Kristiannain Mizoram politics-a nghawng a neih dan

India rama state dangte ang lo takin Mizoramah hian politics leh Kristianna hi thil inmil lo leh kal kawp thei lo anga ngaihna hi a la tam khawp mai. Politics kan han tih hian a ni lo zawnga lak hi thil awlsam tak a ni a; rinna nghet deuh nei mi tan chuan politics-a inhman hi tih loh tawp tura la ngaite pawh an la awm fur awm e. Chutih lai chuan, ‘Kristian ṭha, a ram leh hnam hmangaih a, a ram ṭhatna tur ngaihtuah a, khua leh tui ngaihsak mi tan chuan politics-a inhman hi tihmakmawh a ni,’ tih zawnga ngaihdan neite pawh an awm ve tho bawk. A dik ve theihna laite a awm thei awm e.

Politics kan han tih hian hrilhfiahna hrang hrang a awm a, British lehkhabu ziaktu hmingthang tak Andrew Heywood-a chuan awlsam takin a lo sawifiah tawh a; a ngaihdanah chuan, “Politics chu mipuite’n anmahni tan dan an insiam a, an nunpui a, an zawm hi a ni,” a ti. He a sawifiahna hian politics rorel dan kal hmang a sawifiahin, kan nun ho dan tur a hril thui hle a ni. Kristian awm tamna ramah hian politics hi a bawlhlawh a nih chuan, Kristianna chuan zung a la kai nghet tawk lo tih pawhin a sawi theihin a rinawm.

Kristiante chanchin ziahna, History of Christianity tih lehkhabu chuan heti hian a ziak a, “Kristiante zingah chuan tu mahin sawrkar hnuaiah nihna an chelh tur a ni lo tih rinna chu a lar hle. Kum zabi thumna tir lam thleng pawh khan, hmanlai Kristiante chin danah Kristian sakhua zawm tur chuan tualchhung thuneitu chuan a nihna a kalsan a ngaih thu Hippolytus-a chuan a sawi,” tiin an ziak a. He ngaihdan hi hmanlai ata kan pi leh pute aṭanga tun thlenga mi ṭhenkhat rin dan a la ni kan ti thei ang. Nimahsela, a lehlam zawngin han sawi ta ila; Catholic news chanchinbu chhuak pakhat chuan heti hian a ziak a, “Politics khelh hian mi rethei tak takte a ṭanpui a, politics kalphung chu Pathian duh zawng nen inrem chiah lo mah se, mi retheite tana diknain ro a rel theih nan kan inhnamhnawih a ngai a ni,” tiin.

Kan Zoram chauh loah pawh, state danga an ram hruaitute han thlir ila; hmingṭhat duh vanga sakhuanna hming lam zing viau te, hmaikâwra hmangte pawh an awm nuk a, chungte karah chuan ṭhenkhat chu khawtlang siamṭhat duhna tak tak rilru put avanga inhmangte pawh an awm ve tho a ni. Sakhaw mi tam tak chuan an hruaitute’n politics an khelh hian an phûrpui em em lo va, sakhaw hruaitute inrawlh tam tak an awm laiin, ṭhenkhat ve thung chuan sakhuanna hi a thianghlim em avangin inrawlhna chi-ah an ngai lo thung.

Hetih lai hian, sakhaw hruaitute politics-a an inrawlhna hian zawhna ṭhenkhat a lo siam a: Kristian sakhaw thuhriltute’n politics hi an siam ṭha thei ang em? Politics khelh chu sawrkar ṭha zawk leh khawvel ṭha zawk neih nana Pathian kawng hman a ni em? Heng zawhnate hi a lo piang chhuak a ni.

Ringtu tawh phawt chu khawtlang, ram leh hnam politics-ah an inpumpek ngei ngei vek tur tihna a ni lo va, ringtu tawh phawt chu pastor emaw, kohhran upa emaw an ni vek tur tih a nih loh ang bawk hian, ringtu zawng zawngte chu politician an ni vek tur tihna a ni bik lo. Nimahsela, Pathian min dahna Mizoramah hian ram ṭhatna tur policy ṭha neih theih nan mahni theih phak ang tawka kan ke kan pên chhuah ve hi ringtute’n kan tih tur a ni tlat a ni. Politics a nih avanga hmuh sual tlatna leh Pathian mi lo deuhte chauh inrawlhna tura kan ngaihna dik lo tak erawh chu kan phûm a, kan paih bo a ngai ta hle.

