Darkar 1-a hma thih hreha hreh tur a ni lo!

Whatsapp-a message ka dawn pakhat chu, "Mahni fate zing dar 8:00-a sikul kaitir hman lo, mi fate zing dar 8:00-a sikul kal tur dang hman an awm," tih a ni a, ngaihtuah a tithuiin a dikna a tam hle. Chutih rualin an sawi ang ngawt hi chuan sikul ṭan hma hi chu a awlsam lova, chhungkaw tam tak tan chuan buaina thlentu chu a ni ve chiang ani. He buaina hi ka ngaihdan chuan chinfel tum tur a ni a, pumpelh zawn chu ṭha ka ti lo.

Sikul ṭan hma hi zing dar 9:00-a ṭan ṭhin dar 8:00-a sawn hma tak mai kha a ni a, Aizawl-a tan tih pawh ni lo Mizoram pumpui tana tih a ni a, khawi emaw laia "Aizawl ho traffic jam vang," tia lo lak nat lutuk tur pawh a ni lo. Politics nena lo chawm pawlh vak vak chi pawh zuk ni suh. Sorkar pawhin 'enchhin' a ti na na na, "Aizawl ho tana tih hi kan zawm ve tur a ni lo," tia infuihpawrh kan awm hian kan rilru zimzia leh kan ngaihtuahna a zau lohzia a tilang bawkin ka hria.

Sikul chu eng vanga ṭan hma pawh lo ni tehreng ila, darkar khat leka hma chu kan khuain kan buai phah dawn bik em ni? Mi khua pawhin an theih chuan kan thei ve zawk dawn lo em ni? Kan fate dar 7:30 velah kan thlah liam ang a, hun thawl ṭha zingkarah kan nei ang a, zan mut hma leh zing thawh hma pawh hi hmasawnna a ni tawh bawk si a, an enchhin chhung na na na hi chu in adjust ve tum ila, chu pawh chu darkar thuma tawlh dawrh a ni lova, darkar khat leka tawlh hma a ni tih hi rilruah i vawng ang u. Hei hi politics-a pawl-pawl leh khua-khua boruaka chantir tum lui an awm a nih chuan nakin lawkah an la mualpho phah zawk theiin ka ring.

Tichuan kan sawi chhunzawm zel ang a, ram pum huapa inthlak a nih avangin tute emaw tan a ṭha ang a, tute chhungkaw tan emaw chuan a ṭha lo mai ni loin pawisa leh hun, eizawnna thlenga nghawng thei thil ṭha lo a ni ngei ang. Heng hunah tak hian sorkar hian tehna fel tak leh zirna mumal tak nen thil a chhût a ngai dawn a, chutah chuan "A hlawkpuitu nge tam a tuartu?" tih hi a tehna tur a ni.

Tute emaw kawm kuala ngaihdan lak mai mai hi tehna a ni lo, uluk takin survey la se, systematic lamin analysis kalpui ni se, chumi hnuah chuan an enchhin period a zawh hunah ngaihtuah ta se, darkar khata ṭan hma hi kan hlawkpui chuan chhunzawm ila, hlawkpui lem loh chuan dar 9:00-ah ṭan leh mai ila, lak nat lutuk tur a ni lo e.