Pawl hmingchhiat leh hmingṭhatna

Vei zawng kan neih hi chuan kum upa zawk leh puitling zawk kan val upa te cho chhuahna atan tal pawh ziah hi ṭha ka ti a, ka duh angin ka ziak taima lo piah lamah mahni insit a nat avangin thu puitling deuhte hi chu ka khel ngam ngai mang lo a, tun ṭumah hi chuan kan rama pawl ṭhenkhat kal dan leh a phena mihring awm hi ka vei zawng, mi tam berin an hriat si loh nia ka ngaih avangin ziak lo thei loin min nawr ve tlat a ni.

Hman deuhah khan MZP an indinthar leh hnu lawk khan MZP kha an kal fawrin ṭawngkam danga kan dah duh phei chuan an kal firfiak kan ti thei hial ang chu, khati taka an kal chhan kha a phenah pawl hruaitu mi pahnih pathum thil duh firfiak deuh, a ṭhenin huaisen deuh an tih tur ang mi an awm vangah kei chuan ka ngai. Zirlaite rilru kha a extreme thar thut lam ni loin MZP hruaitu zinga mi ṭhen­khat extreme an awm avangin an pawl activity kha a extreme ni ta berin ka hria.

Tun hnaia MZP-te erawh hi chu an moderate ta a, a ṭhat zawk leh ṭhat zawk loh kei chuan ka hrethiam loa, ka hmuh chhuah leh hnuhnawh chu MZP president leh an mi challang deuhte kha an hunlaia sorkarna siamtu political party-ah an lut zui deuh zel a, chuvangin anni tan chuan extreme taka kal kha a remchang lo a ni tiin thutlukna ka siam. Pawl phenah mi moderate lui tlat pahnih-pathum vel an awm avangin zirlaite rilru a moderate thar ta thut ni loin MZP lama a vawnfung chelhtu lamte rilru angin an lang chhuak ta a niin ka hria.

YMA lamah lalut ve leh ta ila, tun hmaa Central YMA kha chu Branch YMA lian­pui ang kha an ni a, hruaitu nih an inchuh loa, lansarh an tum loa, CYMA kaltlanga hamṭhatna dawn an tum loa, CYMA kha tlawmngaiin an kaihruaia, an zahawm hle ka ti. Hun a kal zela CYMA hruaitu nih tumin an campaign ṭan a, CYMA hruaitu nih chu sorkar hna­thawk tan âwlna rem­chang a ni a, sorkar hna­thawk lo tan con­tract leh supply hna hmuhnate a lo ni chho ṭan a, CYMA hmel a danglam ta niin ka hmu.

Tun hnaiah hi chuan CYMA hi zirlai pawl zawk ang mai hian an che ta a, an kal dan hi tun hmaa mi nen a inang ta loa, a phenah hian tute emaw chu an awm leh ngei ka ring a, AMC laka an hel dan leh innawr dante ngaihtuah lêt khan thil mak deuh deuh inphum ru chu a awmin ka hria.

Pawl hmingchhiat leh hmingṭhatna hi tute emaw vang a nih ṭhin avangin pawl pumpui hminga thil a kal ṭhin avangin committee-a a rawt chak leh ṭawng chak chak thua kal hi chu a him lo tih a takin a lang mek a ni.