Heti lam zawng hian han sawi leh ta ila. Politics hi a dik lo lo va, a chhunga chengte’n kan hman dik loh avangin a lang dik lo fo ṭhin mai zawk a lo ni. Kan rinna nen a inmil lo a ni lo va, kan politics huang chhunga kan thil tih duh tam zawk hi kan sakhuana nen a inrem lo fo zawk a ni. Khawvel kan awm chhung hi chuan politics hi kan mamawh reng dawn a, politics tel lo chuan ram a siam ṭhat theih loh mai bakah, ramin hma a sawn thei dawn lo. Chuvang chuan, politics hi kan dam chhung hi chuan kan nunah hian hmun pawimawh tak a chang reng dawn a ni.

Mizoram hi tun hma chuan Lushai Hills tih a ni ṭhin a, India hmarchhak chhim tâwpa awm a ni. Kan pi leh pute kha insawn reng hnam an ni a, hmun khatah an awm rei ngai meuh lo. Khuaa an hotu ber chu lal a ni a, ani chuan hui khawmin, chhungkua ang maia awm khawm ṭhin an ni. Lal chu a khaw mipuite chuan an zah thiam em em a, a thu an ngaichang a, a thu lo chuan eng mah an ti ngai lo. Lal chuan a thachhang dâwltu atan upa ruatin, khua leh tui enkawlna tura amah ṭanpui turin a ruat ṭhin.

Kumpinu sawrkarin kan ram min rawn awp hnu khan kan ram rorel dan leh a inrelbawl danah thil tam tak an rawn thlak danglam a. Kan inchei dan te, kan nunphung leh hnam zia te, kan hla duh zawngte leh kan chet ziate an rawn thlak danglam nasa hle. Chung danglamna rawn thlen nasa tak zinga langsar ber ni thei awm chu ‘Krsitian’ sakhua a ni. Mizote sakhaw thar, Kristianna chuan Mizo nunphung a rawn sawi nghing dawt a, kan sap missionary-te chuan ziak leh chhiarte rawn zirtirin, lehkhabu tam tak an letling a. School-te hawngin, chu kal dan phung thar chuan khawvel mite’n Mizo min rawn hmuh dan a rawn thlak a. Hnam hnuai hnung ni mah ila, changkannain min rawn chim aṭang chiah khan danglamnna a rawn thlen nasa em em a ni. Mizote’n an khawthlirte tizau ve zelin, an rinna hluite pawh an paihthla ta a. A hnu leh zelah phei chuan politics lama bengverhna leh politics ngaimawhnate an rawn nei chho ve zel a ni. Heta ṭang daih tawh a rawn inṭan chho a, Mizote nunah hian Kristianna chuan hmun pawimawh tak a rawn chang chho ta a ni.

India ram han thlir ta ila, modern education bul rawn ṭantute kha sap missionary-te an ni a, zirna in tam ber leh ṭha ber berahte pawh hian Kristian school-te an tel ve nawk a. Heng school aṭang hian India rama politician leh lehkhathiam lama mi hmingthang tak takte an lo inzir chhuak hlawm tawh a ni. Chu chuan nasa takin India ram politics a nghawng a, a bik takin mipui rorelna democracy-ah hian a ṭha zawngin thil tam tak nghawng a nei a ni. India hnampa Mahatma Gandhi pawh khan Isua zirtirna kha a ngaisangin a zah em em a ni.

Mizoramah hian India ram hmun dangte ai mahin Kristianna hian nghawng a nei thûk a. Kristian tamna ram state kan ni a, kan politician leh sawrkar hnathawkte tam berte pawh Kristian sakhua vuan an ni. Chu mai ni lovin, kan ram hruaitute pawh kohhrana dinhmun nei an ni deuh fur a, tuna kan Chief Minister pawh hi kohhran upa a ni nghe nghe. Mizorama NGO hrang hrang kan neihte pawh hi Kristian zirtirna hnuaia lo indin chhuak an nih deuh vek avang hian Kristianna hian kan ramah hian state dangte aiin nghawng a nei thui em em a ni.

A tawpna berah chuan, Mizoramah chuan Kristianna leh sawrkar hi a kal kawp lo thei lo. Kan sawi tak ang khan, Mizoramah chuan sakhuana hi kan dah chungnung a, kan ram hruaitute pawh hian an zah thiam ṭhin. Inthlan dawn ni se, an thu an ngaichang a, sawrkarna siamtu turte pawn Kristianna nena inkalh zawnga kal lo turin nasa takin an inveng ṭhin. Ruihhlo donaah te, corruption dona leh kawng hrang hrangahte hian Kristianna hian nghawng a nei thui em em. Ralmuang taka kan ram a awm te, kan ram hruaitute’n an theihtawp chhuaha an hmalakna te, Pathian duh zawnga rorelna kalpui an tumte hi Kristianna zar kan zona a ni zel a ni. 

- Lalhriatkimi, MA,

Political Science, ICFAI University