Sawrkar mawh a ni

Mizoram sawrkar chuan Covid-19 laka invên nan tiin October ni 26 aṭanga November ni 9 thlengin 'Covid-19 No Tolerance Fortnight' kalpui a tum a ni àwm a. Ṭha tak maw, ṭha lo tak maw? Awmzia nei tak maw, nei lo tak maw?

Mizoramah hian 'inngaihhnathiamna awm lo hun bik' hi kalpui a lo ni fo tawh a, lirthei (vehicle) chungchangah phei chuan hun eng emaw ti chhung chu kum tin kalpui a ni hial mai thei. A ṭhatna tak a awm a ni chêk ang; kan chíng chhunzawm em mai.

COVID-19 hripui lêng chungchangah hian, a tîr lamah chuan kan hlau em em a, tunah erawh chuan kan hlauh dan a nêp ta viauin a lang. Hei hi mipuiah pawh, sawrkar thuneituteah pawh a ni ve ve. Inpuha indem bik tur kan awm lo ang. Hman deuha official ho meeting-naah Health Minister-in, COVID-19 darh chhanah mipui a puh anga ngaih theih tura sawi awmte kha a zia lo viau.

COVID-19 No Tolerance Fortnight kan hmang emaw, hmang lo emaw, sawrkar leh mipui hi hripui kai lo tura kan inthunun a ngai ve hrim hrim mai a. Mipui pawh kan inthunun ṭha tâwk lo, dan kan zâwm ṭha lo. Sawrkar pawh a bâng bik lo; zan lam curfew hun chhung ngeia sawrkarin programme a siam hi hriat tur a awm nual tawh. Pawl/mi dangin zan curfew hun laia programme an siam pawh sawi tur a tam ang.

'A bika phalna inpek theih' vang leh 'sawrkar aṭanga phalna hmuh' vanga curfew palzût bik fo hi tih fo dan tur a ni lo ang. Dan siamtu, zâwm ngeitu tura ngaih lehzual sawrkar department/agency-te tan phei chuan palzût loh a fuh lehzual ngei ang. Kan minister-te leh sawrkar hotu liante chêt velna media lama kan lo hmuh ṭhinah pawh, COVID-19 dan zawm lo hmuh tur an awm deuh zel mahna le!

Sawrkar, pawl, mimal ṭhenkhatin zan curfew hun laia mi eng emaw zat punkhawmna tur thil an buatsaih ṭhin hi khuahkhirh a ṭha khawp e. Zanah, curfew hun laia inkhelh phal loh a nih chuan, programme dangte pawh phal loh ni ve rawh se. Veng chhung bikah dinhmun inhrechiang tak takte eng emaw thila rorel leh inrâwn tlang tura han ṭhutkhawm zawk zawkte hi chu a zia; langsar lutuka Zoram mipui hriat thama punkhawmte hi chu a dan a dang leh daih si.

COVID-19 hripui darh ta pawh hi hre reng chunga Mizoram sawrkar fimkhur loh vang liau liauah puh ta ila, kan tisual viau dawn em ni? Mizoram tualchhung bika hripui inkâi chhâwn leh darh ta hi hlâwm lian deuhin hun hnihah han ṭhen ta ila: (1) - VC/LC inthlan vanga darh leh, (2) COVID-19 positive enkawlte chhuahtir dan fuh lo vanga darh.

VC/LC inthlan vanga Mizorama hripui darh ta chiam hi chu mipui kan chiang tlangin a lang a; a hnuhnung zawk hi i'n sawi hlek teh ang. Sawrkarin 'COVID-10 discharge protocol/guidelines' a siamah COVID-19 symptom lang nasa lo zawng chu hri an la vei leh vei loh enfiah nan test-na rintlak ber RT-PCR hmang loin, a rintlak loh ber Rapid Antigen Test hmanga test turin a ti nia sawi a ni.

Mithiamte sawi dan leh internet lama thuziak tam takah chuan, RAgT-ah hian positive chu dik ngei tura ngaih a nih laiin, negative erawh chu a dik lo a tam, tih a ni. A awmzia chu - RAgT-in negative anga a hmuh zingah positive si tam tak an awm thei, tihna a ni. COVID-19 positive-te enfiah nawnnaah, RAgT-in negative anga a hmuh avanga hripui vei tawh loa ngaih chhuahtir (discharge) zingah la positive si an awm thei tihna a nih chu. Hei hi tun hnaia COVID-19 positive pung leh tak hluai chhana an puh ber chu a ni. Kan sawrkarin a kalpui dan a ni a, a mawhphurtu chu sawrkar a ni; mi dang mawh a ni lo.

Sawrkar hotute'n pâwna chhuak tam lo tur leh thil ṭul tak takah chauh chhuak turin mipui an ngen ṭhin a; a ṭha, tih âwm tak a ni. Chutih rualin, pâwna chhuak tam lo tura mipui a duh tak tak a nih chuan, sawrkar hnathawkte pawh hi inkal chhâwktir leh rawh se. Sawrkar office zawng zawng hian an office-ah pâwn lam mi luhtir an duh vak lo, an lâwm lem lo; chuvang chuan office-a dâwra kal vel an tlem phah hle. Dâwrtu an tlem miau avangin hna a tlem a, thawktu zawng zawng kaltir ṭhup ṭhup lo hian hna a thawh theih ang. Tichuan, chhuakvâk pawh an tlêm phah thei ang chu.

Eng pawh ni se, Covid-19 No Tolerance Fortnight hi a lo ṭha phian thei. Chutih rualin, no/zero tolerance week/fortnight tih vel hi dan kenkawh kawngah kan hlawhtlin tâwk lohzia tichiangtu mai nia ngaih theih pawh a ni ve àwm e. 'Inngaihhnathiamna awm lo hun bik' chhunga dan kengkawh ṭha em em, dan bawhchhiate a vàia vâi a, 'hun bik' ni lo zawnga dan palzût hreh lo leh dan bawhchhiate ngaizam ṭhin kan nihte pawh a hlauhawm hlel lo e.