KAWNGPUI ṬHA
Sorkarin ṭan a la a, tun hmaa khelmual nei ṭha ngai lo khan khelmual kan nei ṭha ta. Hetiang kan nih mek lai hian kan National Highway lam erawh a Highway hlei thei hrih lo. Mamit district kawngpui (NH 44A) chhiat chungchanga sawrkhar a inrawlh loh dan leh a siamtu mawh a nih dan te; Mizoram PWD-in contractor ko a, July thla chhunga kawng chhe zual siam ṭha tura an hrilh thute an sawi kha keini NH 54 (Tuirial - Aizawl) kawng zawh ṭhinte pawhin ngaithlain thaw kan lo la ve sang sang ringawt a. Eng tak ang ve i maw!
Khawchhak lam zawng zawng Champhai, Zokhawthar, Khawzawl, Kawlkulh, Saitual, Keifang leh khaw dang dang a tam lutuk; hmar tlang dung zawng zawng leh chhim lam Serchhip, Vanlaiphai, Lungdar leh Farkawn khualzin phur motor zawng zawngten he kawng pawimawh tak mai (Tuirial - Aizawl) hi nitin kan zawh a. A voters-a zawngin sawi dawn ta ila, itawm tham ve tak chu kan ni awm asin. Kawng sawt hlekah a tua mai pawhin kam chhe tleuh nan sawrkhar kan hmang a, opposition lamin sawi nuam an ti a, ruling lamin sawi tur hre lovin an ngaithla liam ve thung a. Kan inhnemnate lah, “Minister-in nimin khan a zawh ve” tih vel mai maite hi a ni a!
He kawngpui hi kum 2013 bawr khan ṭha taka siam a ni a, a hnuah pawh a chhe lai thawm ṭhat hlek hlek a ni
ṭhin. Tunah chuan hmun tam takah lirthei ṭha deuh nei tana zawh inthlahrunawm khawpin a khuar a, a ṭhen lai phei chu feet hnih dawna thukte pawh a ni ang chu. Kan hriat angin hei fur ruahtui tam lai a ni chho va, heng kawng khuarahte hian tuihawk a lo tling pum mai a. Lirthei khalhtu tan a khuar lai leh pawng lai a hriat tawh
ṭhin si lo va, two wheeler tan phei chuan inbingbileh leh rulpuiludin ur ur pawh thil awl tak tur a ni.
Hmanni lawk pawh khan Airfield peng kawng zawl laiah hian khuar thuk tak avangin motor lian a let hut mai asin! Tin, kawng hi kan sawi tak ang khan a khuar nasat avangin lirthei khalhtuten mahni side lam pawh ngaihtuah thei lovin a mam lai zawn a ṭul a, mahni side lo lama tlante pawh inhauh chu sawi loh innuih liam vel mai mai a tam a, intihpalhna lian tham zawk pawh thleng palh thei reng a ni. Mi ramah chuan an khawpui luh dawnin kawng a ṭha telh telh a, keini chu a chhe telh telh zawk emaw tih tur a ni rih.
Kum khatah vawi hnih khat den den kalte chu ni ila he kawng zawhtute tan hian ngaimawh em em loh dan tur pawh a awm thei a. Amaherawhchu, Aizawl hi kan khawpui leh vairam kalkawng, chi-seh ilo kan lamna leh damdawi tlana kan awmna ber te a nih ṭhin avangin kan kal ngun lo thei si lo. Tun kan dinhmunah phei chuan damlo na deuh nih leh a phurtu nih chu a chakawm loh dan a thuhmun reng a ni.
Tichuan hei furpui lai a ni a, tun ang huna alkatra nen mangai-a, rulngan pa ang zara siam tum chu thil tih mi loh tak a ni ang tih hai rual a ni lo. Mahse, tunah pawh heti kan nih tawh naka-laia fur khua han tawrh tlang phei chu thil lungchhiatthlak leh tawrhhlelhawm tak a ni dawn. Chuvangin, boulder nawi deuh emawa a khuar lai vawm khah dante hi awm se a duhawm hle mai. Tih tak tak ralah chuan ni hnih thum lekah helai kawng na na na hi chu tlin leh tum sawrkhar tan siam zawh mai theih a ni awm si a.
- R.Lalfakawma, Seling