Sorkarin sumdawng motor neitute lu chem loin an la
Dt. 26.7.2016 a State Transport Authority ṭhukhawm chuan motor kum 10 chuang tawhte chu sumdawnna motor atan hman theih a ni lo ang a, motor hluite chu a thara replacement tih a phal-sak a, replacement ti turin LMV te thla ruk chhung hun pe in MMV leh HMV te chu thla riat hun a pe a. Hemi hun chhunga replacement ti lote chu an permit cancell sak an nih tur thu an pass a. An thu pass hian chhungkaw tam tak eizawnna a nghawng dawn thui dawn hle a ni.
Kan State chu India ram State kilkhawr ber, State intodelh lo kan ni. Sorkara ṭanpuina beisei lovin mahni inenkawl theih tumin mi tam takin eizawnna an dap a. Hetianga Sorkar pawh pur buai lova mahni intungnung hram hramte eizawnna sorkarin a dan chah sak hmak mai hi chu a mak a ni. Pollution vang han ti dawn ila Mizoram State hian Industry lian leh factory lian pollution siam na sa chi pakhat mah kan nei lo a ni.
India ram khawpui ber Delhi-ah pollution a nasat lutuk avangin motor reng reng kum 10 aia upa road off tura an tih chu kan hre ṭheuh ang.
Anni ang khawpui lian mihring pawh Mizoram mihring let emaw zat chennaah chuan a awm khawp mai. Mahse kan State hi te reuh te, India ram kilkhawra awm boruak thiang tak nei kan ni. Chubakah motor zawng zawng pawh ni lo mi retheite eizawnna, sumdawng motor chauh an ti hi a mak a. City Bus leh Taxi te phei chu khawpui chhunga service an nih avangin kum 15 chuang tawh pawh nalh leh fit tak vek an la ni.
Kan State retheihzia kan hria a, sorkarin leiba tam tak a nei bawk. Central aṭanga sum lo kal te pawh sorkar hnathawk hlawhah a tam zawk a kal a, sorkar hnain min daih si lo. Lo neih leh huan thlai siam lah a hralhna lamah kan buai zel si. Nitin inhlawhfa tan lah inhlawhna a vang bawk si. Hetiang hi kan dinhmun a nih avangin chhungkaw chawm nan loan te leh a ba thlain mi taxi hlui te, mi bus hlui te an lei a. Ni khatah tlem tlem an hlawh chhuak a, loan rulh a ngai a, an motor chhia siam lo ngai ve reng bawk nen. Sorkarah chhiah tam tak pek a lo ngai bawk a, hetiang hian harsa takin chhungkua an chawm ve hram hram a ni.
Hetiang hian Sorkar pawh pur buai lovin an theih ang angin an motor duat tak, an fa ang maia an ngaih chuan an nupui fanaute an chawm a, an fate sikul an kal tir ve thei hram hram a. Midang awt bik lova thlamuang taka an awm lai chuan tunah hian an tana thu lungchhiat thlak tak mai chuan a rawn deng ta a. An tan vanpui a chim a, motor thar lei turin an tan tihngaihna a awm tawh si lo. Zan an mu thei lova, chaw an ei thei hek lo. Tihngaihna an hre si lo.
An chunga roreltu in an dinhmun leh an retheihna ngaihtuah miah lovin a rel tawh si a. An beidawng lutuk hian thil ṭha lo tak, mahni nunna lak duhna hial te pawh an nei ang tih a hlauhawm takzet a ni. Chuvangin, kan sorkar zahngai thei tak hian a thu pass hi ngaihtuah chiang leh se tih hi ka duh takzet a ni.
- Zonunmawia, Republic