CHHIMBIAL VOLLEYBALL CHAMPION 1958

Kum 1958 April ni 3 hnua Chhimbial Huap Volleyball Nomawi latu S. Lungdai chanchin kha engtin maw?

Ṭhangthar nula tlangval, volleyball ngainatute la hriat ngai loh, kum 1958 April ni 3-a chhimbial huap volleyball nomawi lian ber inchuhnaa team 32 suat zotu S. Lungdai khaw chanchin kha Aizawl District Volleyball hruaitute chuan kum 50 aia rei tawh hnuin an lo hre thar ve a, an rawn bawhzui nghal a. Pu Isaka inti chuan phone call-in min rawn bia a, tihian a sawi a: Aizawl District Volleyball hruaitute chuan Zoram chhunga volleyball tournament hnuaia champion hmasa leh tournament buatsaih hmasa berte record-a vawn ṭhat atan tia hmun tin kan dap mek laiin, Zorama tournament lian ber leh hmasa ber chhimbial huap volleyball champion hmasa ber S. Lungdai khua in ni thei hi kan lawmpui che u a, in champion hun lai chanchin leh a kaihhnawih awm theite ziakin min han hrilh ta che a han ti a. Ziakin nomawi lungphun thlalak thlengin ka thawn ta a, an lo hmuh thu leh an record thu ka dawng.

Nomawi lak chungchang hi kum 66 lai a liam hnu khan ti hian ka ngaihtuah ta a. Volleyball tournament lian awm hmasaa champion awm thei hmasate hi volleyball chanchin atan chuan history hmasa ber a ni a. History hi chu volleyball chauh pawh ni lovin thil dangah pawh a rei tawlh tawlh a, a rangkachak telh telh a ni an tih ṭhin kha maw, tiin kei chuan he tournament hmasa ber chanchin ziak thei hi an awm tawh loh laia ka ngawih reng hi chuan a fel lo ve tiin a tawi thei ang berin ka han ziak ta a ni.

Aizawl lam district volleyball hruaitute hmar bial lam volleyball hretu kamchhuak aṭangte pawh hian kum 1958 April ni 3-a volleyball tournament awm hi a lian hmasa ber a nihzia a tichiang leh zual awm e. Lunglei District Volleyball hruaitu GS Zama inti pawhin phone-in min rawn bia a, volleyball champion chanchin Aizawla i thawn ang kha min han thawn vel la, record-ah ka duh a rawn tia. Ka thawn a, an record tih ka hria. Tin, Chhimbial Huap Volleyball Tournament buatsaih hmasa bertu hi District Education sub-inspector Pu Biakliana Murray, Lunglei a ni.

1. A hun – 3rd April, 1958

2. A hmun – Lunglawn, Lunglei District

Hmanlai inkhelh dan leh tunlai inkhelh dan an inan loh dan chu, hmanlai chuan kan inthlak kual ve lo va, tunlai chuan an inthlak kual. Hmanlai chuan mual kan neih zim avangin volleyball khelh kan uar a, volleyball khel na nâ nâ chu a tawlhpanalin kan thiam a, kan vawng bel hle. Inkhel ni 3rd April, 1958 a lo thlen chuan Lunglawn Field chu kan pan sung sung a, thingtlang khawsak leh khawpui khawsak a inthlauh avangin thingtlang ho chu arkhual ang dêkin kan ṭi a.

Kei inti ho team 32 zet mai chu mual zawlah kan innâwk thâng huam huam mai chu pui tak a ni. Zing ni chhuah aṭanga chawl lova ni tlak thleng kan inkhel ṭhin chung pawhin kan la inkhel kim ṭha hman lo va. A tawp lam kan hnaih aṭang chuan a khel ṭha zual team zing aṭanga thlan chhuah Tv. Lalrinawma, Lunglawn team bawn lutuk an tih te, Tv. Pasanga, Hnahchang team centre zei lutuk tih te, Tv. Lalkunga, N Mualṭhuam Lentlangpui drop chat thei te, Tv. Lalrina, Khawngbawk Lalfapa Team an tih te, Tv. Remthanga, S. Lungdai, Speaker Lenbula, che zei mi bum thiam an tihte nen kan han inkhel ho chu a entute mit pawh a tlai hle. Mualko ‘A’ team-te thawm pawh ring tak a ni. Nomawi latuah pawh ṭang se kan ṭhiante hi awm tak vek an ni. Final-ah Khawngbawk lal fapa team Lalrina Team leh S. Lungdai khua Remthanga team-te chu a tawpah kan intum ta a, min entu mipui pawh an tam hle. Ball kal chak lutuk kha a tle zeuh zeuh a ni tih khawp a ni a, lo dawngtute’n an lo tlukpui pawh kha awm tak a ni. Mualko ‘A’ team-te lah chuan a nâ a nia, a nâ a nia tiin an lo au dur dur ṭhin a, boruak a sangin a bawn hle. Boruakah ball rei tak tak a kâng ṭhin a, mipuiin an hlimpui hle. An thlirnna lamah an thaw a chhamin thâwk lak nachang pawh an hre nange maw tih turin ball kâng chu an thlir a. Chutih laiin Remthanga’n dropper-a a special-na lantirin lên (volleyball net) bulah mi a lo buan chhen ṭhin nen, a tawpah chuan a vanneiah S. Lungdai chu ṭangin, chhim bial huap nomawi chawitu kan ni ta.

