Bawngkawn traffic jam reng saw (Saw lai chauh tal saw chu kawng chhawng siam dan a awm mai lo maw?)

Ni 6.11.2024 khan Zuangtui kal turin Chanmari aṭangin chhun dar 12 velah Ramhlun lam tlan bus-ah ka kal a, Bawngkawn kan chhuah phei dawnah chuan kan ding ta reng mai a. Kan chung lam Chaltlang kawnga kal chhuk leh chho te, Ramhlun kawng hnuaia kal te, kan side lo lam, min tâwk zawnga kan sira kalte chu an che reng a, keini chu kan che ve thei reng reng lo mai. Minit 30 vel hnuah chuan kan tawlh hma ve deuh ta a, duty kan hmu pha ve ta tihah chuan kan ding leh ta ngat ngat a! Police duty chu pakhat chauh a awm a, a vir buai ngang a, side hran hrana mi chu hmanhmawh tak takin a vai zung zung a, mahse, keini lam chu a hawi pawh a lo hawi duh lo. Engtiziaa keini chu min hrem bik ngat ngat chu ni maw, tiin kan phun sap sap a.

Bus driver chu chhukin duty bulah chuan eng emaw hi a va sawi a. Traffic duty chu thinrim em emin driver chu kut zungchala rawn kâwk chungin a lo phei a, a rawn âng ta chiam a. Kan hmaah chuan taxi pahnih chiah an ding a, chumite chu kaltirin keini chu min dintir a. "CM a lo kal dawn an ti a, ka dintir che u a nih hi. Engmah hre lovin engati nge thil in lo sawi ve," a ti tân tân mai a. Keiin, “Chu pawh ni se, line dang an che reng a, engati nge keini chauh kan din reng?” ka tih pawh chu min chhang chuang lovin, âng chungin a let phei leh ta a.

Keini chu min kaltir ni chuang lovin kan kal phei ve ta zel a. police duty-pa thinrim laklawh chuan signal a vai lai pawh chu ngaihsak hleithei tawh hek lo, kan chuanna bus number chu a ziak thûl. Vai driver a man sa ni awm tak chuan a lo be buai ve reng nen, ama min tihdin pawh ni ni lovin, jam vangin duty post bulah chuan kan ding leh ta reng a. A tawpah chuan engtin tin emaw kan tlang thei ta hram a ni. Darkar khat zet kan tangkhan chhung chuan CM pawh chu khawi zawng mah chuan a lo kal hlei lo va.

Ka rilrua thil lo awm:

1. Sawti khawpa pengṭhuam lûn laiah engati nge traffic police pakhat chauh a duty?

2. Heti khawp hian a ni maw kan minister-te che vel hian mipui an lo la tihbuai fo?

3. Bawngkawn Sairang pengṭhuam leh Durtlang peng inkar chauh tal hi chu mkawng chhawng a siam theih hram lo maw? Mihring kalna tur tal pawh siam dan a awm lo maw?

4. Pu Zoramthanga chuan kawng chhâwng ban phunna tur a kâwk thei a, ZPM hian saw lai pengṭhuam pahnih inkar tal saw kawng chhawng siam tumna an nei ve em?

Bawngkawn phei mipuiin harsatna namenlo an tawh rengna saw Sawrkar hian tihziaawm tumna leh hmalak mekna a nei tawh a nih chuan mipui hi min hrilh ve se la. Chutiang project a lo awm a nih chuan, in theihna, in thiamna, in finna zawng zawng hmangin, ṭha taka tihhlawhtlin tumin han insawrbing teh u. Ṭha taka in puitlin thei a nih chuan in tan leh Mizoram tan mellung pawimawh tak in phun a ni ang. Chuti a nih loh chuan, saw laia harsatna tawh apiangin he ka thu ziah hi thunawna hmangin, in thlavang kan tâwng reng mai dawn a ni.

- K Hmingthankaia