POLITICS

Mizorama mipui tam berin Politics kan hriatthiam dan chu - thuneihna leh lalna inchuh (Sorkar siam) hi a ni. Politician kan tih zinga tam tak pawh hian chu chu an ngaihdan niin a lang. Engti zawng pawha thuneihna chan hi an tum ber a ni. Chumi atana a chaw chaha kan hman ber chu Development a ni a. Policy kan insiam ṭhat siak a; policy ṭha neih ai maha kan la ngaihpawimawh zawk chu, 'Engin nge mipui hip ber ang?' tih hi a ni. Congress-in NLUP an sem a, party dangte chuan sawisel reng chungin a aia tam sem dan an duang chhuak thlap mai a ni. Hnam leh Ram erawh chu kan agenda-ah hian a tel pha lo em em a. Opposition an nih laiin mipui te rilru thawi nan vei awm tak te chuan an insawi ṭhin a, an chetziaah erawh chuan hmuh tur pakhatmah a awm lo. Hei leh chen kan ṭhenawm nena kan ramri kan ngaihthah theih danah hian chu chu a chiang reng mai a ni.

State ramri chungchanga kan sorkar ten an duh ber chu- an sorkar laia buaina a thlen loh hram hi a ni. Thil eng emaw lo alh chhuak hlek a awm chuan official te tlantir vat vat a, hmehmih vat vat, remna siam thuai thuai leh thil a pangngai anga dah theih hram (status quo maintain) kha an tum leh duh ber a ni. Mizo mipui te thinlung erawh chu a dam chuang miah lo a ni. MNF hunlaiin Vairengte daiah MZP-in Zorun an sa a, zankhat pawh a riah hmain Mizoram sorkarin a ṭhiahsak leh nghal a ni. Politics in a tum, Hnam himna leh zahawmna te chu an tihchhan a nih hmel loh a ni. 'Kan lal chhung hi chuan buai rih lo e,' tih chiah an ngaihtuah a ni.

Tunhnai Congress hunah pawh hian kan buai chinfel dan chu kan hmuh ṭheuh a ni- official te tlantir vat vat a, a ngai anga awm tura 'remna' siam vat vat kha a ni mai.

Mi hnam hruaitute leh kan hnam hruaitute inanlohzia entirna pakhat chauh han sawi leh ila- 1995 velah khan Arunachal-ah Chakma leh Hajong te hnawhchhuah tumin Student Movement a chhuak chiam a. A lo chhuahna chhan chu Election Commission-in Electoral Roll-a thun tura a tih vang a ni. Hetihlaia an State-a thuneitu chu Congress sorkar, Gegong Apanga hote an ni. Anni chuan Student te kha an vuain an man ve lo a ni mai thei. Sorkarin a tih zawk chu- Electoral Roll-a Chakma te thun ai chuan Election hi kan Boycott ang, Kan nihna ang zawng zawng- MLA leh Minister te, bakah, Central lam nena an inzawmna zawng zawng, an party nihna thlengin- kan bansan ang, an ti a. Chumai bakah, MLA hote kha Delhi-ah kalin Boat Club-ah nawrhna an zuk nei a ni. 'Election Commission-in thun rawh u, a ti alawm' tih vanga State pawna pemchhuak Tuikuk te kan umzui a, E Roll-a kan thun hram te nen chuan ram leh hnam chu a inhim hleih ngawt ang le.

Mi ṭhenkhat chuan hmasawnna 'Development' hi Politics ni berah kan ngai niin a lang. Hmasawnna chak hi thil engkim chinfelnaah kan ngai niin a lang. Hei vang hi a ni ang, Central fatlum tih te chu inzawrhna ṭha takah kan hmang ṭhin a ni. Amaherawhchu hmansawnna ringawt hi Politics a ni lo tih kan hriat a pawimawh leh khawp mai. Ram ṭhenkhat, hnam thenkhat, ram hmasawnnain a nekchep em em te, ram hausa, a ram leilung fate rethei em em si te pawh sawi tur kan hria ang. Kan hmasawnna hi mi tlemte vanneihna leh a tam zawk te 'hlawhfa' maia min siamtu tur a ni thei a. Kan hnam nihna leh kan hnam nunphung min hlohtir vek theitu a nihna lai te pawh a awm thei a ni.

Development tel lo chuan kan kal thei lo, amaherawhchu amah lawng lawng hi chu Politics ber a ni lo tih kan hriat a ngai. Mizoramah hian development hmachhuanin Party ṭhen­khat ten ram lak an tum mek; kan cul­ture, kan sakhua, kan hnam a him em tih hi kan tehna hmasa a ni tur a ni.

Chutichuan, kan ram politics-ah hian 'change' a ngai a ni kan tih hian, 'Anni aiin kan ṭha zawk ang, Corruptionah kan fihim zawk ang, sum kan hailut hnem thei zawk ang' tih mai ni lo deuh, politics lungphum- Ram leh Hnama innghat Politics, engkim aia Ram leh Hnam dah hmasakna- Hnam dinchhuahna, hnam himna, hnam zahawmna; ram nuam, ram zalen, ram thianghlim nih hi a tum a ni tur a ni. Chu Ramtiam (Vision) thleng tura hnamin a beihna kawng hi Politics chu a ni a. Chu hna chu mahni hna (Personal Mission) anga ngaia inpe te chu Politician kan tih te chu an ni.

Politics hi a ṭobulah a dik loh chuan a ler lamah dik kan beisei ringawt thei lo. Zirtirtu te hi hnam siamtu an ni kan ti ṭhin a; zirtirtu kan lak dawn erawh chuan a thiam thiam ai chuan Ruling Block President fapa te kha lak an ngai leh tlat ṭhin. Chu chu lal khelh politics in a hrin chhuah chu a ni. Sorkar sikul, Primary level-ah te chuan, khawpuiah phei chuan zirlai tur pawh kan inhmu ta mang lo a nih hi. He entirna chauh aṭang pawh hian Politics innghahna lungphum dik leh dik lo hian a kal zelna tur kawng a hril nghal a, thil engkim inthlunkhawmna chu politics hi a ni tih a tichiang hle a ni.

Chuvang chuan, a ṭobula fuh tawh lo, a nihna tur ang tak ni tawh lo kan politics hi chu, mi tharin rilru thar nen siam ṭhat tumin bei bei mah ila, puan hlui mawih tawh, puanthem thara bel ang chauh a ni ang. Chu ai chuan bul ṭanna dika bul kan ṭan leh hi a ngai a ni. Tuna kan ramin a mamawh ber chu, rilru dik tak pua ram leh hnam tana inpe Politician te an ni. Kan inpe thei em le?