Infiammite leh sports injury: Keartui bilh enkawl dan

Infiammite’n kan pumpelh theih miah loh chu infiam laia intihnat palh (injury) hi a ni. Infiam/inkhelh kan ngainat vangte leh kan infiam ngun (regular) viau pawhin intihnat (injury) hi kan pumpelh thei chuang hauh lo a, infiam dan rules kan hriat ang bawk hian inenkawl dan hi kan hriat ve a ngai a ni. Infiammite zinga keartui bilh hi khûp nâ tih lohah chuan a tam ber a, field chhunga (onfield) / infiam laia injury tam ber chu keartui bilh a ni. A enkawl dan azir hian infiammite inkhelh leh hun tur te, hemi natna avanga injury dang thleng theite a veng thei a; keartui nghet lo leh bilh nawn fo (chronic ankle instability) laka kan inveng thei a ni.

Keartui bilh hi chhan hrang vangin a thleng thei a, châwn tha (calf muscles) mar lutuk vang te, châwn thahrui (achilles tendon) load tam lutuk vang te, khûp na (ligament & meniscus) benvawn neih vang te, kâwng na benvawn chhan hrang hrang vangtein a neih theih a. Infiam laia kan rihna zawng zawng kan nghahna (load) chu keartui a nih avangtein thahrui inpawt fuh lo leh kan tha (muscles) tuamtu duar (fascia) inpawt fuh lote’n keartui bilh (ligament injury) bik a thlen ṭhin. Injury kan neiha infiamnaa kan let leh hun theih tur hun chhung hi clinical diagnosis, a nat dan, a tha kan tihnat ber (keartui vuantu ligament 11-te) leh kan inbilh dan zawng azirtein a hriat theih a, a chian tawk loh chuan x-ray, CT scan leh MRI hmangtein enfiah a ni ṭhin.

International footballer leh athlete-te keartui bilh an neiha an lo let leh hma ṭhinziate kan hmu ṭhin a. Engtiangin nge a nat dan (grading ) azira an inenkawl ṭhin a, mahni kan lo inenkawl ve theih ang tihte hi lo zir chiang ila.

1. Grade-1 (Dam hun chhung ni 7 aṭanga kar 4):

Ke artui bilhah chuan a dam hun chhung hi rei lo ber, intihpalh avanga vûng, a nat avanga rap ngam lo ang chauh kha damlote’n an nei ṭhin. Enkawl that loh chuan grade-3 neih leh theihna chance sang ber a ni. Chuvang chuan intihpalh ni aṭanga ni 7 chhung chu mahni rihna hmang chi reng reng exercise leh infiamna tih loh tur a ni. Hemi hun chhunga treatment ṭha ber chu vûra ni khata vawi 4-6 tal deh a ni. Infiammite’n tournament emaw, season emaw kal lai an nei a ni chuan a na lai medical professional-te râwn a, support ṭha tawk tak leh injury lai chiang taka zirin rehabilitation exercise (mithiamte’n research hmanga exercise an duan bik) nen a infiam zui erawh a pawi lo.

2. Grade-2 (Dam hun chhung kar 4-6):

Grade-1 nen a danglamna chu, tha vuantu (ligament ) thlêr hi a ni. Infiammite bikah chuan a nat tirha duk leh vûng dam thei lo, keartui che thei lo leh keartui nghet lo kan tihte an nei ṭhin. Hemi grade hi diagnostic criteria leh a nat danah pawh enkawl buaithlak ber a ni a, infiammi tam takin keartui dam thei lo kan buaipui chhan ber pawh a ni. Infiammi tan chuan a na lai hahdamtir (rest) hi ligament a thlêr belh loh nan leh a na laite’n thisen chaw ṭha tak an dawn theih nante a pawimawh em em. A na lai damdawia enkawl mai bakah, infiamna bika let leh thei tura rih pek (progression loading) te, tui chhunga exercise lak (hydrotherapy)-te leh keartui vuantu tha tihchak nan hun tam zawk hman tur a ni a. Hemi hun chhung hian kan taksa a na lo laite erawh chu infiammi tan chuan châwl chuang loa exercise lak (specific customized training) chhunzawm theih a ni.

3. Grade-3 (Dam hun chhung thla 3-12):

Kan sawi zawng zawng natna bakah hian tha vuantu (ligament)-te hi a thlêr vek thei a, chu chu grade-3 kan tih chhunga mi a ni. Hei hi MRI leh x-ray hmangtea finfiah (confirm) a ni ṭhin. A tlangpuiin enkawl dam hun chhung hi thla 3 aṭanga thla 6 a ni a, enkawl zui a nih loh hian keartui nghet lo (chronic ankle instability) leh infiamna thlenga chawlhsan theihna a nih bakah, zai (surgery) thlenga enkawl ngai a ni thei. Mahse, keartui bilh hi 85% chu zai ngai loa enkawl dam theih a ni (Alexis T. Mugno et al, 2023). Infiammite inenkawl dan turah chuan, a chunga kan sawi mai bakah khian keartui na lai ṭha taka brace hmangtea hahdamtir a, a tha tichaktu exercise leh a vuantu duar (fascia)-te ṭha tak tihchet a, enkawl a ngai. Enkawl dan dik lo leh enkawl ṭhat loh chuan kâwng na benvawn, khûp nâ (ligament & osteoarthritis), kal dan dik lote thengin a hnuah a thlen thei a ni.

Keartui bilh enkawl hi a harsa lai ber chu, a dam emaw kan tih, infiam leh kan zuam hun lai tak hi a ni a, kan inuluk hun lai ber tur a ni (proliferation phases). Chumi a nih avang chuan a thiam zawkte enkawlna doctor, sports medicine emaw rehabilitation lama thiam bik physiotherapist-te râwn a pawimawh em em. Infiamna lama intihnat palh (sport injury) reng rengah chuan infiam leh thei tura inbuatsaih nan mithiam bikte–sport medicine team-te hmanga infiam leh theih hun chhung leh enkawl hun chhungte hi ṭha taka duan a ni a. Inenkawl dan tur leh rehabilitation ṭha tak hian a hnua kan intihpalh theihna mai bakah, hma lam hun (career) thlengin a pui thei a ni. Ṭha zawka infiammite an khelmual ṭheuha an let leh theihna atan enkawl dan dik tak (tailored made treatment) hian infiammite taksa leh rilru thlengin a pui bawk.

- Lalthutiamngheti, MPT

(Sports & Manual Therapy)