Zu leh sum hi engkim a ni

Mizoramah chuan sual zawng zawng bul chu zu niin kan puh a, chu chu kan kohhran hawiherah pawh a hriat tih hi kan zavaiin kan hmu thei awm e.

Chutiang bawk chuan sum neih hi fel leh ṭha nihna a ni leh bawk a, chu chu thiam ang tawk tawkin sawifiah ka tum a, a fiah tawk loh chuan kei aia thu leh hla thiam loin rawn chhunzawm thei se kei chuan he ka thu ziak hi a hlawhtlingah ka ngaih phah ang.

Zu in chu sual an ni a, zu permit nei phei chu a sual em avangin kohhran rawngbawlnaah pawh an tel ve thei lo a, zu in mi tluka sual hi an awm lo. Thil dang, ruk lo ru tawh emaw, ṭhen­awmte ramri nêk chep ching emaw, Bible huat em em chapo leh intivei deuh emaw, a thil neih aṭanga eiru tih hai rual lohte pawh rawngbawlna chelh thei lo an ni lova, kohhran ṭhenkhat chuan zu permit nei dek dek chu an rawngbawlna hlihsak an tum a ni awm a, zu hi sual zawng zawng bul a ni.

Sum hi thil zawng zawng siam ṭhatu a ni leh chiah bawk a, tun hnaia kan ṭhiante sawi hmangin Mizorama mi langsar ṭhenkhat hi an sum hmuhna a thianghlim lo an ti a, mahse an sum neihte midang tana an pek chhuah avangin mifel leh chhandamtu angin kan sawi kan sawi leh si a tia lawm. Tunlaia hausa lang­sar zingah hian damdawi kheh aṭanga bul ṭan nia rinhlelhte an awm a, ṭhenkhat chu sum­dawnna lian nei tawhte an ni a, an hausak hnu chuan an fel hmel leh tawh a nih chu, a mak ṭhin a ni kan ram hi chu.

Mi hausa ṭhen­khat hi chu an his­tory lam han chhui ila, harsa tak aṭanga thawhrim vanga hausa, hun rei tak inkhawla tichho bek bekte an awm a, ṭhenkhatte phei chu hna hniam ber aṭanga hausa ber thlenga intuaka hlawh­tlingte an awm a, an fakawm ka ti.

Ṭhenkhat hausa langsar ve tak si, sorkar hnathawk eiru tih chiang bawk si, a thawhpuite'n an nuih ruk deuhte pawh an awm a, sum an neih tak avang­in kohhran leh khawtlangin mifelah an pawm leh lawi bawk si a ni awm asin mawle.

Ka ngaihtuah ka ngaihtuah hian, zu hi sual zawng zawng bul, zu in ṭhin pawh mi sual ber niin kan hmu a; sum nei chu a sum neihna lam kan chhut sak duh tawh lo a, a sum a hman danah midangte a tihlawm chuan mifel leh pa ṭha berah kan chhuah leh si a, zu leh sum hian Mizo­ram hi a tibuai a nih hi tih hi ka ngaihdan, mi hriata ka share ve duh chu a ni.