ZPM sorkar sum leh pai enkawl dan

Mizoram Chief Minister Pu Lalduhoma chuan December ni 8, 2023-ah CM nihna thutiam a lak zawh khan chanchinbu mite’n an kawmnaah, Mizoram tana a tih hmasak ber tur chu sum leh paia kan harsat avangin Year of Consolidation (insawhngheh kum) leh austerity measures (inrenchemna) kan kalpui ang, tia a sawi kha ka lo ngaithla ve a. MNF sorkar kal ta kan hria a, PAHOSS atan cheng vaibelchhe tam tak an hman dan te, SEDP-ah vaibelchhe tel an hman dan te, mau chinnaah a ṭiak leh a chingtute tan cheng vaibelchhe tel a luan ral dan leh, contractor Kamrula Chhangte hmanga sum an siam dan zawng zawng kan hria. Term khat (kum 5) chhung lekin Mizoram sorkar leiba chu GSDP aṭanga teha 20%-in a pung nghal a. Pu Lalduhoma’n Year of Consolidation leh austerity measures lak a tum thu a sawi khan ka thla a timuang tak zet a. Mizoram chuan hruaitu thar, a ngaihna hria CM kan nei dawn a, state dangte hian min chung en thuai dawn e, tiin awmhmunah kut ka lo beng a ni.

A rei lo, he a thusawi aṭanga hapta khat pawh tling lo, December ni 14, 2023 khan Adviser to CM atan MLA pali lai mai a ruat ta ṭhawt a, MoS rank vek an ni. A duhtawk tawh dawn emaw tih lain, December ni 16, 2023-ah MLA ni ve miah lo, ZPM General Secretary ni lai Dr. KC Malsawmzauva chu Adviser to CM atan ruat niin, Minister of State rank-a dah leh a ni a; Adviser to CM, MoS rank ṭhiau mi 5 an awm ta a ni. Heng Adivser to CM-te hlawh rau rau chu lo dahṭha ta ila, office a hran ṭheuha neiin, staff eng emaw zat an nei a. Office maintainace-na tel lo pawhin staff-te hlawhah hian kum khat chhungin cheng nuai 180 chuang a kal dawn a; uiawm tham tak a ni.

December ni 13, 2023 khan ZPM Vice President Dr. Kenneth Chawngliana chu State Planning Board Vice Chairman atana dah a ni a, Cabinet Minister rank-a dah a nih mai bakah, Cabinet Minister-te hamṭhatna dawn ang zawng zawng dawng ve vek tura tih a ni. Hemi order chhuah tuk, December ni 14, 2023-ah Adviser to CM tur order a chhuah rualin ZPM-a Consultant ni lai Pu Haukhuma Hauzel chu Mizoram Resource Mobilization Committee-ah Vice Chairman a ruat niin, MoS rank-ah bawk dah leh a ni. Hei mai hi duh tawk lovin December ni 22, 2023 khan Pu R. Lalrinawma, IRS (Rtd) chu Project Monitoring Committee Vice Chairman atan ruat niin, MoS rank-ah bawk dah leh a ni bawk. MoS rank hi an van uar tak! Cabinet Minister ni miah lo Cabinet Minister rank atan pakhat an ruat a, MoS ni miah lo mi pasarih lai MoS rank-ah an dah bawk.

MoS rank-a dah takte hi an hlawh a tam chuang lo kan lo ti a ni mai thei; tam lo mah se, an staff-te hlawh leh office enkawlna atan Mizoram sorkar sum leh pai tam tak a kal a ni tih kan hriat a ngai. Chief Minister hi IPS niin, vai ramah kum 7/8 vel sorkar hna a thawk a, intihropui leh intihlal hi vai zia a ni. Chu vai zia chu kan CM hian a la chhawm deuh emaw ni chu aw ka ti. Amah hual vel turin Adviser to CM atan mi 5 a ruat mai bakah, OSD to CM atan mi 4 lai ruatin, heng zinga mi 3 hi Secretary, Govt of Mizoram rank pek an ni leh a. Office enkawlna leh staff hlawh atan sum a kal tam dawn lutuk ringawt.

ZPM Vice President Rev. Dr. Thanzauva chu Education Minister pui turin Consultant atana ruat a ni a, thla khata Rs 35,000 hlawh tur a tih a ni. Pu Chalsawithanga, MSS (Rtd) chu Revenue Minister pui turin Consultant-ah tho ruat a ni a, Rs 32,000 a hlawh bakah, Joint Secretary, Govt of Mizoram rank pek a ni bawk.

