Doctor-te hi an va fakawm
Mizoramah Mizo leh hnam dang doctor kan nei ta nual a, a tam zawk chu sorkar hnuaiah an thawk a, mi eng emaw zat chu private hospital-ah an thawk bawk a. An vai mai hian an hnaah theihtawp an chhuah niin a lang a, an va fakawm ṭhin em!
A bik takin sorkar doctor, Civil Hospital-a thawkte hian an hna an ngai pawimawh hi ka ti ṭhin. Civil Hospital, Aizawl chauh ni lo, district hospital leh hospital tenau zawka thawkte hlei hlei hi an fakawm thlawt mai. Hman ni khan an nau driver pakhat Thenzawl kawngah a chau a, auto rickshaw-in Thenzawla Ayush Hospital-ah an lo admit a. Doctor leh thawktu dangte'n uluk takin an lo endik a, a natna pawh hmuhchhuah a ni nghal a. Khata doctor leh thawktu dangte fakawmziate kha ka theihnghilh thei lo.
Civil Hospital, Aizawl doctor zingah Dr Zothantluanga ka pan tam hle a, a ṭawngkam a dam a, damlo a ngaihsak em em a, a hnena inentir kha a nuam ka ti ṭhin. Damlo a en karah pawh hospital aṭang phone call a dawng fo a, damlo enkawl zui zel dan turte ngainatawm takin a hrilh a, call a chhang ṭhin a, a ngaihsanawm khawp mai.
Aizawl Civil Hospital bik han sawi leh ta ila, Medicine doctor hmeichhe pakhat ngo lam deuh, nu lian vak lo pawh kha a ṭawngkam damna tham a ni. Pitar pakhat a enfiah lai uluk deuhin ka ngaithla a, a damlo en mek nen khan ka hmehbel a, a ṭawngkam a va ngaihnawm tak em! Kha nu ang hlir kha doctor ni se, damlo tan an hlu leh zual dawn mang e, tiin doctor leh hospital ka ngaihtuah chhuah chang chuan a mit leh bengah a cham reng mai.
Sorkar doctor chang an ni lo, private hospital-a kan doctor-te pawh hi an fakawm ngawt mai. Damlo leh an chhungte an ngaihsak em em a, an hlâwkna tur emaw, hospital hlawkna tur lam aiin, damlo kha a dam leh theihna tur lam hlir an ngaihtuah niin ka hria. Chutiang doctor fel leh ṭha chu private hospital zawng zawngah hian an awm ni maiin ka hria.
Dr. H. Lalrinmawia @ Dr. Mawitea hi kan tihbuai fo a ni a, ani pawh fak loh chi a ni lo. Aizawl Hospital-ah a inbun a, damlo a ngaihsakin an a care em em mai a. Kei ngei pawhin ka râwn nasat ber zinga mi a ni hial awm e. Chutiang bawk chuan private hospital doctor-te hi sum siam nan ngawr ngawr damlo an enkawl bik hauh lo tih ka hriat phah nual mai. Kohhran damdawi in, Synod Hospital leh Serkawna Christian Hospital doctor-te hlei hlei hi biak an va nuam tak em!
Hetih rual hian, sawiselna leh demna thawm a awm ve fo avangin doctor zingah ṭawngkam bak deuh te, vîn deuh te, an hnena inentir leh an enkawl damlote hauva fin khur khur ṭhin pawh an awm ngei ang. Chutiang doctor-te chu lo inenfiah se, a chunga kan sawi tak doctor-te leh doctor dang fel tak tak mi tam takte hi entawn se. Kan doctor-te hian damlo ngaihsak kawngah hian hmasawn zel se, damlo tan pannahawm lo ni fo hlawm teh se.
- Lal Rinmawia