Leitlangpuiah kûtpui kan ur e
Khawnge ziakfung chawia duhthu lêng han sam leh seprawtui hluam hluamte a khat ta e. Kan hma lawka Leitlangpuiin kût a dawl tur denchhenin dawt ni lo, thu puarpawlêng i han lêntir leh dawn teh ang.
Tun hnai kum eng emaw aṭang khan social media-in thil a ti theiin a ṭhang chak hle mai a. Hei vang hian ziaka thil dahṭhat te, chanchinbu hlutnate hi a tlahniam deuh em aw a tih theih a. Chutih rualin, social media kaltlanga hmasawnna hmuh tur tam tak a awm bawk.
Social media kaltlanga hmasâwnna chungchâng han sawi takah chuan Mizoram dung leh vâng mawinate leh kan Zo fate mizia mawi tak takte leh kan theihna hrang hrang hmuh tûr han awma kan thiamnate pho lan theiha a awmte hi a ṭha viau mai.
Ka lo vei êm êm ṭhin, Zoram mawina hmang ṭangkaia khualzin mite hîp nana hmalak theihna hmanrua a hmanga Tourism Department-in an hmang ṭangkai êm êm hi keini tân pawh hmuh nuam a tling a. Mizo YouTuber zinga ka ngaihsân êm êm Zira PC-in kan ram leilung mawina hrang hrang a lo pho chhuakte han hmuh hian kan ram hi khualzin mite tâna tlawh chakawm tûr leh hmun mawi tak tak hi kan ram hian a lo ngah hle mai tih min hriattir a. Tourism lam pawn hma a lak zel ka beisei a ni.
Kan hma lawkah kan khua ngei maia kûtpui lo thleng tûr kan ur mup mup hi ka thai lang châk tlat mai pek a. A sakhming atan Leitlangpui Music Festival han tih rup mai hi ṭhenkhat tan chuan pai dam a har ngei ang le!
He kûtpuiin a tum leh a hmachhawpte thlir chiana han zir chian chuan Tourism department hian pheikhai rualin chhim leh hmar thliar lovin ruahmanna a siam tih hi hai der luih tum ṭalh ni lo tan chuan a hriat theih awm e. A ṭum khat nan Tourism department hian kûtpui pahnih kumin hian min chhawp sak dâwn a. Zawlkhawpui lamah Winter Festival leh Leitlang lamah Leitlangpui Music Festival te a ni.
Leitlangpui Music Festival hi 14th-16th November, 2024 hian Kawmzawl, Pukpuiah neih a ni dawn a. Kum 1932-a Mizorama concert neih hmasak ber, Serkawn Concert-in zaimi leh hla phuah thiamte a chawi lâr nasatzia kha nghilh mai lo va, chumi tharthawh leh nan Leitlangpui Music Festival hi duan a ni. Chumi piah lamah hmathlir thui tak neiin, khawvel ram hrang hrangte hriat hlawh tura kalpui tum a ni.
He festival-ah hian kan Mizorama zaithiam lar tak takte leh tun hnaia LPS Icon pakhatna Lalsangliana te an zai dawn bakah, beat group ṭha tak tak, India ram pum huap inelnaah pawh zu che hle tawh Avora Records pawh an inlâr dawn. Heng bakah hian food stall te, Mizo thar thil pholanna te, Mizo hnam lâm hrang hrang te, Leitlangpui Music Festival Museum leh naupang intihhlimnate a awm dâwn a. Lawmman ṭha tak dawn theihna tûr beat group inelnate a awm dawn a ni awm e.
He Kûtpui hi Leitlangpui Music Festival tih a ti tak nâ a, Zoram pum huap mai ni lovin, Zo fa tawh phawt tan leh Zoram chawi vul zêlna tûr a ni a. A sakhming erawh a dâwltu hming chawia vuah mai a nih hmel. Chuvângin, Zoram timawi zual a, tivul theitu ṭheuh kan ni tih hria ila. Kan Kûtpui ur mêk hi Zo fate’n âm tak leh nuam taka chhim theuh turin kei Leitlangpui vâl hian ka rawn sawm ve khut che u a ni e.
- Jemato of Leitlangpui