Nangmah vangin mi tu emaw a beidawng thei

Hmel ṭha bula awm chu a nuam a, a hahdam thlak ṭhin; inti hmel ṭha bula awm erawh chu a hreawm. Mi fing leh thil hre zau bula awm chu a bengvar thlak a, thil hre uk si lo, inti hre em em bula awm erawh a nuam lo.

Kawng engkimah thil lem bula awm chu a nuam lo a, nun a ti hreawm ṭhin. Chutih tih mek lai chuan, thil a tak tak bula awm erawh chu a nuam a ni. Min hmu hniam em emtu bula awm phei chu thil hreawm tak a ni.

Naupang te ni mah ila, kohhran, khawtlang leh NGO's hruaitute duhsakna changin hruaitu nihna dinhmun ka chelh ve nual a. Ka koa mawhphurhna a han awm ve chinah chuan mualpho loin ka la ti puitling thei ve zel a, ka hman tlak chho ve tial tial bawkin ka inhria. Hetiang anga ka inhriat chhan chu miten hruaitu ni tlaka min ngaih vang niin ka hria. Midangte min hmuhdan hian mihring nunah hian awmze thuk tak a nei a ni.

Mi tu emaw laka i rilru put dan dik lo tak avang khan tuemaw chuan a nunna hreawm ti takin a hman phah thei a, a nunna hial a tih tawp phah thei a ni. Piantirh ata mi bik riau an awm a, mah se chutiang ang mite ai chuan mahni inzir chawp avang leh midangte rinna avanga mi chhawrtlak tak leh rintlak tak hi an tam fe zawk. Mi tumah hi hruaitu ni tlak lo an awm lo ngawt lo. Midangte chunga kan rilru put dan hi midangte awmdan tur atana thil pawimawh tak a ni.

Thufing pakhat chuan,"Mi chu ring la, i rin angin a awm ang, a koah mawhphurhna nghat ngam la a mawh­purhna chu a hlen ang," a ti. Chumi letling chiah chu, mi chu misual hmuhin hmu la a sual ang a, rukru hmuhin hmu la, ruk a ru ang, tihna a ni. Chuvang chuan midangte kan hmuhdan leh kan thlir dan hi a dik zawng zel ni thei se a va ṭha dawn em.

Kan awma hmun te, kan hausak dan te, kan seilenna hmun leh kan zir san dan a inang lo zut ang bawkin mihring tumah hi tling bik leh chungnung fal bik kan awm lo a, fel fal bik leh taima fal bik pawh kan awm chuang lo. Chuvang chuan mahni hi ṭha ber angah leh tling ber angah inngai ngai lo ila, midangte hmusittu leh hmu hniamtu, deusawhtu leh diriam a, ngaineptu nih i tum lo ang u.

Nangmah avangin mi tuemaw chu a bei­dawng thei a, a rilru a mangang viau thei a, thihna kawng a zawh phah hial thei a ni. Midang i hmuh dan azirin mi tu emaw chu a nun pumpui a chhiat phah thei a ni tih hi hre reng la, midangte hmu hniamtu nih tum lo hram ang che.