Donald Trump-a leh kan ram hruaitute
Vawi hnih thah tum a ni a, vawi hnih ngawt president a nihna aṭanga paihthlak tuma beihna a tâwk bawk. Vawi 94 zet amah hêka khinna a hmachhawn chungin, America president inthlana hnehna ropui ber tia an sawi hmangin Donald J Trump-a chu US president 47-na ni turin hneh taka thlan tlin a ni leh ta a nih hi. Tun ṭum US inthlanpuiah hian Trump-a hian record a siam nual bawk. Trump-a hian president thlanna a chuh theih tawh loh nân nasa taka beihna a tâwk chungin, US mi lar leh thiltithei rualin amah duh lohna lantir mah se, a tawpah chuan hnehtu a ni ta tho a nih hi.
US inthlanah chuan state tlemtê tih loh vote thlak dan tur hi hriat lâwk sa anga ngaih a ni. Chutih laiin, state ṭhenkhat erawh vote an thlak dan tur hriat lâwk theih loh, inthlak danglam ṭhin an awm. Tun ṭum inthlanah hian state 7 pawimawh êm êmte dinhmun hriat lâwk theih a ni lo. Chung state-ahte chuan Trump-a hi a chak ta vek a, president ni tura electoral vote hmuh ngai zat 270 a hmuhna kawngah electoral vote 110 zet chu heng state 7-te hian an thawh ta a ni.
Engvangin nge Trump-a hian hnehna a chan? Chhan hrang hrang a tam hle. A hmasa berah chuan, beihna hrang hrang leh sawichhiatna hrang hrang tâwk reng mah se, tlâwm tumna nei lovin hma lam a pan lui tlat a, rim taka thawk chung zelin America mipuite a rîm a, a rîm thlu ta a ni. ‘Bei la, bei nawn leh ṭhin rawh’ tih thupuia neitu hian hnehtu nih a phu hle a nih hi. Trump-a a chak rual rualin US economy chu dinhmun duhawmah a ding nghal a; Stock Exchange leh Wall Street dinhmun pawh a nghet nghal sawt bawk.
Sawichhiatna tinreng kârah American ṭhalai rual vote a hui ṭeuh a. Hispanic, Black leh Latin leh Jews vote a hmu tam zawk bawk. Kum 1960 hnuah a vawi khat nan thingtlâng khaw lamin Republican lam an hawi dual a; kum 40 chhûngin Trump-a hian mihâng ho vote a hmuh tam ber ṭum a thleng. Kum 20 hnua Republican candidate-in popular vote a hmuh tam zawk ṭum khatna a thleng bawk. Mahse, mipui rilru a hnehna ber pakhat chu he zawhna mâwl tê hi a ni. President ka nih lai khan nge Biden-a hnuaiah hian, in nun a nuam zawkin hma in sawn zawk, tih mai hi a ni.
Donald Trump-a hian President a nih hmasak zawk khan a manifesto kaltlanga US mipui, ram leh khawvel huapa hmalak a tumna zawng zawng chak takin a bawhzui a nih kha. Hei hi a ni kan ram hruaitute laka ram dang hruaitute danglamna chu ni ṭhin ni. MNF leh Congress khan an manifesto aiin an sangawi zawnpuite ngai pawimawh zawkin, duh tâwkin nuam an sa tawh a. ZPM hun a lo inher chhuak ve ta a; inthlan hmaa an insawi ang, tih tur leh tih loh tura an sawi leh intiamnate an hlen ta em tih chu Zoram mipuite a hretu kan ni.
Mizoram sawrkarin inthlan auhlaa an neih, kan ti ve lo ang an tih te, kan ti ang an tih zawng zawng an bawhzui dan kan hmu mek zel a. Mipui lungawi lohna a thleng tam tial tial a nih hi. Trump-a thlan tlin a nih ruala amah thlawptute'n Pathian an fak kha a hmuhnawm ngei mai. Trump-a hian a intiamna kal tlangin a thutiam a bawhzui ngei dawn tih mi tin hriat a nih vang a ni. Keini Kristian ramah erawh a ni ve ta ṭhin si lo a nih hi.
Kan ram hruaitute hian an thutiam tihhlawhtlin chu inthlan leha tlak phahna tur pawh ni dawn mah se, an kaltlangpui ngam hun hmuh a va châkawm ve tawh tak êm! Pu Duhoma hian thu ṭha a sawi hnem tâwk tawh a; tunah chuan a thusawi ṭha tak takte a taka a bawhzuina hmuh mipuiin kan nghakhlel tawh a ni. An thusawi ang hian a bawhzuina hmu ngat ila zawng, inthlan leh hunah a hranpa taka campaign buai ngai lo turin Zoram mipui zingah thil ṭha duh, mi dik leh rinawm kan tam tâwk tih a lo lang mai tur hi a ni a!
US president inthlanna leh Donald Trump-a'n a thutiam anga a president hun chhûnga ro a lo rêl tawh dan, a la rêl leh dan tur hian kan ram hruaitute hi au harh mawlh rawh se. Kan ram leh mipuite thinlung chhe tawh tak hi kan ram hruaitute hian a chhe zawnga an hruai sual deuh deuh kan mamawh tawh lo. Theihtawp chhuaha min siam ṭhat tuma an thawhrim hlan kan nghakhlel ve tawh êm êm tawh a ni zawk e.
- Lalremliana Pachuah