Vai sumdawng an tam
Kumin kum tir aṭang khan Mizoramah vai sumdawng an phung hluai mai a, Aizawl khawpui chhungah pawh ngaihmawhawm khawpin an tam ta. Heng ho zinga a tam zawk chu phalna nei lo an nih a rinawm.
Vai sumdawngte hi a tam zawk chu lirthei hrang hrang hmangin Silchar lam aṭang bungrua rawn phur an ni a; Aizawl mai bakah, district dang dangah an bungrua an hralh ṭhin. Heng ho hi engtin nge kan hmehmih ang? Ngaihtuah chian a ngai ta hle mai.
Sumdawng zingah hian phalna nei an awm bar lo tih a chiang a, heti em ema zalena kan dah hi nakin lawka kan hnam min chim ralna tur a ni. Mizo sumdawng ho lah hian anmahni hlawkna tur ringawt an ngaihtuah a; hnam dang sumdawng laka bungrua man tlawm deuh zawka an hmuh theih chuan hnam hmangaihna a lang tawh miah lo. A manganthlak tak meuh a ni.
Heng vai, bungrua rawn phur ṭhinte hian bungraw man an tihtlawm zawk avangin Mizo nu ho tam tak phei chuan an event ang deuhah an ngai tawh a; thil ṭha lo tak, hnam hralhna ang hial a ni ta.
Hman ni khan Treasury Square-ah vai pahnih hian bed sheet an zuar a, an titlawm viau lehnghal. Kei chuan, "Permit in nei em?" ka ti a; an kal bo ta daih a. Khang vaite kha Mizo tam takin an dawr dawn chu a ni phawt mai a. Khatianga thil zuar kha an tam hle a ni.
Engtin nge kan hmehmih ang? Sorkar lam hian ngaimawh se, police lam pawh hian Vairengte gate-ah uluk takin lo enfiah se, Mizorama sumdawn phalna nei lote chu Assam lamah lettir hmiah hmiah se a ṭha ber mai awm e.
A nih loh vek pawhin, khua leh veng tinah YMA-in hma an lak mai a ṭha lo maw le? Central YMA pawh a chet a ngai ta niin a lang. Nakin lawkah chuan kan hmeichhiate an thurualpui ngei ngei dawn a, tunah pawh an thurualpui viau tawh hmel. Kan hmeichhe tam tak hian mahni hnam hralh an hreh miah lote hi enfiah deuh an ngai ta niin a lang.
Heng ho lakah hian sorkar a chêt duh loh emaw, Central YMA a chêt loh bawk chuan tharum thawh a ngaih hunah chuan kan buai hle dawn a ni.
Chuvangin, Vairengte police gate duty pawh enfiah deuh a ngai ang. Tun sorkar a pian hlim khan gate-a pawisa lak khap a ni a, kha khan police duty-te a tihnual hle. Chuvangin, enfiah a, sawn chhuah deuhte pawh an ngaih hmel a ni.
- Lal Rinmawia