Mak ka tih em em te

Sorkar hnathawk sumdawng

Sorkar office hrang hrangah "thil zawrh phal loh" tih intar reng si a, thil zuar tei suau suau reng si hi a mak ka ti. Hei hi sorkar inrelbawlna mumal loh zia lantirtu pa­khat niin a lang. Tin, office a thawk zingah sumdawng/thil zuar an tam bawk. Sorkar hna bansan phal silo in Bangkok, Hongkong leh China vela thawm­hnaw laa sumdawng eng­emaw zat an awm reng hi a mak ka ti.

An bungrua te chu Airport-ah, zirlai thawmhnaw karah te an thukru a, chhiah an awlru zui bawk a. Hetiang hi eirukna anga kan chhiar duhlo anih loh pawh in, sorkar hna in a phalloh thil a ni tih hretu te tho an ni si. An zin hlanin tunge an hna lo thawk ang? Sumdawn an duh anih chuan sorkar hna bansan mai sela a kristian zawk in ka ring.

Sorkar hnathawk biak har

Mizorama sorkar hnathawk zinga biak har chu nuho an ni zel a,chutiangbawkin bank-a thawk zingah pawh nutling biak har tak tak an tam hi mak ka ti. Hetih lai hian ṭhalaiin an dawr tam department-a thawktute biak an nuam zel thung.

Kumin kumtir khan AH&Vety dept. chuan minister hoin inhlantharna hun an hmang a. Minister chuan "Hmelṭha deuh si biak har deuh te in awm ange. Min dawrtu te hi an hmel leh thawmhnaw hak aṭangin in teh tur a ni lo. Angkhat veka ngaihsaka, biak tur an ni" a ti a. Minister fuihna hi a dik khawp mai. Thingtlang mi an ni emaw khawpui mi pawh nise biak ṭhat deuh bik an neih hi a thianglo reng a ni.

Website nei si, vil ṭha chuang si lo

Mizorama depart­ment tam tak hian Website an nei deuh vek a. Mahse vil ngun (update) loh leh enkawl mumal lohin an rula raw neih mai mai niin a lang. An department chanchinthar leh hlawhtlinna te, hma­lakna te en duh pawh ni ila en tlak a awm lo. Kum liam ta a hmalakna leh hlawh­tlinna te an lang tuar a ni deuh mai a, an update ṭhalo vel vek a ni. A enkawltu tur, a khawihthiam an la ngei awm si a,enge a thawk tak ang le? Lak anihna berah chhawr loin thil dang an thawhtir ta mai em ni? Department puitling chuan mi­puite chhiar leh hrilh duh tam tak an nei ang. Mahse an hmang ṭangkai si lo hi mak ka ti leh pek.