Ramhlun kawng kawi
Ka nitin eizawnna kawnga ka kal pelh fo mai Aizawla Ramhlun veng lama kawngkawi ṭhenkhat awm dan hi tun hnai kum nga chhung chu ka ngaihtuah ṭhin a, sawi chhuaktu nih hi mi pawi sawina a ni tih hlau chung pawhin insiamṭhatna a nih theih dawn chuan a ṭha chu ka ti khawp mai.
A bul ṭanna atan chuan Zirtiri College kawt kawng kawi hi sawi ila, Aizawl Venglai huam chhung ni zawkin ka hria. Zirlai leh zirtirtute motor leh bike hi a ding tam ṭhin si a, an indin thuah bawk a, kawngpui zau lai tak hi a zim laiah a ṭang ta daih a, a kawng kawi hi a blind bawk si. Traffic Police a nih loh chuan Venglai lam Local Council hian an enpui loh chuan insut pawh a hlauhawm bakah traffic a jam phah nasa a ni.
A piah deuh Ramhlun South Biak In chhim lem leh hmar lam, Biak In thlen dawn kawng sira motor dah avang hian zing leh tlaiah traffic a jam ngun a, hun tam tak kan paih a, office pawh kan tlai phah ngun tawh asin. Ramhlun South leh Ramhlun Venglai inrina chiaha kawng kawi hi a bula in an sak hnu hian a zim thut a, tun hmaa JCB dinna ṭhin kha a ni a, a kawi laiah tak kawng chhak leh thlangah motor an park ṭhina traffic a jam phah ṭhina thuneitu lamin parking hi khap e ka ti.
Ramhlun Industry mual thlen dawn kawng kawi pawh hi a zim tawh hle a, telephone khawl kawng sira ding ṭhin pawh kha tunah chuan in pakhat an sak hnan a ni ber tawh a, hetiang hi a buaithlak khawp mai. Han pêng ta lawk ila, hemi chung zawn kawngpui berah pawh bike an zawrhlai hi tun hmaa kawngpui, thirban aṭanga kawngpui lamah an tlar tawh tlat mai a, hei hian tun hnaiah kawng a tihzim phah nasa hle.
Kawngpui berah tho hian a kawiah tak motor silna a awm a, parking na uluk loh avangin lirthei kal an tibuai ṭhin a, chumi piah lamah kawngpui pawhin hman deuhah khan a chhiat phah nasa hle tih kan hmuh kha.
Heng kawngpui hi ka zawh ṭhin a nih vangin ka sawi chhuak a ni a, veng danga kal ṭhin pawhin sawi tur an neih ve ka ring a, Local Council leh Traffic Police lam hriat atan ka sawi a, AMC lam chan a ni tawh zawk mai thei bawk a, tichuan thuneitute hian kawngpui humhalh, parking tihfel lam hi kalpui zel thei se tih hi ka ṭhahnemngaihna a ni.