hi i hmuh hmaih lo khawp ang le.

Fûrpui kan thleng a, ruahpui vanâwnin leimin namenlo a rawn thlen a, in chhia leh ruang kan hai chhuak mawlh mawlh a, chhungkaw tam tak an rûm a, mipui kan chiai a. Kawngpui leh kawngte a ping a, mipui kan chêt ṭhat theih loh avangin kan phun nuaih nuaih a ni.

Phunnawina tur zawngin sorkar kan dem a, puh chhiat theihna kawng awm zawng zawng dapin kan perh sup sup a. Sorkar lam chhanna a lo chhuak a, a perhtute an ngawi leh dûk a. Hetiang reng renga kan innêk tawn lai hian, mipui hlimna siamtu, kan ṭhalaite hnen aṭangin a lo chhuak ta hlawl mai.

YOUTH ICON KHA

Icon leh Idol kan thlang fo tawh, tun ang reng renga mipui min chawk hlim hi a la awm ngai lo. Media chak tawh em vang pawh a ni mai thei. Ka lo thlir vena hi min pawmpui em ka hre lo. Mizote hi hnam tihmawh, phun reng mai kan nih bik lohzia tihlanna remchangah Pathianin boruak thar min hiptirte a ni mai lo maw ka ti. Youth Icon intihsiaknaa zaite kha zai thiam ta bik riau an ni hauh lo, mahse, mipui min tihlim tlat. An nungchangte kan han hre chiang a, Pathian ṭih mi an ni tlat mai.

Mipui an awm hle hle thei lo. Zoram khawvela la thleng ngai lo, lawmman pathumna la phak lo pawhin mipui lawm an hlawh em avangin mipui thawh khawm lawmman an dawng mawlh mawlh ta mai.

A mak leh zelna chu tun ṭumah hian Youth Icon leh Mipui Icon an rawn chhuak nawlh mai hi a ni. A va han remchang angreng tak em! In ngaihdan a ni ve em aw? Youth Icon zawk hian Pathian fakna hla hmangin mipui min awi zawm tawh zawk se, a inhmeh zawk riaua hriatna ka nei a nih chu maw le.

Sawi tur a tam lutuk, mahse, anni hi chu a boruak kal mek a la ni a, mipuite eng chen nge min awih hlim dawn tih lo thlir phawt mai ang.

Zai lam kan tihtawp hmain, Praise On intihsiaknaa zaite hi an thiam leh pek teh mai asin. Anni ho hian eng angin nge mipui min rawn thlei leh dawn; lo thlir leh phawt mai ang aw.

ASIA-A BAN THA CHAK BER

Asia khawmualpuiah hian mihring nuai 48,000 chuang kan awm a, chung mihring zozai zinga kg. 80 hnuai lama bân inelh (arm wrestling)-a chak ber chu Mizo tlangval Denic Lalruattluanga a ni. Amah leh a ṭhiante silver medal latu Benjamin Lalawmpuia Ralte leh Vanramnghaki te an rawn haw a; khawtual lamah zaia kan lo inawih hlim laiin hlimna thar an rawn hawn ve leh ta.

Kan lo lawm danah chawimawi an phu angin kan chawimawi tawk lo tiin kan phun leh hman nâ a, mi inphalte’n thilpek an pe chhuak nghal, mipui lawmman pawh an dawng ve leh dawn bawk a ni awm e.

Sorkar lam chet lakna kan hmuh lawk loh avangin demna thu a chhuak nual nâ a, Sports Minister Pu Lalnghinglova Hmar zin a lo haw meuh chuan Denic Lalruattluanga leh a ṭhiante chuan Incentive Cash Award an dawng thei dawn tih thu te, gold medalist hian sorkar hnuaia a thawh tur hna ngaihtuah mek a ni tihte a rawn sawi a ni.

Hei bakah hian December-ah Aizawlah ngei International Arm Wrestling Competition–Pro Panja Mega Match buatsaih a ni dawn. Denic leh foreign lam mi arm wrestler an inbei dawn tih thu a sawi chuan mipui a va tihlim tak em.

MIZO PA TUM RUH

Mizote hi kan bân thâ chauh a lo chak lo tih rawn tarlangin, India ram zau tak mai hi thirsakawr ngatin Pu Vanlallawmzuala Varte (LZa), Mission Veng, kum 34 mi chuan a nupui neih sárhû lai ngat kal chhuahsanin, India ram states 28 leh union territory 5 chu January 25 – November 5, 2024 chhungin km 17,000 chuang a tlan theihzia a rawn pho chhuak ve leh bawk.

He mi tumruh hi a phûr thila tlan kual satliah a ni lo, India ram boruak bawlhhlawh tawh lutuk hi, boruak thiang kan neih nana campaign paha tlan kual ngat asin.

He Mizo pa tumruh hian Mizoram hi ke ngatin chhim tawp aṭanga hmar tawp a kal chhuak parh tawh a, cycle pawhin a tlan chhuak tawh bawk. Tin, Tuirial Airfield-ah dakar 24 chhung châwl lovin a tlan kual ngat ngat tawh a; mu miah lovin darkar 24 chhung ke ngatin Mission Veng aṭangin a kal tawh. Chu mai a la ni lo, khawvel record khûmin chho zawng hlirin metre 12,181 a tlan chhuak tawh bawk. Hetiang thu hriat tur awmte hian min tihlim a ni;Mizo history-h a hming a reh tawh ngai lo ang.

CM THU HAWN LEH A DANGTE

Kar khat zet Delhi-ah kan Chief Minister zu thang chuan thu lawmawm tam tak a rawn hawn a. Bawngkawn aṭanga Zemabawk kawng RCC (cement) ang saw Mizoram kawng siam dan thar tura kan CM zinin Central lama kawng thuneitute–Ministry of Road Transport & Highways-ah, Central kawng siamtute (NHIDCL) leh Mizoram PWD khawih kawngte chu cement (rigid pavement) hmanga siam phasak a dil thu a thlen thu te, Assam Rifles sawn chhuah a hnaih tawh thu te, Vairengte aṭanga Sairang kawngpui siam tur hna thawh theih loh a awm, kan mutânna compensation thubuai an chinfel thute a rawn hawn ruau mai bawk. Hengte hi a tak ram a thlen hunah Mizoram hian hmel thar ropui tak a hmu dawn.

Tin, kan Power Minister-in hydel project siam tura an hmalaknate a sawi pawh hian mipui min tiphur a ni.

KOHHRAN INPUMKHATNA

Dt.27.10.2024 khan Mizoram kohhran pariatte thawhhona tur Council of Churches in Mizoram (CCM) inkhâwmpui Mission Vêng Presbyterian Kohhran Biak Inah hman a ni. He CCM-ah hian Mizoram Presbyterian Kohhran, Mizoram Baptist Kohhran, Evangelical Church of Maraland, Isua Krista Kohhran (Bualpui Ng), Lairam Isua Krista Baptist Kohhran, Independent Church of India, Evangelical Free Church of India leh Wesleyan Methodist Church, Mizoram an tel.

Mizoramah hian kohhran pawl hrang 80 chuang lai kan awm nia maw le! Khawvel history kan thlir chuan, hnam indona thlentu lian tak chu kohhran hi a ni daih asin. Thurin hrang leh kal dan hrang hian hnam nun a tipherh a; chutih laia kohhran inpumkhatna lam kan pan mek thawm hriat tur awm ta hi thu lawmawm tak a va ni em.

- Lalrinliana Colney