He tournament-ah hian Tv. Remthanga hming a lar hle mai. Nomawi changtu team captain Pu Lalzinga chuan nomawi chu sang takin a han chawi a; Lunglawn khua leh Lunglei khawpui khâwk rum rum khawpin kan han ‘hip hip hurray’ thâng huam mai chu pui tak a ni. Zan a lo ni ta a, Lunglei daktawr sapin tlang aṭangin kan khua chu torchlight êngin ‘dot dot dus’ hmangin kan va bia a. Nula leh tlangval min lo chhawntute chuan naktuk in lo hawng hmuah laia ei tur zaninah Zo chhangban tui tak kan chhûm ang a, kan kang bawk ang a, kan tlaivar ang an rawn ti a.

Keini team hote pawh nomawi lak zan chuan kan mu thei bik lo. Kan helhhawlh a, kan zauthau. Kawlhawk Tlanga thlasik laia Lawksiala vausa koh apiangin a ei thei e an tihte pawh kan ang ve deuh awm e. Koh apianga ei thei tawk chu kan awm zankhua a ni. Tukṭhuan ei kham chuan kan khaw lam kan pan ta a. Lunglei Chanmary pheiah chuan in hnih pawi company leh thingpui dawr in khat lek awm chhun chuan thingpui a lo zuar a, kan zinga a phawk zualte chuan ‘Ka pi, i thingpui dawrah hian sechal i zuar lo maw, nomawi aih nan kan lei duh e?’ an han ti fiam a. Kan va han nui ring tak em! Kan khua kan thleng ta a, kawtchhuah lungphun awmna hmun ngeiah chuan mipuiin min lo hmuak a, chhangban tui tak leh thingpui thlum leh tui vawt leh ei tur chi tinreng nen; kan va tlai tak em.

Nomawi aih ni a thleng ta. Lungchem khaw bawng chal tlangval hovin an zu kaih chu fatute’n an talh a, hár mei an rât a, an chhûm a. Laltlawm mei tuah keite tiat van vaw zuai zuaiin mei an chhawm a. Kan lalpa leh upa hote pawhin min hlimpui thiam em em a, an mawng pawh an hûng hman bik lo. Nula leh tlangval hote chuan inkaihkuaha insâwi dual dual khawpin an zai a. A ṭhen chu mawng kawi ṭawng ṭawngin an lâm a. Fatute sa chhum rimin hnârah min lo ur bawk nen, meng phal mang lovin ‘Mizo kan ni kan hmel a ṭha, kan tum a sang bawk si’ tih hla te, ‘Hlim rawh u, nui rawh u, hahahaha’ tih hla te, ‘Tlangin min sêl lo ru, len lai kan chen ve e, lenlai nite hi aw kan la ngai dawn mang e’ tih hlate chu ruah vanpui bang theh ang ṭhuai ṭhuaiin kan han sa a.

Zaleng rual kan hlimna leh lawmna ni se,

Leng kan kim e, mual a zau laiah,

Hnam fing sang zawk dan zirin,

Chhim bial final khel tumin than tum val,

Kan ngîrna mual a zau mang e.

Aw ṭang rawh, aw ṭang rawh mi lo ti e,

Tleitiri chuan a lo ti e mual sirah,

Leng tin aurawl thangkhawk chuan,

Kawr tin a zui mual a liam,

Nomawi lak tum val kan than a sang ber e.

Ṭan zairel hmasawn tum val an zam del del,

An thlan dartui ang a luang liam e,

Tuihal dangro hmel an pu, mahse an hmel

A hlim si, chu ngei chu inelna thianghlim chu a ni.

Hranghlui val rual an thanna buannel ram dai,

Fam hlau reng rengin sa hrâng an zui,

Kum leh thar hun a lo ni rual khûm tum dan,

A lo dang damte’n sappui nomawi hmingthang an hlan e.

(‘Aw Ngaihzual, Aw Ngaihzual, rairah riangte’n ka cho rual loh Rualkhumi’ tih thlûka sak tur a ni.)

Ruai kan kil ta, upate an ṭawng chhuak kan bawngsa chu a sa tui chi, a lei hang sa a ni an han ti a. Nomawi lungphun hmel kan hmu. Champion lungphunna hmun S.L.D.

CHAMPION CUP
3 APRIL, 1959

P L A Y E R S

Tv. Remthanga (L), Right Spiker

Tv. Saitluanga (L), Left Spiker

Tv. Chhuanawma (L), Centre

Tv. T Lalzama, Centre

Tv. T Rothanga (L), Centre

Tv. T Thanzauva, Right Wing

Tv. Laluapa (L), Left Wing

Tv. Lalrova (L), Centre Back

Pu Lalzinga (L), Team Captain

Lungdai khuain nomawi kan lawm laia ṭhalai zozaite leh mipui tam takte kha tunah chuan kut ṭang zat tak kan ni ta; dam chhung hun hi a va rei lo em! Ṭhalaite’n in ṭhat lai hun chên u la, in la naupan viau lai hian hlim rawh u. Pathianin in chungah ro a la rel dawn si a (Thuhriltu 11:9).

Thu tlangkawmna

Pu Biakliana Murray volleyball tournament lian awm hmasa ber buatsaihtute hetih lai huna volleyball nomawi latu team zinga mi pasarih thurawn lakna turte’n hun rei tawh tak aṭang khan min awm lohsan tawh avangin sawi awm tak sawi lohte tam tak ka nei ang tih ka ring. Tin, sawi loh tur sawi palhte pawh a lo awm a nih pawhin, hruaitute’n min hrethiam se. He volleyball tournament hian tournament lian zinga hmasa ber nihna leh history pawimawh tak a ken tel avang hian hriat zui lohva a thâmral mai loh nan kum 66 a lo thlen hian mumal taka pho chhuah a lo ni ta a ni.

- T Lalzara, K. 94, Tlabung,

Phone: 6909592580