Chief Minister-in Year of Consolidation leh austerity measures kan kalpui ang, a ti chunga board hrang hrang chairman-te hlawh Rs 8,000 aṭanga Rs 40,000-a an han tisang ngawt maite hi eng ang rilru nge an put ang aw tih ka lo ngaihtuah. Board Chairman atan MLA ni lo, party mite an induhsak tlat mai hi a mak ka ti a. MLA ni lai heti zat hi ZPM hian an nei a, Board Chairman-ah ruat ni se, Board Chairman hlawh a hranpaa tihsan a ngai dawn lo ni. Tunah chuan board Chairman-te hlawhah ringawt pawh kum khatah Rs 28,80,000 lai sen a ngai tawh a, kum 5-ah phei chuan Rs 1,44,00,000 lai sen a ngai daih tawh dawn. A hrim hrimin board-te hian hna an thawk em, Mizoram tan ṭangkaina an nei em tihte hi ngun taka kan ngaihtuah a ngai. Congress sorkarin board eng emaw zat a titawp kha kei chuan ṭha ka ti. Sorkar hi kan suih têt a ngai a, MNF sorkarin a rawn tharthawh leh kha a pawi tak zet a ni.

ZPM sorkara thuneitute hian engkim mai hi pawisa hmangin a hlutna an teh emaw ni chu aw ka ti a. AMC-a kan corporator leh LMC-a kan councillor ten autonomous district council-a MDC-te hlawh a phak lo tih vang mai maiin hlawh an tihsansak a. Pawisa hlawh chhuah zat aṭangin an zahawmna hi an tehsak ni tlatin a lang. AMC Mayor aṭanga corporator-te hlawh tihsan a nih hma khan an hlawha sum kal ral zat chu thla khatah Rs 4,50,000 chauh a ni a, hlawh tihsan hnuah Rs 9,95,000 a kal ral ta. LMC Chairman leh councilor-te hlawh an tihpun hma khan thla khata sum kal zat chu Rs 2,43,500 chauh a ni a, hlawh tihsan hnuah thla khatah Rs 5,52,000 lai sen a ni ta bawk. AMC leh LMC-a kan thlan tlinte hlawhah Rs 6,93,500 chauh kan senna ṭhinah tunah chuan thla khatah Rs 15,47,000 lai kan sen a ngai dawn ta. Hlawh tihsan hnuah thla khatah Rs 8,53,500 zel sen belhin, kum khatah chuan Rs 1,02,42,000 lai a kal dawn. He thil hi a pawi tak zet a ni.

MLA leh Minister/Speaker-te’n house furnishing-ah cheng nuai tam tak an hmang tawh. Housing loan-a nuai 20 ni ṭhin chu nuai 30-ah an tisang a, MLA-te car loan nuai 15-ah tihsan a ni bawk. MLA fund kum khata nuai 150 ni ṭhin chu nuai 200-ah tihpun a ni a. MLA-ten PA an chhawr ṭhinte hlawh Rs 20,000 ni ṭhin chu Rs 35,000-ah tihsan a ni bawk.

Heng ṭul lova sorkar sum hmanna leh hlawh tihsanna zawng zawng hi kum khat chhung lek pawhin cheng nuai sang chuang fe a tling. Kan CM leh Finance Minister ni bawk hian a khawi laiah hian nge Year of Consolidation chu an kalpui a, a khawi laiah nge austerity measures chu an kalpui? Year of Consolidation huam chhunga ṭul miah lova kan sum hman nasatzia hi kan ngaihtuah ngai em? Hetih lai hian, sorkar chuan mipui thau sâwk zawngin Stamp Duty 1% ni ṭhin chu 3%-ah a tisang a, ration card var neite tan buhfai a man toin a leitir a, tuialhthei man tisangin, sahuan en man thlengin an tisang ta zel mai a nih hi.

Tuialhtheia cess an lak san avangin tuialhthei man a to lo thei lo. Kan CM leh Finance Minister ni bawk chuan, cess kan lak hi mipui tana hman vek tur a ni dawn tiin a sawi a. Nimahsela, tuna an kal dan aṭang hian cess-a an sum hmuh hi mipuite hnen a thleng zo ang em tih hi ngaihtuah tham tak a ni. Contract hna inpek leh sorkar hnathawk lak chungchangah te, contractor ni miah lote’n hna an thawh hnem dan te, work supervisor an inruat dante han thlir chuan, cess hian mipui a thleng phak tak tak dawn emaw ni le, tiin ka ngaihtuah ṭhin.

Tuialhthei man tihsan nghawng a na hle tawh a. Bus fare, taxi fare, sumo fare, bungraw phurh man a sang vek tawh. A tuartu ber chu mi retheite an ni. Têl hi litre khat Rs 120 ni ṭhin kha tunah chuan Rs 150-te a rawn ni ṭan. Thingtlangah phei chuan engzat tak ni ang maw? Purûn ringawt pawh a to ta khawp mai. Miretheite khaichhuah tum ber ZPM sorkar hnuaiah miretheite hi a bet zawng zelin kan kal dawn emaw ni chu aw ka ti. Nakum March thla maiah budget session a awm leh dawn a, kan leiba hi kum khat chhungin an rûl ṭhen nge an bat belh zawk tih leh, kan sum dinhmun tlangpui chu kan hre thuai ang.

- Ma Liana, Sihphir Venghlun