HAL TAWH LUL SU AW

Kum 2023 thlah liam zan leh kum thar 2024 lo thleng tur kan hmuah zanah khan mi tam takte chu hlima an au dur dur laiin, keini chu mangang leh thlaphâng reng rengin hun kan lo hmang thung a. Kan thlaphânna pawh hmun tin aṭanga puak thei thil chi hrang hrang puak nasa lutuk avangin kan nautê, kum 1 leh thla 2 mi lek chuan a hlauh lutuk avangin awm ngaihna a hre lo a, a hlau thlabâr lutuk chuan mi dang pawh min awm hle hle tir thei lo a, ina awm zawng zawng kan zavaiin kan buai phah a ni.

Naupang thlabâr mangang hmel hmuh chu hrehawm tak a ni a, khumah kan mutpuiin a lu chu blanket-in kan tuam tlat bawk a. Kan thiam leh theih ang tâwkin han thlamuan tum ngial mah ila, pawn lama hâlpuah puak thâwm a lo rîk leh chuan khuma awmpui pawh chuan awmzia a awm lo. A kil thei ang ber, halpuah rî hriat theih lohna ber tura ngaih bualin thleng thlengin bihrukna atan kan hmang a, kan buai tak zet! Hâlpuah pangngai puak chu a nêp deuh a, gelatin nge, puak dum dumte phei kha chu keini tan chuan thinrimthlak tak a ni.

Hlima lawmte chu demna tur a awm hauh lo a, tu tan pawh kum thar dam taka thlen chu lawmna tur a ni. Chutianga hlima kan lawm rual chuan mi dang tan hnawksak leh bengchheng kan ni thei tih erawh ngaihtuahna nei tel hram ila. Chu chauh ni loin, khatiang huna boruak kan tihbawlhhlawh dante chu chhût phak rual a ni kher lo ang a, chu boruak chhia chu mi dangin an tuar dawn lo a, keimahni bawkin kan tawrh leh dawn avangin a nghawng tur ngaihtuahna nei chunga thil tih ṭhin a ṭha viau.

Tehna hmanrua awm se la, pawn lama puak thei thil chi hrang hrang hâltute hlimna leh lawmna aiin, an thil hâl avanga chhungkuaa kan lo thlaphanna leh manganna kha a hniam bik hauhin a rinawm lo. Kan dinhmun kha inthleng theih ni se la, eng nen pawh kan thleng huam ang tih tur a ni. A hun chhung chu darkar hnih emaw vel lek pawh ni se la, kan tan chuan hriat reng tlak loh leh theihnghilh theih loh thil min hnutchhiah reng tawh dawn a ni.

Pathian zarah kan dam ang a, kum tawp kan thlengin kum thar pawh tluang takin kan thleng leh turah ngai ila. Chu hunah chuan mi dang ngaihsakna nei hauh loin bengchheng siamin, puak thei thil hâl an awm leh ang em? Sorkar lamin an khap chung pawhin hâl lui an awm leh ang em?

Keini chuan thlaphâng leh mangangin kan awm leh dawn em tih chu kan ngaihtuah lo thei lo a, kan huphurh lâwk hle mai. Khapna pawisaloa ti lui tawk hi kan lo awm zel bawk si avangin huphurh tak chungin he hun lo thleng tur hi kan thlir a, khatiang taka naupang thlaphâng hmel kha hmuh nawn leh kan duh tawh ngai loh avangin ‘Hâl tawh lul su aw’ tih baka ngenna siam kan thiam bawk si lo. Kan ngenna hi (sorkar khapna a ni ber zawk nâin) hi zâwm a, kum hlui thlah zana hâlpuah hâl thawm a awm miah loh chuan hlim takin kan awm ve thei dawn si a.

- Mahmuaka Chhakchhuak